ଭୁବନେଶ୍ୱର,୧୩।୪ (ବ୍ୟୁରୋ): ଜାଲ ଦସ୍ତାବିଜ୍ ଜରିଆରେ ଚାକିରି ମାମଲାର ଦୀର୍ଘ ୧୧ବର୍ଷ ପରେ ବୁଧବାର ଭୁବନେଶ୍ୱର ଅତିରିକ୍ତ ସ୍ବତନ୍ତ୍ର ଭିଜିଲାନ୍ସ କୋର୍ଟରେ ରାୟ ପ୍ରକାଶ ପାଇଛି। ଏହି ମାମଲାରେ ଅଭିଯୁକ୍ତ ଥିବା ନୟାଗଡ଼ ଜିଲା ଓଡ଼ଗାଁ ଥାନା ଅନ୍ତର୍ଗତ ବାହାଡ଼ଝୋଲ ରେଗୁଲେଟେଡ୍ ମାର୍କେଟ କମିଟି (ଆର୍ଏମ୍ସି)ର ପୂର୍ବତନ ମାର୍କେଟ୍ ସରକାର ତଥା ଅବସରପ୍ରାପ୍ତ ପିଅନ ବଂଶୀଧର ମହାପାତ୍ରଙ୍କୁ ୩ ବର୍ଷ ଜେଲଦଣ୍ଡ ହୋଇଛି। ଏଥିସହ ଏହି ମାମଲାର ୩ଟି ଦଫାରେ ତାଙ୍କୁ ୨୦ ହଜାର ଲେଖାଏ ମୋଟ ୬୦ ହଜାର ଟଙ୍କାର ଅର୍ଥଦଣ୍ଡରେ ମଧ୍ୟ ଦଣ୍ଡିତ କରାଯାଇଛି। ଜରିମାନା ଅନାଦାୟ ଅଧିକ ୬ମାସ ଜେଲଦଣ୍ଡ ଭୋଗିବାକୁ ବିଚାରପତି ସସ୍ମିତା ପାଢ଼ୀ ତାଙ୍କ ରାୟରେ ଉଲ୍ଲେଖ କରିଛନ୍ତି। ତେବେ ଏହି ଦଣ୍ଡାଦେଶ ଆଧାରରେ ବଂଶୀଧରଙ୍କ ପେନ୍ସନ୍ ରାଶି କାଟିବାକୁ ବିଭାଗୀୟ କର୍ତ୍ତୃପକ୍ଷଙ୍କୁ ଅବଗତ କରାଯାଇଥିବା ଭିଜିଲାନ୍ସ ପକ୍ଷରୁ ସୂଚନା ଦିଆଯାଇଛି।
ମାମଲାର ବିବରଣୀ ଅନୁଯାୟୀ, ବଂଶୀଧର ଜାଲ ପ୍ରମାଣପତ୍ର ଦେଇ ‘ଆର୍ଏମ୍ସି’ରେ ଗତ ୧୯୭୫ ଅଗଷ୍ଟ ୨୦ରେ ଚାକିରି କରିଥିଲେ। ବଂଶୀଧରଙ୍କ ପ୍ରକୃତ ଜନ୍ମ ତାରିଖ ୧୯୫୫ ଅଗଷ୍ଟ ୧ ହୋଇଥିବାବେଳେ ସ୍କୁଲ ଲିଭିଂ ସାର୍ଟିଫିକେଟ୍ରେ ୧୯୫୧ ଏପ୍ରିଲ ୨୩ ଦର୍ଶାଇଥିଲେ। ଗୋପିପଡ଼ା ସର୍ଦ୍ଦାର ପଟେଲ ବିଦ୍ୟାପୀଠରେ ସେ ପାଠ ପଢ଼ି ନ ଥିଲେ ମଧ୍ୟ ସେଠାକାର ଜାଲ ଲିଭିଂ ସାର୍ଟିିଫିକେଟ୍ ଦାଖଲ କରିଥିଲେ। ଏନେଇ ଜଣେ ବ୍ୟକ୍ତି ୨୦୧୧ରେ ଆର୍ଏମ୍ସିର ଚେୟାରମ୍ୟାନ୍ ତଥା ନୟାଗଡ଼ ଉପଜିଲାପାଳଙ୍କ ନିକଟରେ ଅଭିଯୋଗ କରିଥିଲେ। ଏହାର ତଦନ୍ତ ପାଇଁ ତହସିଲଦାରଙ୍କୁ ଦାୟିତ୍ୱ ଦିଆଯାଇଥିଲା। ବଂଶୀଧର ଜାଲ ଦସ୍ତାବିଜ୍ ଦେଇ ଚାକିରି କରିଥିବା ତଦନ୍ତ ରିପୋର୍ଟରେ ତହସିଲଦାର ଦର୍ଶାଇଥିଲେ। ଏପରିକି ବାହାଡ଼ାଝୋଲ ଉଚ୍ଚ ପ୍ରାଥମିକ ବିଦ୍ୟାଳୟରେ ବଂଶୀଧର ପାଠ ପଢ଼ିଥିବା ମଧ୍ୟ ତଦନ୍ତବେଳେ ଜଣାପଡ଼ିଥିଲା। ଏ ସଂକ୍ରାନ୍ତରେ ଭୁବନେଶ୍ୱର ଭିଜିଲାନ୍ସ ଥାନାରେ ଉପ ଜିଲାପାଳ ଏତଲା ଦେଇଥିଲେ। ଭିଜିଲାନ୍ସ ଏକ ମାମଲା (ନଂ.୨୦/୨୦୧୧) ରୁଜୁ କରି ତଦନ୍ତ କରିଥିଲା। ଏହାପରେ ସ୍ବାସ୍ଥ୍ୟଗତ କାରଣ ଦର୍ଶାଇ ବଂଶୀଧର ଚାକିରିରୁ ଅବସର ନେଇଥିଲେ। ୨୦୧୨ରେ ଭିଜିଲାନ୍ସ ଚାର୍ଜଶିଟ୍ ଦାଖଲ କରିବା ପରେ କୋର୍ଟରେ ଶୁଣାଣି ପ୍ରକ୍ରିୟା ଆରମ୍ଭ ହୋଇଥିଲା। ୬ଜଣଙ୍କ ସାକ୍ଷ୍ୟ ଓ ଅନ୍ୟ ଦସ୍ତାବିଜ ଆଧାରରେ କୋର୍ଟ ରାୟ ପ୍ରକାଶ କରିଛନ୍ତି। ସ୍ବତନ୍ତ୍ର ସରକାରୀ ଓକିଲ କାମଦେବ ତ୍ରିପାଠୀ ମାମଲା ପରିଚାଳନା କରିଥିଲେ।