ଅନର କିଲିଂକୁ ଜବାବ ଦିଅ,ସ୍ବାଧୀନତାର ୭୫ ବର୍ଷ ପରେ ବି ହଟିନି ଜାତିପ୍ରଥା: ସୁପ୍ରିମକୋର୍ଟ

ନୂଆଦିଲ୍ଲୀ,୨୯।୧୧: ଦେଶ ସ୍ବାଧୀନ ହେବାର ୭୫ ବର୍ଷ ପରେ ମଧ୍ୟ ଜାତିପ୍ରଥା ହଟିନାହିଁ। ସମାଜରେ ଏବେ ବି ଅନର କିଲିଂ ଭଳି ଜାତିଭିତ୍ତିକ ହିଂସା ଦେଖିବାକୁ ମିଳୁଛି। ଜାତି ନାମରେ ଭିଆଯାଉଥିବା ଏଭଳି ଅପରାଧକୁ ସମାଜ କଡ଼ା ଜବାବ ଦେବା ଆବଶ୍ୟକ ବୋଲି ସୁପ୍ରିମକୋର୍ଟ ଆହ୍ବାନ ଦେଇଛନ୍ତି।
୧୯୯୧ରେ ଉତ୍ତର ପ୍ରଦେଶରେ ଘଟିଥିବା ଏକ ଅନର କିଲିଂ ଘଟଣାରେ ଜଣେ ମହିଳାଙ୍କ ସମେତ ୩ ଜଣଙ୍କୁ ହତ୍ୟା କରାଯାଇଥିଲା। ଏହା ବିରୋଧରେ ଦାଏର ଏକାଧିକ ପିଟିଶନର ଶୁଣାଣି କରି ସୁପ୍ରିମକୋର୍ଟ ଉପରୋକ୍ତ ଟିପ୍ପଣୀ ଦେଇଛନ୍ତି। ପୂର୍ବରୁ ଅନର କିଲିଂ ରୋକିବା ପାଇଁ ଅନେକ ଥର ନିର୍ଦ୍ଦେଶନାମା ଜାରି କରାଯାଇଛି, ଯାହାକୁ ଅବିଳମ୍ବେ କାର୍ଯ୍ୟକାରୀ କରିବାକୁ ସର୍ବୋଚ୍ଚ ଅଦାଲତ ସଦ୍ୟ ରାୟରେ ନିର୍ଦ୍ଦେଶ ଦେଇଛନ୍ତି। ଜଷ୍ଟିସ୍‌ ଏଲ୍‌. ନାଗେଶ୍ୱର ରାଓଙ୍କ ଅଧ୍ୟକ୍ଷତାରେ ଗଠିତ ତିନିଜଣିଆ ଖଣ୍ଡପୀଠ କହିଛନ୍ତି, ଏଭଳି ମାମଲାକୁ କଳଙ୍କିତ ହେବା ଏବଂ ସତ୍ୟକୁ ବଞ୍ଚାଇବା ପାଇଁ ସରକାରଙ୍କ ଏକ ନିର୍ଦ୍ଦିଷ୍ଟ ଭୂମିକା ରହିଛି। ବିଶେଷକରି ଯେଉଁ ସମ୍ବେଦନଶୀଳ ମାମଲାରେ କ୍ଷମତାରେ ଥିବା ଲୋକେ ରାଜନୈତିକ ପ୍ରୋତ୍ସାହନ ପାଇ ବାହୁବଳ ଓ ଅର୍ଥବଳ ପ୍ରୟୋଗ କରିଥାଆନ୍ତି, ସେମାନେ ସାକ୍ଷୀମାନଙ୍କୁ ପ୍ରଭାବିତ କରିବା ଆଶଙ୍କା ରହିଥାଏ। ଜାତିପ୍ରଥା ଦ୍ୱାରା ପ୍ରେରିତ ଏଭଳି କୁକାର୍ଯ୍ୟ ଆଜି ମଧ୍ୟ ସମାଜରେ ଘଟିଚାଲିଛି, ଯାହାକି ସମସ୍ତ ନାଗରିକଙ୍କୁ ସମାନତା ପ୍ରଦାନ ନେଇ ସମ୍ବିଧାନର ଲକ୍ଷ୍ୟ ଆଗରେ ପ୍ରତିବନ୍ଧକ ସୃଷ୍ଟି କରୁଛି।
