ଭୁବନେଶ୍ୱର, ୧୩।୮ (ଅନୁରାଧା ମହାରଣା): ଚଳିତ ଆର୍ଥିକ ବର୍ଷର ଜୁଲାଇରେ ଖୁଚୁରା ମୁଦ୍ରାସ୍ଫୀତି ୩.୫୪%କୁ ଖସି ଆସିଛି। ଏହି କ୍ରମରେ ଗତ ୫୯ ମାସର ସର୍ବନିମ୍ନ ସ୍ତରରେ ଖୁଚୁରା ମୁଦ୍ରାସ୍ଫୀତି ହାର ପହଞ୍ଚତ୍ଛି। ୨୦୧୯ ଅଗଷ୍ଟରେ ମୁଦ୍ରାସ୍ଫୀତି ୩.୨୧% ଥିବାବେଳେ ଜୁନ୍ରେ ମୁଦ୍ରାସ୍ଫୀତି ୫.୦୮% ରହିଥିଲା। ଖାଦ୍ୟ ସାମଗ୍ରୀର ମୂଲ୍ୟ ହ୍ରାସ ହେତୁ ମୁଦ୍ରାସ୍ଫୀତି ହ୍ରାସ ପାଇଛି। ମୁଦ୍ରାସ୍ଫୀତି ବର୍ତ୍ତମାନ ଆର୍ବିଆଇର ଟାର୍ଗେଟରେ ୨-୪% ରହିଛି। ଶସ୍ୟ, ଫଳ, ପନିପରିବା, ଡାଲି ଏବଂ ମସଲା ମୂଲ୍ୟରେ ହ୍ରାସ ହେତୁ ଖାଦ୍ୟ ମୁଦ୍ରାସ୍ଫୀତି ହାର ୯.୩୬% ରୁ ୫.୪୨%କୁ ଖସି ଆସିଛି। ଏଥିସହିତ ସହରାଞ୍ଚଳ ମୁଦ୍ରାସ୍ଫୀତି ମଧ୍ୟ ମାସ-ମାସରେ ୪.୩୯% ରୁ ୨.୯୮% କୁ ହ୍ରାସ ପାଇଛି। ଅନ୍ୟପଟେ ଗ୍ରାମୀଣ ମୁଦ୍ରାସ୍ଫୀତି ୫.୬୬% ରୁ ୪.୧୦%କୁ ହ୍ରାସ ପାଇଛି। ୨୦୨୩ ଜୁଲାଇରେ ଖାଦ୍ୟ ମୁଦ୍ରାସ୍ଫୀତି ୧୧.୫୧% ଥିଲା, ବର୍ତ୍ତମାନ ଏହା ୫.୪୨% ରେ ପହଞ୍ଚିଛି। ମୁଦ୍ରାସ୍ଫୀତି ବାସ୍କେଟରେ ଖାଦ୍ୟ ସାମଗ୍ରୀର ପ୍ରାୟ ୫୦% ଯୋଗଦାନ କରିଥାଏ। ଏହାର ମୁଦ୍ରାସ୍ଫୀତି ମାସ-ମାସରେ ୯.୩୬% ରୁ ୫.୪୨%କୁ ହ୍ରାସ ପାଇଛି। ଏକ ବର୍ଷ ପୂର୍ବେ ଅର୍ଥାତ୍ ୨୦୨୩ ଜୁଲାଇରେ, ଖାଦ୍ୟ ମୁଦ୍ରାସ୍ଫୀତି ୧୧.୫୧% ଥିଲା। ଅର୍ଥାତ୍ ବାର୍ଷିକ ଭିତ୍ତିରେ ମଧ୍ୟ ଏହା ହ୍ରାସ ପାଇଛି।
ପନିପରିବାର ମୁଦ୍ରାସ୍ଫୀତି ଜୁଲାଇରେ ୬.୮୩% ଥିବାବେଳେ ଜୁନ ମାସରେ ଏହି ହାର ୨୯.୩୨% ଥିଲା। ଶସ୍ୟ ଏବଂ ଡାଲି ଭାରତୀୟ ମୁଖ୍ୟ ଖାଦ୍ୟର ଏକ ଗୁରୁତ୍ୱପୂର୍ଣ୍ଣ ଅଂଶ ଭାବରେ ଗଠିତ। ଏହାର ମୁଦ୍ରାସ୍ଫୀତି ୮.୧୪% ଏବଂ ୧୪.