ଧର୍(ମଧ୍ୟପ୍ରଦେଶ), ୧୭ା୪ : ମଧ୍ୟପ୍ରଦେଶ ଧର୍ ଜିଲାର କମଲେଶ ପଟିଦାର(୩୫) ୨ ବର୍ଷ ପୂର୍ବେ କୋଭିଡ୍-୧୯ରେ ସଂକ୍ରମିତ ହୋଇ ଗୁଜରାଟର ବଡୋଦରସ୍ଥିତ ଏକ ହସ୍ପିଟାଲରେ ଭର୍ତ୍ତି ହୋଇଥିଲେ। ଡାକ୍ତର ତାଙ୍କୁ ମୃତ ଘୋଷଣା କରିବା ପରେ ପରିବାର ଲୋକେ ତାଙ୍କର ଶେଷକୃତ୍ୟ ସମ୍ପନ୍ନ କରିଥିଲେ। ଶନିବାର ସକାଳ ୬ଟାରେ ସେ କରୋଡକାଲା ଗ୍ରାମରେ ଥିବା ତାଙ୍କ ମାଇଁ ଘରେ ପହଞ୍ଚତ୍ କବାଟ ବାଡ଼େଇବାରୁ ସମସ୍ତେ ଆଶ୍ଚର୍ଯ୍ୟ ହୋଇଯାଇଥିଲେ। ଶେଷକୃତ୍ୟ ସମ୍ପନ୍ନର ଦୁଇବର୍ଷ ପରେ କମଲେଶ ଘରକୁ ଫେରିଥିବା ତାଙ୍କ ପରିବାର ଲୋକେ କହିଛନ୍ତି। କୋଭିଡ୍ ଦ୍ୱିତୀୟ ଲହର ବେଳେ ସେ ଆକ୍ରାନ୍ତ ହୋଇଥିଲେ। ହସ୍ପିଟାଲ ମୃତ ଘୋଷଣା କରିବା ପରେ ମୃତଦେହ ପରିବାରକୁ ହସ୍ତାନ୍ତର କରିଥିଲା ଓ ପରିବାର ଲୋକେ ଅନ୍ତିମ ସଂସ୍କାର କରିଥିଲେ ବୋଲି କମଲେଶଙ୍କ ସମ୍ପର୍କୀୟ ଭାଇ ମୁକେଶ ପଟିଦାର ଗଣମାଧ୍ୟମକୁ କହିଛନ୍ତି। ତେବେ କମଲେଶ ଦୁଇବର୍ଷ ହେଲା କେଉଁଠି ଥିଲେ, ତାହା କହିପାରି ନାହାନ୍ତି। କୋଭିଡ୍ରେ ପ୍ରାଣ ହରାଉଥିବା ରୋଗୀଙ୍କ ମୃତଦେହକୁ ଜରିରେ ଗୁଡ଼ାଇ ହସ୍ତାନ୍ତର କରାଯାଉଥିବାରୁ କୌଣସି ଭୁଲ୍ ରୋଗୀଙ୍କ ମୃତଦେହକୁ କମଲେଶଙ୍କ ପରିବାରକୁ ହସ୍ତାନ୍ତର କରାଯାଇଥିବା ସନ୍ଦେହ କରାଯାଉଛି। ଧର୍ ଜିଲା ପ୍ରଶାସନ ଘଟଣାର ତଦନ୍ତ ଆରମ୍ଭ କରିଛି। କମଲେଶଙ୍କ ବୟାନ ପରେ ସବୁକିଛି ସ୍ପଷ୍ଟ ହେବ ବୋଲି କୁହାଯାଉଛି। ୨୦୨୦ରେ ପଶ୍ଚିମବଙ୍ଗର ଉତ୍ତର ୨୪ ପ୍ରଗଣା ଜିଲାରେ ଅନୁରୂପ ଏକ ଘଟଣା ଘଟିଥିଲା। ହସ୍ପିଟାଲ କର୍ମଚାରୀଙ୍କ ଭୁଲ୍ ଯୋଗୁ ଜଣେ କୋଭିଡ୍ ରୋଗୀଙ୍କ ମୃତଦେହକୁ ଅନ୍ୟ ଜଣକ ପରିବାରକୁ ହସ୍ତାନ୍ତର କରାଯାଇଥିଲା ଓ ସେମାନେ ତାଙ୍କର ଶେଷକୃତ୍ୟ କରିଥିଲେ।