ଅମରପାଲି,୨୧।୭(ପୀତାମ୍ବର ସାହୁ):ସୁବର୍ଣ୍ଣପୁର ଜିଲା ବୀରମହାରାଜପୁର ବ୍ଲକ ଅନ୍ତର୍ଗତ କେନଝିରିଆପାଲି ଗ୍ରାମ ପଞ୍ଚାୟତବାସୀ ମୁଖ୍ୟମନ୍ତ୍ରୀ ବସ୍ ସେବା ପାଇବାରୁ ବଞ୍ଚିତ ହେଉ ଥିବା ଅଭିଯୋଗ ହେଉଛି। ତେଣୁ ସରକାର ତୁରନ୍ତ ଏହି ପଞ୍ଚାୟତକୁ ସରକାରୀ ବସ ଚଳାଚଳ କରିବାକୁ ପଞ୍ଚାୟତବାସୀ ଦାଦି କରିଛନ୍ତି।
ଆଜିକୁ ପ୍ରାୟ ୬ ମାସ ପୂର୍ବେ ଜିଲ୍ଲାର ବିଭିନ୍ନ ପଞ୍ଚାୟତକୁ ତତ୍କାଳୀନ ସରକାର ଲକ୍ଷ୍ମୀ ବସ ସେବା ଶୁଭାରମ୍ଭ କରିଥିଲେ। ଏହି କ୍ରମରେ ସେହି ଦିନ ଠାରୁ ବୀରମହାରାଜପୁର ବ୍ଲକରେ ତିନୋଟି ବସ ବିଭିନ୍ନ ରୁଟରେ ପ୍ରତ୍ୟହ ଚାରି ଥର ବିଭିନ୍ନ ପଞ୍ଚାୟତକୁ ଯାତାୟତ କରୁଛି। ମୁଖ୍ୟମନ୍ତ୍ରୀ ବସ ବୀରମହାରାଜପୁରରୁ ବାଗବର – ଜଟେସିଂହା – ସୁବଳୟା – କମିରା ଦେଇ ପିତାମହୁଲକୁ ଯାତାୟତ କରୁଛି। ଅନ୍ୟ ଏକ ବସ ବୀରମହାରାଜପୁରରୁ ବାହାରି ହିଲୁଙ୍ଗ-ମୁର୍ଷୁଣ୍ଢି-ଲୁତୁରପଙ୍କ-ବହଳପଦର ପଞ୍ଚାୟତ ଦେଇ ଦୁର୍ଜନତୈଲା କୁ ଯାତାୟତ କରୁଛି। ଆଉ ଏକ ବସ ବୀରମହାରାଜପୁରରୁ ମୁର୍ଷୁଣ୍ଢି ପଞ୍ଚାୟତ-ସୁବଳୟା ଦେଇ ଖଣ୍ଡହତା ପଞ୍ଚାୟତକୁ ଯାତାୟତ କରୁଛି। ତେବେ ବ୍ଲକରେ କେବଳ କେନଝିରିଆପାଲି ପଞ୍ଚାୟତକୁ ଏହି ବସ ଯାତାୟତ କରୁ ନ ଥିବା ଉକ୍ତ ପଞ୍ଚାୟତ ବାସୀ ଅଭିଯୋଗ କରୁଛନ୍ତି।
କେନଝିରିଆପାଲି ପଞ୍ଚାୟତକୁ ପ୍ରତିଦିନ ଚାରିଥର ବସ ଚଳାଚଳ କରିବା ପାଇଁ ରୁଟ ଚାର୍ଟରେ ଉଲ୍ଲେଖ ରହିଛି। ମାତ୍ର ଏଠାକୁ ଉକ୍ତ ସରକାରୀ ବସ ଯାତାୟତ କରୁ ନାହିଁ। ତେଣୁ ଏହି ପଞ୍ଚାୟତବାସୀ ମୁଖ୍ୟମନ୍ତ୍ରୀ ବସ ସେବା ପାଇବାରୁ ବଞ୍ଚିତ ହେଉଥିବା ଅଭିଯୋଗ କରିଛନ୍ତି। ଦୁର୍ଜନତୈଲା ପଞ୍ଚାୟତରୁ ଦାଦରପାଲି- ମାଳିଦାଦର-ମହାରସାହି-ବଡ଼ମାଳ-କେଶଲଗା ଦେଇ କେନଝିରିଆପାଲି ପଞ୍ଚାୟତକୁ ଯାଇ ସେଠାରୁ କଦଳୀପାଲି ଛକ-ବାରଝୁଲା-ମେଣ୍ଡମାଳ-ଅମୂଲ୍ୟମାମଣୀ ରାଣୀପୁର ଦେଇ ବୀରମହାରାଜପୁରକୁ ଏକ ନୂତନ ସରକାରୀ ବସ ଚଳାଚଳ କରିବାକୁ ଦାଦି ହେଉଛି।
ଏହି ରୁଟ ଦେଇ ବସ ଚଳାଚଳ କଲେ ବ୍ଲକ ଦୁର୍ଜନତୈଲା ପଞ୍ଚାୟତ, ବହଳପଦର, କେନଝିରିଆପାଲି ଓ ହିଲୁଙ୍ଗ ପଞ୍ଚାୟତର ପ୍ରାୟ ୫୦ରୁ ଅଧିକ ଗ୍ରାମବାସୀ ଉପକୃତ ହୋଇପାରିବେ। ଏବେ ବସ ଏହି ରୁଟ ଦେଇ ଯାଉ ନ ଥିବାରୁ ଉକ୍ତ ଅଞ୍ଚଳ ମିଶନଶକ୍ତିର ମହିଳା, ସ୍କୁଲ କଲେଜର ଛାତ୍ରୀଛାତ୍ର, ବ୍ୟବସାୟୀ ଓ ବୀରମହାରାଜପୁରରେ ଥିବା ବ୍ଲକ କାର୍ଯ୍ୟଳୟ, ତହସିଲ କାର୍ଯ୍ୟାଳୟ, ବ୍ୟାଙ୍କ, ଥାନା ଆଦି କାର୍ଯ୍ୟାଳୟ ଓ ବଜାର ଉପରେ ନିର୍ଭର କରୁଥିବା ଲୋକେ ଯାତାୟତରେ ନାହିଁ ନ ଥିବା ହଇରାଣ ହେଉଥିବା ଦେଖିବାକୁ ମିଳୁଛି। ତେଣୁ ଦୁର୍ଜନତୈଲା ପଞ୍ଚାୟତରୁ କେନଝିରିଆପାଲି- ମେଣ୍ଡାମାଳ ଦେଇ ଦେଇ ବୀରମହାରାଜପୁରକୁ ମୁଖ୍ୟମନ୍ତ୍ରୀ ବସ ଚଳାଚଳ କରିବାକୁ ସାଧାରଣରେ ଦାବି ହେଉଛି। ଏନେଇ ସୁବର୍ଣ୍ଣପୁର ଜିଲା ପରିବହନ ଅଧିକାରୀଙ୍କୁ ଯୋଗାଯୋଗ କରିବାକୁ ଚେଷ୍ଟା କରିଥିଲେ ମଧ୍ୟ ପ୍ରତିକ୍ରିୟା ମିଳିପାରି ନାହିଁ। ତେବେ ଉକ୍ତ ଅଞ୍ଚଳର ଏହି ସମସ୍ୟାକୁ ଦେଖି ତୁରନ୍ତ ମୁଖ୍ୟମନ୍ତ୍ରୀ ବସ ଚଳାଚଳ କରିବାକୁ ସାଧାରଣରେ ଦାବି ହେଉଛି।
