ଭୁବନେଶ୍ୱର,୧୪।୫ (ଅନୁରାଧା ମହାରଣା): କ୍ରମାଗତ ଭାବେ ଘରୋଇ ବଜାରରେ ଖୁଚୁରା ମୁଦ୍ରାସ୍ଫୀତି ହ୍ରାସ ପାଉଛି। ଏପରିକି ୨୦୨୪ ଏପ୍ରିଲ ମାସରେ ଖୁଚୁରା ମୁଦ୍ରାସ୍ଫୀତି ହାର ୪.୮୩%ରେ ରହିଛି। ସେହିଭଳି ୨୦୨୪ ମାର୍ଚ୍ଚରେ ଖୁଚୁରା ମୁଦ୍ରାସ୍ଫୀତି ହାର ୪.୮୫% ରହିଥିବାବେଳେ ଏପ୍ରିଲରେ ଏହା ୪.୮୩%କୁ ହ୍ରାସ ପାଇଛି। ଅପରପକ୍ଷରେ ଖାଦ୍ୟ ମୁଦ୍ରାସ୍ଫୀତି ଚଳିତ ବର୍ଷ ଏପ୍ରିଲରେ ୮.୭୦%କୁ ବୃଦ୍ଧି ପାଇଛି, ଯାହାକି ୨୦୨୪ ମାର୍ଚ୍ଚରେ ୮.୫୨% ରହିଥିଲା ବୋଲି ପରିସଂଖ୍ୟାନ ମନ୍ତ୍ରଣାଳୟ ପକ୍ଷରୁ ସୂଚନା ଦିଆଯାଇଛି। ପରିସଂଖ୍ୟାନ ମନ୍ତ୍ରଣାଳୟ ୨୦୨୪-୨୫ ଆର୍ଥିକ ବର୍ଷର ପ୍ରଥମ ମାସ ଏପ୍ରିଲ ପାଇଁ ଖୁଚୁରା ମୁଦ୍ରାସ୍ଫୀତି ହାର ତଥ୍ୟ ପ୍ରକାଶ କରିଛି। ଏହି ତଥ୍ୟ ଅନୁସାରେ ଏପ୍ରିଲରେ ଖୁଚୁରା ମୁଦ୍ରାସ୍ଫୀତି ହାର ୪.୮୩%କୁ ଖସି ଆସିଛି। ତେବେ ପନିପରିବା ଏବଂ ଡାଲି ପରି ଖାଦ୍ୟ ସାମଗ୍ରୀର ମୁଦ୍ରାସ୍ଫୀତି ବୃଦ୍ଧି ହେତୁ ଖାଦ୍ୟ ମୁଦ୍ରାସ୍ଫୀତି ହାରରେ ବୃଦ୍ଧି ଘଟିଛି। ଖାଦ୍ୟ ମୁଦ୍ରାସ୍ଫୀତି ହାର ୮.୭୦%ରେ ପହଞ୍ଚିଛି, ଯାହାକି ମାର୍ଚ୍ଚ ୨୦୨୪ ରେ ୮.୫୨% ଥିଲା। ଏପ୍ରିଲରେ ଖାଦ୍ୟ ମୁଦ୍ରାସ୍ଫୀତିର ବୃଦ୍ଧି ମୁଖ୍ୟତଃ ପନିପରିବା ଏବଂ ଡାଲିରେ ମୁଦ୍ରାସ୍ଫୀତି ବୃଦ୍ଧି ଯୋଗୁ ହୋଇଥାଏ। ପନିପରିବାର ମୁଦ୍ରାସ୍ଫୀତି ମାର୍ଚ୍ଚରେ ୨୬.୩୮% ଥିବାବେଳେ ଏପ୍ରିଲରେ ୨୭.୮୦% ରହିଛି। ଡାଲିର ମୁଦ୍ରାସ୍ଫୀତି ହାର ଏପ୍ରିଲରେ ୧୬.୮୪% ହୋଇଛି। ମାର୍ଚ୍ଚରେ ଏହା ୧୮.୯୯%ରହିଥିବାବେଳେ ଫେବୃଆରୀରେ ୧୮.୯୦ ପ୍ରତିଶତ ରହିଥିଲା। ସେହିପରି ଶସ୍ୟ ଏବଂ ଆନୁଷଙ୍ଗିକ ଦ୍ରବ୍ୟର ମୁଦ୍ରାସ୍ଫୀତି ହାର ୮.୬୩% ହୋଇଛି, ଯାହା ମାର୍ଚ୍ଚରେ ୭.୯୦% ଥିଲା। ମସଲାର ମୁଦ୍ରାସ୍ଫୀତି ହାର ୭.୭୫% ହୋଇଛି। ମାର୍ଚ୍ଚରେ ୧୧.୪୩% ଥିଲା। ଫଳର ମୁଦ୍ରାସ୍ଫୀତି ହାର ୫.୯୪% ହୋଇଛି ଯାହା ମାର୍ଚ୍ଚରେ ୨.୬୭% ଥିଲା। ଚିନିର ମୁଦ୍ରାସ୍ଫୀତି ହାର ୬.୭୩% ଏବଂ ଅଣ୍ଡାର ମୁଦ୍ରାସ୍ଫୀତି ହାର ୯.୫୯%ରହିଛି।
ଖୁଚୁରା ମୁଦ୍ରାସ୍ଫୀତି ହାର ଭାରତୀୟ ରିଜର୍ଭ ବ୍ୟାଙ୍କର ଟଲେରାନ୍ସ ବ୍ୟାଣ୍ଡର ୬%ରୁ କମ ଅଟେ। ଏହା କ୍ରମାଗତ ଦ୍ୱିତୀୟ ମାସ ଯେତେବେଳେ ଖୁଚୁରା ମୁଦ୍ରାସ୍ଫୀତି ୫%ରୁ କମ ରହିଛି। ତେବେ ଖୁଚୁରା ମୁଦ୍ରାସ୍ଫୀତି ହାରକୁ ୪%କୁ ହ୍ରାସ କରିବାକୁ ଆରବିଆଇର ଲକ୍ଷ୍ୟ ରଖିଛି। ବିଶେଷତଃ ଡାଲି ଏବଂ ପାଣିପାଗରେ କ୍ରମାଗତ ପରିବର୍ତ୍ତନ ହେତୁ ପନିପରିବା ଏବଂ ପନିପରିବା ମହଙ୍ଗା ହୋଇଛି।