ମାଲକାନଗିରି, ୨୮ା୯(ଦୁର୍ଯ୍ୟୋଧନ ପାତ୍ର): ମାଲକାନଗିରି ଜିଲା ଲୁଗେଲ ପଞ୍ଚାୟତର ଏମପିଭି-୪୭ ଗ୍ରାମର ସୁନିତା ମଣ୍ଡଳ ନାମକ ମହିଳା ନିଜର ଜାତିଗତ ପ୍ରମାଣପତ୍ର ପାଇଁ ରାଜସ୍ବ ନିରୀକ୍ଷକଙ୍କ ଦ୍ୱାରସ୍ଥ ହୋଇଥିଲେ। ଏହି ସମୟରେ ରାଜସ୍ବ ନିରୀକ୍ଷକ ତାଙ୍କୁ ଧର୍ମ ପରିବର୍ତ୍ତନ କଲେ ସବୁ କାମ ଯଥା ଶୀଘ୍ର ହୋଇଯିବ ବୋଲି କହିଥିଲେ ବୋଲି ମହିଳା ଜଣକ ଅଭିଯୋଗ କରିଛନ୍ତି। ଖବରରୁ ଜଣାପଡିଛି ସମ୍ପୃକ୍ତା ମହିଳା ସୁନିତା ନର୍ସିଂ ପାଠ ପଢିଥିବା ବେଳେ ଚାକିରି ନିମନ୍ତେ ଜାତିଗତ ପ୍ରମାଣପତ୍ରର ଆବଶ୍ୟକତା ଥିବାରୁ ସେ ଅଗଷ୍ଟ ୧୨ ତାରିଖରେ ଜାତିଗତ ପ୍ରମାଣପତ୍ର ପାଇଁ କାଲିମେଳା ତହସିଲରେ ଆବେଦନ କରିଥିଲେ। ତେବେ ଏହି ଜାତିଗତ ପ୍ରମାଣ ପତ୍ର ଆସିବାରେ ବିଳମ୍ବ ହେବାରୁ ମାଲାଭାରମ ରାଜସ୍ବ ନିରୀକ୍ଷକ ଲବେନ ସୋରେନଙ୍କ ନିକଟକୁ ସେ ଯାଇଥିଲେ। ସେଠାରେ ସୋରେନ ସୁନିତାଙ୍କୁ ତୁମେ କେଉଁ ଧର୍ମର ବୋଲି ପଚାରିଥିଲେ। ସୁନିତା ହିନ୍ଦୁ ଧର୍ମର ଏବଂ ସେ କୃଷ୍ଣ ଭକ୍ତ ବୋଲି ଉତ୍ତର ଦେଇଥିଲେ। ପରେ ସୋରେନ ତାଙ୍କୁ ନିଜର ଧର୍ମ ପରିବର୍ତ୍ତନ କରି ନିର୍ଦ୍ଦିଷ୍ଟ ଏକ ଧର୍ମକୁ ଗ୍ରହଣ କର, ସବୁ କାମ ଶୀଘ୍ର ହୋଇଯିବ ବୋଲି କହିଥିଲେ। ସୋରେନଙ୍କ ଏହି କଥାକୁ ସୁନିତା ନ ମାନିବାରୁ ତାଙ୍କର ବର୍ତ୍ତମାନ ଯାଏ ଜାତିଗତ ପ୍ରମାଣପତ୍ର ହୋଇ ପାରୁ ନ ଥିବା ସେ ଅଭିଯୋଗ କରିଛନ୍ତି। ଏନେଇ ସେ ଜିଲାପାଳଙ୍କ ଦ୍ୱାରସ୍ଥ ହୋଇ ଲିଖିତ ଅଭିଯୋଗ କରିଛନ୍ତି। ନ୍ୟାୟ ନ ମିଳିଲେ ସେ ଆତ୍ମହତ୍ୟା କରିବା ଛଡା ଆଉ କିଛି ଉପାୟ ତାଙ୍କ ପାଇଁ ନାହିଁ ବୋଲି ପ୍ରକାଶ କରିଛନ୍ତି। ଅନ୍ୟପକ୍ଷରେ ସମ୍ପୃକ୍ତ ରାଜସ୍ବ ନିରୀକ୍ଷକ ସୋରେନଙ୍କୁ ପଚାରିବାରୁ ସେ ଏହି ଅଭିଯୋଗ ସମ୍ପୂର୍ଣ୍ଣ ମିଥ୍ୟାବୋଲି କହିଛନ୍ତି। ତାଙ୍କୁ ମୁଁ କୌଣସି ଖରାପ ବ୍ୟବହାର କରିନାହିଁ। ମହିଳାଙ୍କ ସହ ଆସିଥିବା ତାଙ୍କ ଭାଇ ମୋତେ ଧମକ ଦେଇଥିବା ସୋରେନ ପାଲଟା ଅଭିଯୋଗ କରିଛନ୍ତି।