୭୭%କୁ ଖସି ଆସିଛି। ଇନ୍ଧନ ଏବଂ ଆଲୋକର ମୁଦ୍ରାସ୍ଫୀତି ମଧ୍ୟ ହ୍ରାସ ପାଇଛି। ସୂଚନାଥାଉକି, ନିକଟରେ ଅନୁଷ୍ଠିତ ମୁଦ୍ରା ନୀତି କମିଟି ବୈଠକରେ ଭାରତୀୟ ରିଜର୍ଭ ବ୍ୟାଙ୍କ (ଆରବିଆଇ) ଏହି ଆର୍ଥିକ ବର୍ଷ ପାଇଁ ମୁଦ୍ରାସ୍ଫୀତି ଆକଳନକୁ ୪.୫% ଅପରିବର୍ତ୍ତିତ ରଖିଛି। ଏନେଇ ଆରବିଆଇ ଗଭର୍ନର କହିଥିଲେ, ମୁଦ୍ରାସ୍ଫୀତି ହ୍ରାସ ପାଉଛି, କିନ୍ତୁ ପ୍ରଗତି ଧୀର ଏବଂ ଅସମାନ ଅଟେ। ମୁଦ୍ରାସ୍ଫୀତିର ବୃଦ୍ଧି ଏବଂ ହ୍ରାସ ଉତ୍ପାଦର ଚାହିଦା ଏବଂ ଯୋଗାଣ ଉପରେ ନିର୍ଭର କରେ। ଯଦି ଲୋକଙ୍କ ପାଖରେ ଅଧିକ ଟଙ୍କା ଅଛି ତେବେ ସେମାନେ ଅଧିକ ଜିନିଷ କିଣିବେ। ଅଧିକ ଜିନିଷ କିଣିବା ଜିନିଷଗୁଡ଼ିକର ଚାହିଦା ବଢ଼ାଇବ ଏବଂ ଯଦି ଯୋଗାଣ ଚାହିଦା ଅନୁଯାୟୀ ନଥାଏ, ତେବେ ଏହି ଜିନିଷଗୁଡ଼ିକର ମୂଲ୍ୟ ବୃଦ୍ଧି ପାଇବ। ଏହିପରି ଭାବରେ ବଜାର ମୁଦ୍ରାସ୍ଫୀତି ପାଇଁ ଅସୁରକ୍ଷିତ ହୋଇଯାଏ। ବଜାରରେ ଯଦି ଚାହିଦା କମ ଏବଂ ଯୋଗାଣ ଅଧିକ ତେବେ ମୁଦ୍ରାସ୍ଫୀତି କମ ହୋଇଥାଏ। ଜଣେ ଗ୍ରାହକ ଖୁଚୁରା ବଜାରରୁ ସାମଗ୍ରୀ କିଣୁଥିବାବେଳେ ଏହା ସହିତ ଜଡିତ ମୂଲ୍ୟରେ ପରିବର୍ତ୍ତନ ଦେଖାଇବାର କାର୍ଯ୍ୟ ଗ୍ରାହକ ମୂଲ୍ୟ ସୂଚକାଙ୍କ (ସିପିଆଇ) ଦ୍ୱାରା କରାଯାଇଥାଏ। ସାମଗ୍ରୀ ଏବଂ ସେବା ପାଇଁ ଗ୍ରାହକ ଦେଉଥିବା ହାରାହାରି ମୂଲ୍ୟ ସିପିଆଇ ମାପ କରେ। ତେବେ ଅଶୋଧିତ ତୈଳ, ଦ୍ରବ୍ୟ ମୂଲ୍ୟ, ଉତ୍ପାଦିତ ଖର୍ଚ୍ଚ ବ୍ୟତୀତ ଅନ୍ୟାନ୍ୟ ଜିନିଷ ଅଛି, ଯାହା ଖୁଚୁରା ମୁଦ୍ରାସ୍ଫୀତି ହାର ନିର୍ଣ୍ଣୟ କରିବାରେ ଏକ ପ୍ରମୁଖ ଭୂମିକା ଗ୍ରହଣ କରିଥାଏ। ଏପରି ପ୍ରାୟ ୩୦୦ ଦ୍ରବ୍ୟ ଅଛି, ଯାହାର ଆଧାରରେ ଖୁଚୁରା ମୁଦ୍ରାସ୍ଫୀତି ହାର ସ୍ଥିର କରାଯାଇଥାଏ।