ନୂଆଦିଲ୍ଲୀ,୧୪।୮: ଖୁଚୁରା ମୁଦ୍ରାସ୍ଫୀତି ଭିତ୍ତିକ ଖାଉଟି ମୂଲ୍ୟସୂଚୀ (ସିପିଆଇ) ଜୁଲାଇ ମାସରେ ୬.୯୩% ସ୍ତରକୁ ବଢ଼ିଛି। ଏହା ଜୁନ୍ ମାସରେ ୬.୨୩% ସ୍ତରରେ ରହିଥିଲା। ଖାଦ୍ୟ ସାମଗ୍ରୀ ଦର ବଢିବା ଯୋଗୁ ଏଭଳି ସ୍ଥିତି ଉପୁଜିଥିବା ସରକାରୀ ଡାଟାରୁ ସାମ୍ନାକୁ ଆସିଛି। ଏହି ସମୟରେ ଖାଦ୍ୟ ବର୍ଗରେ ମୁଦ୍ରାସ୍ଫୀତି ୯.୬୨% ରହିଛି। ଜୁନ୍ରେ ଖୁଚୁରା ମୁଦ୍ରାସ୍ଫୀତି ୬.୦୯% ରହିବ ବୋଲି ସରକାର କହିଥିଲେ। ଏହାକୁ ପରବର୍ତ୍ତୀ ପର୍ଯ୍ୟାୟରେ ୬.୨୩%କୁ ବଢାଯାଇଥିଲା। ଯୋଗାଣରେ ବାଧା ଉପୁଜିବାରୁ ଜୁଲାଇ ପରଠାରୁ ଖାଦ୍ୟ ସାମଗ୍ରୀ ଦର ବଢିଚାଲିଛି। କରୋନା ଯୋଗୁ ଏଭଳି ଅସୁବିଧା ଦେଖାଯାଇଛି। ଜୁଲାଇର ଖୁଚୁରା ମୁଦ୍ରାସ୍ଫୀତି ହାର ରିଜର୍ଭ ବ୍ୟାଙ୍କର ଆକଳନଠାରୁ ଊର୍ଦ୍ଧ୍ୱରେ ରହିଛି। ଫେବୃୟାରୀ ପରଠାରୁ ରିଜର୍ଭ ବ୍ୟାଙ୍କର ଏହାର ରେପୋ ରେଟ୍ରେ ୧୧୫ ବେସିସ୍ ଏପଣ୍ଟ ହ୍ରାସ କରିଛି। ମୁଦ୍ରାସ୍ଫୀତିକୁ ନିୟନ୍ତ୍ରଣ କରିବାକୁ ଉପରେ କେନ୍ଦ୍ରୀୟ ବ୍ୟାଙ୍କ ଧ୍ୟାନ ରଖିଛି। ଲକ୍ଡାଉନ ଯୋଗୁ ଡାଟା ମିଳିବାରେ ସମସ୍ୟା ହେବାରୁ ଜାତୀୟ ପରିସଂଖ୍ୟାନ କାର୍ଯ୍ୟାଳୟ ଏପ୍ରିଲ ଏବଂ ମେ ମାସର ମୁଦ୍ରାସ୍ଫୀତି ଡାଟାକୁ ପ୍ରକାଶ କରି ନ ଥିଲା।