ଖଣ୍ଡପଡ଼ା,୧୪ା୫(ଅଜୟ କୁମାର ମହାରଣା):ଖଣ୍ଡପଡ଼ା ବ୍ଲ୍ଳକ ଅଧୀନ ଜଗନ୍ନାଥପ୍ରସାଦର ପ୍ରାୟ ୩ ହଜାରରୁ ଊର୍ଦ୍ଧ୍ୱ ଜନସାଧାରଣ ଆବଶ୍ୟକ ପାନୀୟ ଜଳ ନ ପାଇ ଗ୍ରୀଷ୍ମ ପ୍ରବାହ ସମୟରେ ନାହିଁ ନ ଥିବା ଅସୁବିଧାର ସମ୍ମୁଖୀନ ହେଉଥିବା ଅଭିଯୋଗ ହେଉଛି। ସମ୍ପୃକ୍ତ ଅଞ୍ଚଳକୁ ନିକଟସ୍ଥ ଶଙ୍ଖଝରି ନଦୀରୁ ପାଇପ ଲାଇନ ଯୋଗେ ପାନୀୟ ଜଳ ଯୋଗାଇବାର ବ୍ୟବସ୍ଥା କରାଯାଇଛି। ମାତ୍ର ସମ୍ପୃକ୍ତ ପ୍ରକଳ୍ପ ଆବଶ୍ୟକ ଜଳ ଯୋଗାଇବାରେ ସାମର୍ଥ ହୋଇ ପାରୁ ନାହିଁ। ପଞ୍ଚାୟତର କାଦୁଆପଡା, କାଦୁଆପାଟଣା, ମହୁଲପଡା, ଦରଦା, କୁହାରା, ହାତକଟା, ଗୋପାଳପୁର ଆଦି ଅଞ୍ଚଳର ଜନସାଧାରଣ ଜଳ ଯୋଗାଣ ପ୍ରକଳ୍ପ ଉପରେ ନିର୍ଭର କରୁଛନ୍ତି। ପ୍ରକଳ୍ପରୁ ଦିନେ ଛଡା ଦିନେ ତାହା ପୁଣି ମାତ୍ର ଘଣ୍ଟାକ ପାଇଁ ପାଣି ଯୋଗା ଯାଉଥିବା ଜଣାଯାଇଛି। ଅଧିକାଂଶ ସମୟରେ ପାଇପ ଲାଇନରେ ଗୋଳିଆ ପାଣି ଆସୁଥିବା ଅଭିଯୋଗ ହେଉଛି। ଗ୍ରାମରେ ଥିବା ଅଧିକାଂଶ ନଳକୂପ ଅଚଳ ହୋଇ ପଡିଥିବାରୁ ଲୋକେ ପାଣି ମୁନ୍ଦେ ପାଇଁ ହଇରାଣ ହେଉଛନ୍ତି। ଗୃହପାଳିତ ପ୍ରାଣୀ ମଧ୍ୟ ଏହାଦ୍ୱାରା ପ୍ରଭାବିତ ହେଉଥିବା ଜଣାଯାଇଛି। ପାନୀୟ ଜଳ ଯୋଗାଣରେ ଅବ୍ୟବସ୍ଥାକୁ ନେଇ ଗ୍ରାମର ମହିଳାମାନେ ଦୀର୍ଘ ସମୟ ଧରି ଷ୍ଟାଣ୍ଡ ପୋଷ୍ଟ ନିକଟରେ ଅପେକ୍ଷା କରି ପାଣି ସଂଗ୍ରହ କରୁଛନ୍ତି। ଗ୍ରାମ୍ୟ ଜଳଯୋଗାଣ ଓ ପରିମଳ ବିଭାଗ ପକ୍ଷରୁ ପାଇପ ଲାଇନ ଯୋଗେ ଗ୍ରାମବାସୀଙ୍କୁ ଜଳ ଯୋଗାଣ ନିମନ୍ତେ ସମସ୍ତ ବ୍ୟବସ୍ଥା କରାଯାଇଛି। ମାତ୍ର ଗ୍ରାମବାସୀ ପାଇପରୁ ପାଣି ସଂଗ୍ରହ ନିମନ୍ତେ ଅସୁବିଧାର ସମ୍ମୁଖୀନ ହେଉଥିବା ଅଭିଯୋଗ ହେଉଛି। ଏ ସମ୍ପର୍କରେ ପଞ୍ଚାୟତ କର୍ତ୍ତୃପକ୍ଷ, ସରପଞ୍ଚ ଓ ବ୍ଲକ ପ୍ରଶାସନର ଦୃଷ୍ଟି ଆକର୍ଷଣ ସତ୍ତ୍ୱେ ମଧ୍ୟ କୌଣସି ସୁଫଳ ମିଳୁ ନ ଥିବା ଅଭିଯୋଗ ହେଉଛି। ପାନୀୟ ଜଳ ସମସ୍ୟାର ସମାଧାନ ନିମନ୍ତେ ବ୍ଳକ ପ୍ରଶାସନ, ବିଭାଗୀୟ ସହକାରୀ ଯନ୍ତ୍ରୀ ଓ ଉଚ୍ଚ କର୍ତ୍ତୃପକ୍ଷ ଦୃଷ୍ଟି ଦେବାକୁ ଦାବି ହେଉଛି।