ରାଉରକେଲା ଅଫିସ,୧୭।୨: ରାଉରକେଲା ସ୍ମାର୍ଟ ସିଟି ଯେପରି ଦିନକୁ ଦିନ ଉନ୍ନତି ପଥରେ ଗତି କରୁଛି ସେହି ପରିମାଣରେ ସହରରେ ଥିବା ବସ୍ତି ଅଞ୍ଚଳର ସମସ୍ୟା ସମାଧାନ ହେଉନି। ଫଳରେ ଏହି ବସ୍ତିବାସିନ୍ଦା ନାନା ଅସୁବିଧାର ସମ୍ମୁଖୀନ ହେଉଛନ୍ତି।
ରାଉରକେଲା ସହର ଆଖପାଖରେ ଗଢିଉଠିଥିବା ପ୍ରାୟ ୧୫୦ରୁ ଊର୍ଦ୍ଧ୍ୱ ବସ୍ତି ମଧ୍ୟରେ ରହିଛି ଉଦିତନଗର ସ୍ଥିତ ଶୀତଳପଡ଼ା ବସ୍ତି । ଏହା ଇସ୍ପାତ କାରଖାନାର ଡମ୍ପିଂ ୟାର୍ଡ଼ ଅଞ୍ଚଳରେ ରହିଥିବା ବେଳେ ବସ୍ତିରେ ପ୍ରାୟ ୨ହଜାରରୁ ଊର୍ଦ୍ଧ୍ୱ ଲୋକ ବାସ କରନ୍ତି। ତେବେ ଅଦ୍ୟାବଧି ଏଠାକାର ଲୋକଙ୍କୁ ପାନୀୟ ଜଳ, ରାସ୍ତା, ବିଦ୍ୟୁତ, ଡ୍ରେନେଜ ଭଳି ବିଭିନ୍ନ ମୌଳିକ ସୁବିଧା ମିଳି ପାରିନାହିଁ। ଏହି ବସ୍ତି ରଘୁନାଥପାଲି ନିର୍ବାଚନ ମଣ୍ଡଳୀ ଅର୍ନ୍ତଭୁକ୍ତ। ଏଠାରେ ବିଭିନ୍ନ ସମସ୍ୟା ଲାଗି ରହିଥିବା ଦେଖିବାକୁ ମିଳିଛି। ଏଠାରେ ପକ୍କା ରାସ୍ତା ନାହିଁ। ଫଳରେ ଲୋକମାନଙ୍କୁ ଯାତାୟାତରେ ଅସୁବିଧାର ସମ୍ମୁଖୀନ ହେବାକୁ ପଡ଼ିଛି। ସେହିପରି ରାସ୍ତା କଡ଼ରେ କୁଢ଼ କୁଢ଼ ଅଳିଆ ଆବର୍ଜନା ଜମା ହୋଇ ରହିଛି। ପାନୀୟ ଜଳ ବ୍ୟବସ୍ଥା ନ କହିବା ଭଲ। ବସ୍ତିବାସୀଙ୍କ ପାଇଁ ଥିବା ପାଇପ୍ ଜଳ ପ୍ରକଳ୍ପର ୩ଟି ଟ୍ୟାପ୍ରେ ପାଣି ଆସୁନାହିଁ। ୩ଟି ନଳକୂପ ଅଚଳ ଅବସ୍ଥାରେ ପଡ଼ି ରହିଛି। ଅନ୍ୟ ୨ଟି ନଳକୂପରେ ଡଷ୍ଟ ପାଣି ବାହାରୁଥିବାରୁ ଏହା ବ୍ୟବହାର ଅନୁପଯୋଗୀ ହୋଇପଡିଛି। ଡ୍ରେନେଜ ବ୍ୟବସ୍ଥା ନ ଥିବାରୁ ରାସ୍ତାରେ ନର୍ଦ୍ଦମା ପାଣି ଭାସୁଛି। ସେହିପରି ଶୌଚାଳୟ, ବିଦ୍ୟୁତ୍ ଯୋଜନାରେ ବସ୍ତିବାସୀ ସାମିଲ ହୋଇପାରିନାହାନ୍ତି।
