ବମ୍ବେ: ଦୀର୍ଘଦିନରୁ ଅଭିନେତା ଅଲି ଫଜଲଙ୍କୁ ଡେଟ୍ କରି ଆସୁଛନ୍ତି ବଲିଉଡ୍ ଅଭିନେତ୍ରୀ ଋଚା ଚଡ୍ଢା। ସମ୍ପର୍କକୁ ଗୋଟିଏ ପାଦ ଆଗକୁ ବଢ଼ାଇ ବିବାହ ଯାଏ ନେବାକୁ ଉଭୟ ଚାହୁଁଥିଲେ ହେଁ ଭାଗ୍ୟ ସାଥ୍ ଦେଉନାହିଁ। କେତେବେଳେ ନିଜର ବ୍ୟସ୍ତତା ତ କେତେବେଳେ ମହାମାରୀକୁ ନେଇ ବିବାହ କଥା ଟଳି ଯାଉଛି। ଚଳିତ ବର୍ଷ ଏପ୍ରିଲରେ ସେମାନେ ବିବାହ କରିବେ ବୋଲି ଶୁଣାଯାଉଥିଲା। ହେଲେ କରୋନା ସଂକ୍ରମଣ ବଢ଼ିବାରୁ ସେମାନେ ବିବାହ ଟାଳିଦେଇଥିଲେ। ଏବେ କିନ୍ତୁ ସବୁକିଛି ସାମାନ୍ୟ ହେଉଥିବା ନଜର ଆସୁଥିବାରୁ ଋଚା-ଅଲି ବିବାହ କରିବାକୁ ନିଶ୍ଚିତ କରିଛନ୍ତି। ଅଲି ନିଜେ ଏକ ସାକ୍ଷାତକାରରେ ଏହା ସ୍ପଷ୍ଟ କରିଛନ୍ତି।
ଦୁହେଁ ୨୦୨୨ ଫେବୃଆରୀ ଅଥବା ମାର୍ଚ୍ଚରେ ବିବାହ କରିବାକୁ ଯୋଜନା କରୁଛନ୍ତି। ନୂଆ ବର୍ଷ ନୂଆ ସମ୍ଭାବନା ଆଣି ଆସିବ ବୋଲି ଆଶା କରୁଥିବା ଅଲି କହିଛନ୍ତି। ସେହିଭଳି ଋଚା କହିଛନ୍ତି, ମୋତେ ଲାଗୁଛି କୋଭିଡ ଲହରର ଆମ ଯୋଜନା ସହ କିଛି ସମ୍ବନ୍ଧ ରହିଛି। ସବୁଥର ଆମେ କିଛି ପ୍ଲାନ କରୁ ହେଲେ ତାହା ହୁଏ ନାହିଁ। ମୁଁ କିନ୍ତୁ ବିବାହ ଧୁମ୍ଧାମରେ ହେଉ ବୋଲି ଚାହେଁ। କାରଣ ମୋତେ ପାର୍ଟି ଦରକାର। ମୋତେ ଲୋକ କ’ଣ କହିବେ ତାର ପରବାୟ ନାହିଁ। ମୁଁ ଭଲପାଇବାର ଉତ୍ସବ ପାଳିବାକୁ ଚାହେଁ।