ଜଷ୍ଟିସ୍‌ ସଞ୍ଜୀବ ଖାନ୍ନା ଏବଂ ବି.ଆର୍‌. ଗଭାଇଙ୍କୁ ନେଇ ଗଠିତ ଖଣ୍ଡପୀଠ ଆହୁରି କହିଛନ୍ତି। ଜାତିଭିତ୍ତିକ ସାମାଜିକ ନିୟମ ଉଲ୍ଲଂଘନ ଲାଗି ଦୁଇ ଯୁବକ ଓ ଜଣେ ଯୁବତୀଙ୍କୁ ପ୍ରାୟ ୧୨ ଘଣ୍ଟା ଧରି ଶାରୀରିକ ନିର୍ଯାତନା ଦେଇ ଅଭିଯୁକ୍ତ ହତ୍ୟା କରିଥିଲେ। ଦେଶରେ ଏଭଳି ଜାତିଗତ ହିଂସାର ଧାରାବାହିକ ଦର୍ଶାଉଛି ଯେ, ସ୍ବାଧୀନତାର ୭୫ ବର୍ଷ ପରେ ମଧ୍ୟ ଜାତିପ୍ରଥା ଉଚ୍ଛେଦ ହୋଇନାହିଁ। ଏହି ଅବସରରେ ଖଣ୍ଡପୀଠ ଆଲ୍ଲାହାବାଦ ହାଇକୋର୍ଟଙ୍କ ରାୟକୁ ବଳବତ୍ତର ରଖି ୨୩ ଅଭିଯୁକ୍ତଙ୍କ ମଧ୍ୟରୁ ୩ ଜଣଙ୍କୁ ସେମାନଙ୍କ ପରିଚୟରେ ଅସ୍ପଷ୍ଟତା ପାଇଁ ଦୋଷମୁକ୍ତ କରିଛନ୍ତି। ଏହି ମାମଲାରେ ଅଭିଯୋଜନ ପକ୍ଷର ୧୨ ସାକ୍ଷୀ ନିଜ ବୟାନରୁ ଓହରିଯାଇବା ସତ୍ତ୍ୱେ ସେମାନଙ୍କ ସାକ୍ଷ୍ୟପ୍ରମାଣକୁ ଗ୍ରହଣ କରାଯାଇପାରିବ, ଯଦି ସେମାନେ ସ୍ବାଭାବିକ ଓ ସ୍ବାଧୀନ ସାକ୍ଷୀ ହୋଇଥିବେ ଏବଂ ଅଭିଯୁକ୍ତଙ୍କୁ ଫସାଇବା ସେମାନଙ୍କ ଉଦ୍ଦେଶ୍ୟ ହୋଇ ନ ଥିବ। ପ୍ରକାଶ ଯେ, ୧୯୯୧ରେ ୟୁପିରେ ଘଟିଥିବା ସମ୍ମାନ ପାଇଁ ହତ୍ୟା ମାମଲାରେ ୨୦୧୧ ନଭେମ୍ବରରେ ଏକ ତଳ କୋର୍ଟ ୩୫ ଅଭିଯୁକ୍ତଙ୍କୁ ଦୋଷୀ ସାବ୍ୟସ୍ତ କରିଥିଲେ। ହାଇକୋର୍ଟ ସେମାନଙ୍କ ମଧ୍ୟରୁ ୨ ଜଣଙ୍କୁ ମୁକ୍ତ କରିଥିବାବେଳେ ଅବଶିଷ୍ଟ ଅଭିଯୁକ୍ତଙ୍କୁ ଦୋଷୀ ସାବ୍ୟସ୍ତ କରିଥିଲେ। ଦୋଷୀଙ୍କ ମଧ୍ୟରୁ ୮ ଜଣଙ୍କୁ ତଳ କୋର୍ଟ ଫାଶୀଦଣ୍ଡାଦେଶ ଦେଇଥିବାବେଳେ ହାଇକୋର୍ଟ ଏହାକୁ କୋହଳ କରି ସେମାନେ ବଞ୍ଚତ୍ଥିବା ଯାଏ ଜେଲରେ ରହିବେ ବୋଲି ରାୟ ଦେଇଥିଲେ।