କେନ୍ଦୁଝର,୫ା୭(ନରେଶ ଚନ୍ଦ୍ର ପଟ୍ଟନାୟକ): ବାଂଶପାଳ ବ୍ଲକ ଅଡାଳମୁଣ୍ଡା ସାହିରେ ଥିବା ସରକାରୀ ପ୍ରାଥମିକ ବିଦ୍ୟାଳୟରେ ନିମ୍ନମାନର ଚାଉଳରେ ମଧ୍ୟାହ୍ନଭୋଜନ ପିଲାମାନଙ୍କୁ ଖାଇବାକୁ ଦିଆଯାଉଥିବାରୁ ଅଭିଭାବକମାନେ ଅସନ୍ତୋଷ ବ୍ୟକ୍ତ କରିଛନ୍ତି। ଏନେଇ ମଙ୍ଗଳବାର ସ୍ଥାନୀୟ ଅଭିଭାବକମାନେ ବିଦ୍ୟାଳୟ ଯାଇ ପ୍ରଧାନଶିକ୍ଷୟିତ୍ରୀଙ୍କୁ ପଚାରି ବୁଝିବା ସହ ଚାଉଳର ମାନ ଯାଞ୍ଚ କରି ଦେଖିଥିଲେ। ଚାଉଳର ମାନ ଠିକ ନ ଥିବା ଦେଖିବା ସହ ପିଲାଙ୍କୁ ଏଭଳି ଚାଉଳର ଭାତ ଖାଇବାକୁ କାହିଁକି ଦେଉଛନ୍ତି ବୋଲି ପ୍ରଶ୍ନ କରିଥିଲେ। ୨୦୦୯ରେ ପ୍ରତିଷ୍ଠିତ ଏହି ବିଦ୍ୟାଳୟରେ ସ୍ଥାନୀୟ ମୁଣ୍ଡାସାହିର ପାଖାପାଖି ୧ମରୁ ୫ମ ଯାଏ ୭୦ ଜଣ ପିଲା ପଢୁଛନ୍ତି। ୩ ଜଣ ଶିକ୍ଷକ ପାଠ ପଢ଼ାଉଛନ୍ତି। ତେବେ ଶିକ୍ଷୟିତ୍ରୀ/ ଶିକ୍ଷକମାନେ ବିଳମ୍ବରେ ଆସୁଥିବା ଏବଂ ପିଲାମାନଙ୍କୁ ନିମ୍ନମାନର ଖାଦ୍ୟ ଦିଆଯାଉଥିବା ନେଇ ଅଭିଯୋଗ କରିଛନ୍ତି। ଏନେଇ ପ୍ରତିବାଦ କଲେ ବିଦ୍ୟାଳୟ ପରିସରରୁ ପାଣି ଦିଆଯିବ ନାହିଁ ବୋଲି ସ୍ଥାନୀୟ ଅଭିଭାବକମାନଙ୍କୁ ଭୟ ଦେଖାଉଥିବାରୁ ମୁହଁ ଖୋଲୁ ନ ଥିବା ବେଳେ ଗତକାଲି ଅଭିଯୋଗ କରିଥିଲେ। ଏହାର ଉଚ୍ଚସ୍ତରୀୟ ତଦନ୍ତ ପାଇଁ ଦାବି କରିଛନ୍ତି। ଏନେଇ ପ୍ରଧାନଶିକ୍ଷୟିତ୍ରୀ ରତ୍ନବାଳା ପାତ୍ର କହିଛନ୍ତି, ଏଭଳି ଅଭିଯୋଗ ମିଥ୍ୟା। ଚାଉଳ ଦୁଇ କିମି ଦୂରରୁ ଅଣାଯାଏ।ଗତକାଲି ଚାଉଳ ସରିଯିବାରୁ ସ୍ଥାନୀୟ ଅଙ୍ଗନଓ୍ବାଡି କେନ୍ଦ୍ରରୁ ଚାଉଳ ଆଣି ପିଲାଙ୍କୁ ଖାଇବାକୁ ଦିଆଯାଇଥିଲା। ଚାଉଳରେ ପୋକ ଲାଗିନାହିଁ। ଏନେଇ ସେ ବ୍ଲକ ଶିକ୍ଷା ଅଧିକାରୀଙ୍କୁ ଜଣାଇଥିବା କହିଛନ୍ତି।
