ତେନ୍ତୁଳିଖୁଣ୍ଟି,୨୮।୮(ଡି.ଏନ୍.ଏ.): ନବରଙ୍ଗପୁର ଜିଲା ତେନ୍ତୁଳିଖୁଣ୍ଟି ବ୍ଲକ ପୁଜାରୀଗୁଡ଼ା ପଞ୍ଚାୟତରେ ମୃତ ବ୍ୟକ୍ତିଙ୍କ ନାମରେ ରାଶନ କାର୍ଡରେ ଚାଉଳ ଉଠାଯାଉଛି। ମାସେ ନୁହେଁ କି ବର୍ଷେ ନୁହେଁ ବର୍ଷ ବର୍ଷର ଚାଉଳ ଉଠିଛି। ମୃତ ହିତାଧିକାରୀଙ୍କୁ ଜୀବିତ ଦର୍ଶାଇ ସରକାରଙ୍କ କରୋନା ସହାୟତା ପ୍ରଦାନକୁ ନେଇ ପଞ୍ଚାୟତରେ ରାଜନୀତି ସରଗରମ ହେବାରେ ଲାଗିଛି।
ଯୁବଗୋଷ୍ଠୀଙ୍କ ଅନୁସନ୍ଧାନରୁ ଶଶି ଜାନୀ(କାର୍ଡ ନଂ ୨୩୦୯୧୪୧୦୦୦୪)ଙ୍କ ୨୦୨୧ ଜୁଲାଇ ୬ ରେ ମୃତ୍ୟୁ ଘଟିଥିବା ବେଳେ ଭାନୁମତୀ ବିଷୋୟୀ(କାର୍ଡ ନଂ ୨୩୦୯୧୪୧୦୫୪୯)ଙ୍କ ୨୦୧୯ ଡିସେମ୍ବର ୧୯ ରେ ମୃତ୍ୟୁ ଘଟିଥିବା ଜଣାପଡ଼ିଛି। ବୃନ୍ଦାବତୀ ହରିଜନ(କାର୍ଡ ନଂ.୨୩୦୯୧୪୧୦୧୯୫), କୌଶଲ୍ୟା ଡମ୍ବ(କାର୍ଡ ନଂ ୨୩୦୯୧୪୧୦୫୪୯)ଙ୍କ ମଧ୍ୟ ମୃତ୍ୟୁ ଘଟିଛି। ପରିବାର ଲୋକେ ପଞ୍ଚାୟତକୁ ଯାଇ ଯୋଗାଣ ସହାୟକଙ୍କୁ ପଚାରିବା ଓ ପୂଜାରିଗୁଡାର ଯୁବଗୋଷ୍ଠୀ ମିଶି ଆଲୋଚନା ସମୟରେ ମୃତକଙ୍କ ନାମରେ ଚାଉଳ ଓ ଟଙ୍କା ଉଠୁଥିବା ପଦାକୁ ଆସିଥିଲା। ପଞ୍ଚାୟତରେ ଏଭଳି ଆଉ କେତେ କାର୍ଡ ଚାଲିଥିବ ବୋଲି ସନ୍ଦେହରେ ଯାଞ୍ଚ ସମୟରେ କରିବା ସମୟରେ ଆଳୁ ଖୋଳୁଖୋଳୁ ମହାଦେବ ବାହାରିବା ଭଳିି ରୋଚକ ତଥ୍ୟ ସାମ୍ନାକୁ ଆସିଛି। ଖୋଦ୍ ବ୍ଲକ ବିପ୍ପଣୀ ନିରୀକ୍ଷକ ବ୍ଲକକୁ ଆସିବା ପରେ କେତେଜଣଙ୍କ ମୃତ୍ୟୁ ଘଟିଛି ତାଲିକା ମାଗିଥିଲେ। ଏହାର ତାଲିକା ଆସି ନ ଥିବା ନେଇ ସତ ସେ ମାନିଯାଇଥିଲେ।
ସୂଚନାଯୋଗ୍ୟ, ବ୍ଲକରେ ଅଁଳାଭଟା ପଞ୍ଚାୟତ ଚାଉଳ ଦୁର୍ନୀତିର ଟେର ପ୍ରଶାସନ ଓ ଭିଜିଲାନ୍ସ ଏ ପର୍ଯ୍ୟନ୍ତ ପାଇ ନ ଥିବା ବେଳେ ଏବେ ଭୁତ ନାମରେ ଚାଉଳ ଉଠିବା ପ୍ରଶାସନ ପାଇଁ ମୁଣ୍ଡବଥାର କାରଣ ସାଜିଛି। ଏହାକୁ ନେଇ ବିଭିନ୍ନ ଗଣମାଧ୍ୟମରେ ଖବର ପ୍ରକାଶ ପାଇବା ପରେ ପୁଜାରିଗୁଡ଼ାର ବରିଷ୍ଠ ନାଗରିକଙ୍କୁ ନେଇ ଶନିବାର ବୈଠକ ବସିଥିଲା। ଏଥିରେ ସରପଞ୍ଚଙ୍କୁ ବରିଷ୍ଠ ନାଗରିକ ମାନେ କଣ ପଦକ୍ଷେପ ନେଇଛ ବୋଲି ପଚାରିଥିଲେ। ସରପଞ୍ଚ କାର୍ଯ୍ୟାନୁଷ୍ଠାନ ନେବାକୁ ସୁପାରଶ କରିବା ସହ ରିକଭରି ପାଇଁ ବ୍ଲକ ଅଫିସକୁ ଅବଗତ କରୁଥିବା ସୂଚନା ଦେଇଥିଲେ। ବୈଠକରେ ନବୀନ କର୍କରା, ସୁନିଲ ସିଂ, ସୁବାସ କର୍କରା, ଗଣେଶ ବାଘ, ବୁଲୁ ସୁନା, ବନମାଳି ଜାନୀ, ଚଇତୁ ଜାନୀଙ୍କ ସମେତ ଶତାଧିକ ବ୍ୟକ୍ତି ଉପସ୍ଥିତ ଥିଲେ। ଏ ବିଷୟରେ ପୁଜାରୀଗୁଡ଼ା ସରପଞ୍ଚଙ୍କ ସହ ଯୋଗାଯୋଗ କରିବାରୁ ପଞ୍ଚାୟତରେ ବରିଷ୍ଠ ନାଗରିକଙ୍କୁ ନେଇ ବୈଠକ ହୋଇଥିବା ସୂଚନା ଦେଇଥିଲେ। ଏଥିରେ ଯୋଗାଣ ସହାୟକ ବିଷୟରେ ଆଲୋଚନା କରିଥିବା କହିଛନ୍ତି। ଅନ୍ୟପକ୍ଷରେ ପଞ୍ଚାୟତବାସୀ ତୁରନ୍ତ ଯୋଗାଣ ସହାୟକଙ୍କ ବରୋଧରେ ଦୃଢ କାର୍ଯ୍ୟାନୁଷ୍ଠାନ ନେବାକୁ ଦାବି କରିଛନ୍ତି।