ଢେଙ୍କାନାଳ ଅଫିସ, ୩।୧୨: ‘ଆମର ଯାହା ସମ୍ବଳ ଅଛି, ଆମେ ସେତିକି କରିପାରିବୁ। ଧିରେ ଧିରେ ସବୁ ଅଞ୍ଚଳରେ ତେଲ ପଡ଼ିବ, ଧୂଆଁ ଛଡ଼ାଯିବ। ତରବରିଆ ହେଲେ କିଛି କାମ ହୋଇପାରିବ ନାହିଁ’। ମଶା ଦୌରାତ୍ମ୍ୟରେ କଲବଲ ହେଉଥିବା ଢେଙ୍କାନାଳ ସହରବାସୀଙ୍କ ପାଇଁ କ’ଣ ପଦକ୍ଷେପ ନିଆଯାଇଛି ବୋଲି କରାଯାଇଥିବା ପ୍ରଶ୍ନରେ ଏଭଳି ଉପରଠାଉରିଆ ଉତ୍ତର ଦେଇଛନ୍ତି ପୌର ନିର୍ବାହୀ ଅଧିକାରୀ। ପୌରାଞ୍ଚଳରେ ଭୁଶୁଡ଼ି ପଡ଼ିଥିବା ପରିମଳ ଓ ଡ୍ରେନେଜ୍ ବ୍ୟବସ୍ଥା ମଶାବଂଶ ବୃଦ୍ଧିର ପ୍ରମୁଖ କାରଣ ପାଲଟିଥିବାବେଳେ ସମସ୍ତ ୨୩ ଓ୍ବାର୍ଡରେ ମଶାତେଲ ସିଞ୍ଚନ ପାଇଁ ମାତ୍ର ୨ଜଣ କର୍ମଚାରୀଙ୍କୁ ନିୟୋଜିତ କରାଯାଇଛି। ସମ୍ବଳ ଅଭାବକୁ ଆଳ ଦେଖାଇ ପୌର ପ୍ରଶାସନ ଓ ସ୍ବାସ୍ଥ୍ୟ ବିଭାଗ ନିଜ ଦାୟିତ୍ୱରୁ ଓହରି ଯାଉଥିବାବେଳେ ମଶା ଉପଦ୍ରବରେ ସହରବାସୀ ନୟାନ୍ତ ହୋଇପଡ଼ିଥିବା ଅଭିଯୋଗ ହେଉଛି।
ଆଦର୍ଶ ସହର ମାନ୍ୟତା ପାଇଛି ଢେଙ୍କାନାଳ। ଜନସଂଖ୍ୟା ୮୦ ହଜାର ଟପିଲାଣି। ହେଲେ ବିପର୍ଯ୍ୟସ୍ତ ପରିମଳ ଓ ଅବ୍ୟବସ୍ଥିତ ଡ୍ରେନେଜ୍ ଅପବାଦରୁ ମୁକୁଳିପାରୁନି ପୌର ପ୍ରଶାସନ। ଏଥିରେ ସୁଧାର ଲାଗି ଯେତେ ଯୋଜନା କରାଯାଉ ନ ଥିଲେ ମଧ୍ୟ ଦୂରଦୃଷ୍ଟି ଅଭାବରୁ ସବୁ ଫସର ଫାଟୁଛି। ବର୍ଷା ପରେ ଜଳାଶୟଠାରୁ ଆରମ୍ଭ କରି ଡ୍ରେନ୍ ଗଛଲତାରେ ପରିପୂର୍ଣ୍ଣ ହୋଇଛି। ଅଧିକାଂଶ ସ୍ଥାନରେ ପୁରୁଣା ଡ୍ରେନ୍ ଭାଙ୍ଗିରୁଜି ଯାଇଛି। ମଇଳା ନିଷ୍କାସିତ ହୋଇପାରୁନାହିଁ। ଅନ୍ୟ କେତେକ ଓ୍ବାର୍ଡରେ ଡ୍ରେନ୍ ନ ଥିବାରୁ ଆବର୍ଜନା ପାଣି ଜମିରହୁଛି। ଏସବୁ ମଶାବଂଶ ବଢ଼ିବା ପାଇଁ ପରିବେଶ ସୃଷ୍ଟି କରୁଛି। ସମସ୍ୟା ଅଣାୟତ୍ତ ହୋଇପଡ଼ିଥିବାବେଳେ ବିଭିନ୍ନ ମହଲରୁ ତୀବ୍ର ଅଭିଯୋଗ ହେବା ପରେ ୪ଦିନ ହେଲା ୨ ଫଗିଂ ମେଶିନ ସହରରେ ଧୂଅଁା ଛାଡୁଛି। ତେବେ ଏହା କେବଳ ସହରର ପ୍ରମୁଖ ରାସ୍ତା, ସାହିରେ ସୀମିତ ରହୁଛି। ଗଳିକନ୍ଦି ଭିତରକୁ ଗାଡ଼ି ପଶୁ ନ ଥିବା ଅଭିଯୋଗ ହେଉଛି। ଅପରପକ୍ଷେ ୨ କର୍ମଚାରୀଙ୍କୁ ସମସ୍ତ ୨୩ ଓ୍ବାର୍ଡରେ ମଶାତେଲ ସିଞ୍ଚନ କରିବାକୁ କେତେଦିନ ଲାଗିବ ତାହା ଏବେ ଆଲୋଚନା ବିଷୟ ହୋଇଛି। ଅସଜଡ଼ା ପରିମଳ ବ୍ୟବସ୍ଥାକୁ ନେଇ ପୌର କର୍ତ୍ତୃପକ୍ଷ ଅସହାୟ ହୋଇପଡ଼ିଥିବାବେଳେ ଅସନ୍ତୋଷ ତୀବ୍ର ହେବାରେ ଲାଗିଛି।
ଏ ସଂକ୍ରାନ୍ତରେ ଅତିରିକ୍ତ ଜିଲା ମୁଖ୍ୟ ଚିକିତ୍ସାଧିକାରୀ (ଜନସ୍ବାସ୍ଥ୍ୟ) ଡା. ଜ୍ୟୋତିଷ ଚନ୍ଦ୍ର ମହାପାତ୍ର କୁହନ୍ତି, ବିଭାଗ ପାଖରେ ଯଥେଷ୍ଟ ପରିମାଣର ମଶାତେଲ ଅଛି। ପୌରସଂସ୍ଥା ପକ୍ଷରୁ ଯେଉଁମାନେ ମଶାତେଲ ପକାଉଛନ୍ତି, ଆମେ ସେମାନଙ୍କୁ ମଶାତେଲ ଯୋଗାଇ ଦେଉଛୁ। ପୌର ନିର୍ବାହୀ ଅଧିକାରୀ ତରୁଣ କୁମାର ମହାପାତ୍ର କୁହନ୍ତି, ମଶା ଉପଦ୍ରବ ରୋକିବା ପାଇଁ ୪ଦିନ ହେଲା ସହରରେ ଧୂଅଁା ଛଡ଼ାଯାଉଛି। ଦୁଇଜଣ କର୍ମଚାରୀ ନାଳନର୍ଦ୍ଦମାରେ ମଶାତେଲ ପକାଉଛନ୍ତି ା ଆମର ସମ୍ବଳ ଅନୁଯାୟୀ ଆମେ ଲୋକଙ୍କୁ ନିୟୋଜିତ କରିଛୁ ା ଦୁଇଟି ଫଗିଂ ମେଶିନରେ ଧୂଅଁା ଛଡ଼ାଯାଉଥିବା ନିର୍ବାହୀ ଅଧିକାରୀ କହିଛନ୍ତି।