ପୁରୀ ଅଫିସ,୫।୭: ପୁରୀ ଜିଲାରେ କରୋନା ପଜିଟିଭ ସଂଖ୍ୟା ବଢିବାରେ ଲାଗିଛି। ଜୁଲାଇ ମାସ ସବୁଠୁ ଗୁରୁତ୍ୱପୂର୍ଣ୍ଣ। ତେଣୁ କରୋନା ସଂକ୍ରମଣ ଯେପରି ନ ବ୍ୟାପିବ ସେଥିପ୍ରତି ସମସ୍ତଙ୍କୁ ସଚେତନ ଓ ସତର୍କ ରହିବାକୁ ହେବ। ଏହାକୁ ଦୃଷ୍ଟିରେ ରଖି ପୁରୀ ପ୍ରବେଶ ଉପରେ କଟକଣା ଜାରି କରାଯାଇଛି। ରବିବାରଠାରୁ ଜିଲାର ତିନୋଟି ମୁଖ୍ୟ ପ୍ରବେଶ ପଥ ପୁରୀ-ଭୁବନେଶ୍ୱର, ପୁରୀ-ଅସ୍ତରଙ୍ଗ ଓ ଜଗନ୍ନାଥ ସଡ଼କରେ ଯାଞ୍ଚ କଡ଼ାକଡ଼ି ହେବ। ଅନ୍ୟ ଜିଲା ବା ରାଜ୍ୟ ବାହାରୁ ଆସୁଥିବା ବ୍ୟକ୍ତିମାନଙ୍କୁ ଯାଞ୍ଚ କରାଯିବ। ପ୍ରବେଶ କରୁଥିବା ଲୋକଙ୍କୁ କ’ଣ ପାଇଁ ଆସୁଛନ୍ତି, ତାହା କେତେ ଜରୁରୀ ଆଦି ସବୁର ତଥ୍ୟ ଦେବାକୁ ପଡ଼ିବ। ଅତ୍ୟାବଶ୍ୟକ ନ ଥିବା ବ୍ୟକ୍ତିଙ୍କୁ ପ୍ରବେଶ ଅନୁମତି ଦିଆଯିବ ନାହିଁ ବୋଲି ଜିଲାପାଳ ବଲୱନ୍ତ ସିଂ କହିଛନ୍ତି। ଶନିବାର
ଗଣମାଧ୍ୟମକୁ ସୂଚନା ଦେଇ ଜିଲାପାଳ କହିଛନ୍ତି, ଏଭଳି ଏକ ଘଡ଼ିସନ୍ଧିି ମୁହୂର୍ତ୍ତରେ ନିହାତି କାମ ନ ଥିଲେ କେହି ପୁରୀକୁ ଆସନ୍ତୁ ନାହିଁ। ବିଶେଷକରି ପର୍ଯ୍ୟଟକମାନେ ବର୍ତ୍ତମାନ ସେମାନଙ୍କ ଗସ୍ତ ବାତିଲ କରନ୍ତୁ। ସରକାର ଜୁଲାଇ ମାସ ପାଇଁ ଯେଉଁ ଗାଇଡ୍ଲାଇନ ପାଳନ କରିଛନ୍ତି ତାହାକୁ ସମସ୍ତେ ମାନିବାକୁ ହେବ। ପୁରୀରେ ରବିବାରଠାରୁ ମାସ୍କ ଏବଂ ସାମାଜିକ ଦୂରତ୍ୱ ନିୟମ କଡ଼ାକଡ଼ିି କରାଯିବ। ଏଥିପାଇଁ ସ୍କ୍ବାଡ୍ ଗଠନ କରାଯାଇ ସଚେତନ କରାଯାଉଛି। ଯଦି କେହି ନିୟମ ଭାଙ୍ଗନ୍ତି ସେମାନଙ୍କଠାରୁ ଜରିମାନା ଆଦାୟ ହେବ। ଆସନ୍ତା ୩୧ ତାରିଖ ପର୍ଯ୍ୟନ୍ତ କୋଣାର୍କ ସୂର୍ଯ୍ୟ ମନ୍ଦିରକୁ ପ୍ରବେଶ ଉପରେ ମଧ୍ୟ କଟକଣା ଲଗାଯାଇଛି।
