ବାରିପଦା(ନୀଳାଦ୍ରି ବିହାରୀ ଦଣ୍ଡପାଟ)/ଠାକୁରମୁଣ୍ଡା(ତାରାକାନ୍ତ ପଟ୍ଟନାୟକ)୪ା୭: ଶିମିଳିପାଳ ଅଭୟାରଣ୍ୟରେ ଶିକାରୀ ଗୁଳିରେ ଦୁଇ ବନ କର୍ମଚାରୀ ନିହତ ହେବା ଘଟଣାରେ ମୟୂରଭଞ୍ଜ ଜିଲା ପୋଲିସ ପକ୍ଷରୁ ପ୍ରତିଦିନ ସର୍ଚ୍ଚ ଓ କୋମ୍ବିଂ ଅପରେଶନ ଜାରି ରହିଛି। ବନ କର୍ମଚାରୀ ଓ ପୋଲିସକୁ ନେଇ ଏକ ସ୍ବତନ୍ତ୍ର ଟିମ୍ ଗଠନ କରାଯାଇ ମାମଲାରେ ଜଡିତ ଅପରାଧୀଙ୍କୁ ଠାବ କରିବା ସହ ଦେଶୀ ବନ୍ଧୁକ ଜବତ କରାଯାଇ କାର୍ଯ୍ୟାନୁଷ୍ଠାନ ଗ୍ରହଣ କରାଯାଉଛି। ବେଆଇନ ଅସ୍ତ୍ରଶସ୍ତ୍ର ରଖୁଥିବା ବ୍ୟକ୍ତିମାନଙ୍କୁ ପୋଲିସ ପକ୍ଷରୁ ସତର୍କ ସୂଚନା ଦିଆଯାଇଛି। ଶିମିଳିପାଳ ସଂଲଗ୍ନ ଓ ନିଷିଦ୍ଧାଞ୍ଚଳରେ ରହୁଥିବା ଲୋକେ ଜୁଲାଇ ୩୦ ସୁଦ୍ଧା ବନ୍ଧୁକ ଓ କାରଖାନା ଯନ୍ତ୍ରାଂଶ ସ୍ବଇଚ୍ଛାରେ ପୋଲିସ ନିକଟରେ ଜମା ଦେଇ ପୁରସ୍କୃତ ହେବାକୁ ଏସ୍ପି ବି.ଗଙ୍ଗାଧର କହିଛନ୍ତି। ଅନ୍ୟଥା ଗିରଫ ପୂର୍ବକ ଆଇନ ଅନୁଯାୟୀ କଡ଼ା କାର୍ଯ୍ୟାନୁଷ୍ଠାନ ଗ୍ରହଣ କରାଯିବ ବୋଲି ସୋମବାର ପୋଲିସ କାର୍ଯ୍ୟାଳୟ ସମ୍ମିଳନୀ କକ୍ଷରେ ଆୟୋଜିତ ଖବରଦାତା ସମ୍ମିଳନୀରେ ଏସ୍ପି ପ୍ରକାଶ କରିଛନ୍ତି ା
ସୋମବାର ଜିଲା ପୋଲିସର ସ୍ବତନ୍ତ୍ର ଟିମ୍ ଶିମିଳିପାଳ ନିଷିଦ୍ଧାଞ୍ଚଳରେ ଚଢ଼ାଉ କରି ଏକ ଦେଶୀ ବନ୍ଧୁକ କାରଖାନା ଠାବ କରିବା ସହ ଅଭିଯୁକ୍ତଙ୍କୁୁ କୋର୍ଟଚାଲାଣ କରିଛି। ଅଭିଯୁକ୍ତ ଜଣକ ହେଲେ ମହୁଲଡିହା ଥାନା ଅଧୀନ ଭେଜଡିହା ଗ୍ରାମର ଜିତୁ ଲୋହାର(୨୫)। ସେଠାରୁ ଗୋଟିଏ ଦେଶୀ ବନ୍ଧୁକ, ୪ଟି ଷ୍ଟିଲ ବ୍ୟାରେଲ, ୨ଟି ସକେଟ, ଗୋଟିଏ ୱେଲ୍ଡିଂ ମେଶିନ ଓ ଏକ କୁରାଢ଼ି ସମେତ ବ୍ୟବହୃତ ସାମଗ୍ରୀ ଜବତ ହୋଇଛି। ଏ ସଂକ୍ରାନ୍ତରେ ପୋଲିସ ଆମର୍ସ ଆକ୍ଟ ଅନୁଯାୟୀ ଏକ ମାମଲା(ନଂ.୩୯/୨୩)ରୁଜୁ କରି ତଦନ୍ତ ଜାରି ରଖିଛି। ସେହିପରି ମହୁଲଡିହା ଥାନା ପାତ୍ରପଡା ଗ୍ରାମରେ ସ୍ବତନ୍ତ୍ର ଟିମ୍ ଚଢ଼ାଉ କରି ଗୋଟିଏ ବଜ୍ରକାପ୍ତା ଚମଡ଼ା ସହିତ ୧୧୦ଟି କାତି ଜବତ କରିଛି। ଏହି ଘଟଣାର ଅଭିଯୁକ୍ତ ଫେରାର ଥିବା ବେଳେ ପୋଲିସ ୱାଇଲ୍ଡ ଲାଇଫ ପ୍ରୋଟେକ୍ସନ ଆକ୍ଟ ଅନୁଯାୟୀ ଏକ ମାମଲା (ନଂ.୪୯/୨୩)ରୁଜୁ କରି ତଦନ୍ତ ଜାରି ରଖିଛି।