ଗୋପାଳପୁର,୨୭ା୧୧(ଡି.ଏନ.ଏ.): ଗଞ୍ଜାମ ଜିଲା ଗୋପାଳପୁର ନିର୍ବାଚନ ମଣ୍ଡଳୀରେ ରାଜନୈତିକ ଚର୍ଚ୍ଚା ଦିନକୁ ଦିନ ଜୋର ଧରିବାରେ ଲାଗିଛି। ଗୋଟିଏ ପଟେ ମୁଖ୍ୟମନ୍ତ୍ରୀଙ୍କ ରାଜନୈତିକ ସଚିବ ଗୋପବନ୍ଧୁ ଦାସ ବିଜେଡି ପାଇଁ ମଙ୍ଗଧରି ବିଭିନ୍ନ ପଞ୍ଚାୟତ ବୁଲି ଜନସମ୍ପର୍କ ପଦଯାତ୍ରା କରି ସରକାରଙ୍କ ଜନହିତକର ଯୋଜନାକୁ ଲୋକଙ୍କ ପାଖରେ ପହଞ୍ଚାଇବା ଚେଷ୍ଟା କରୁଥିବା ବେଳେ ଅନ୍ୟପଟେ ସ୍ଥାନୀୟ ବିଧାୟକ ଡ଼. ପ୍ରଦୀପ କୁମାର ପାଣିଗ୍ରାହୀ ଗାଁ ଗାଁ ବୁଲି ଲୋକଙ୍କ ସମସ୍ୟା ପଚାରି ବୁଝିବା ସହ ରାଜନୈତିକ ଗୋଟି ଚାଳନା କରୁଛନ୍ତି।
ରବିବାର ବିଧାୟକ ପାଣିଗ୍ରାହୀ ଆଲିପୁର, ମଞ୍ଚୁରୁକୋଟା, ସତ୍ୟନାରାୟଣପୁର ଓ ଅନ୍ୟ କେତେକ ଗାଁ ବୁଲି ଲୋକଙ୍କ ପାଖରେ ପହଞ୍ଚିଛନ୍ତି। ଲୋକେ ଜମିପଟ୍ଟା, ଇନ୍ଦିରାବାସ ମିଳୁ ନ ଥିବା ଓ ଅନ୍ୟାନ୍ୟ ସମସ୍ୟା ଜଣାଇଥିଲେ। ଏହି ଅବସରରେ ପ୍ରଦୀପ ଆଲିପୁର ଗ୍ରାମରେ ଠାକୁରାଣୀ ମନ୍ଦିର ପାଚେରୀ ପାଇଁ ୩ ଲକ୍ଷ ୫୦ ହଜାର ଓ ମିଶନ ଶକ୍ତି ଗୃହ ପାଇଁ ୩ ଲକ୍ଷ ୫୦ ହଜାର ଟଙ୍କା ପ୍ରଦାନ ପାଇଁ ବିଧାୟକ ପାଣ୍ଠିରୁ ଘୋଷଣା କରିଥିଲେ।
ଗଣମାଧ୍ୟମ ପ୍ରତିନିଧିଙ୍କ ପ୍ରଶ୍ନର ଉତ୍ତରରେ ସେ କହିଥିଲେ, ସାଧାରଣ ଲୋକ ଓ ବିଧାୟକଙ୍କ କଥା ମଧ୍ୟ ମୁଖ୍ୟମନ୍ତ୍ରୀ ଶୁଣୁନାହାନ୍ତି। ଓଡ଼ିଶାରେ ବର୍ତ୍ତମାନ ପରିବର୍ତ୍ତନ ଆସିଯାଇଛି। ପଦ୍ମପୁରବାସୀ ପ୍ରଦୀପ ପୁରୋହିତଙ୍କୁ ଭୋଟ ଦେବାକୁ ଅନୁରୋଧ କରିଥିଲେ। ପ୍ରଭୁ ଜଗନ୍ନାଥ ଓ ଲିଙ୍ଗରାଜ ନିର୍ଦ୍ଦେଶ ଦେଉଛନ୍ତି ଏହି ଶାସନ କାଳ ସରିଲା ଓ ନୂଆ ଶାସନ କାଳ ବ୍ୟବସ୍ଥାକୁ ନବୀନ ବାବୁ ସହଯୋଗ କରନ୍ତୁ ବୋଲି ବିଧାୟକ ପାଣିଗ୍ରାହୀ ଅନୁରୋଧ କରିଥିଲେ। ଓଡ଼ିଶାରେ ଭତ୍ତା ୫୦୦ରୁ ୭୦୦ ଟଙ୍କା ଦିଆଯାଉଥିବା ବେଳେ ଆନ୍ଧ୍ର ଓ ତେଲେଙ୍ଗନାରେ ଅଧିକ ଦିଆଯାଉଛି। ଏନସିବି ରେକର୍ଡରେ ଓଡ଼ିଶାର ଆତ୍ମହତ୍ୟା ସ୍ଥାନ ୧ନମ୍ବର ରହିଛି ବୋଲି ସେ କହିଥିଲେ। ଏହି ଉକ୍ତିକୁ ନେଇ ରାଜନୈତିକ ମହଲରେ ହଇଚଇ ସୃଷ୍ଟି କରିଛି।