ନାଇରୋବି, ୪ା୧: ସାରା ବିଶ୍ୱରେ ପରିଚିତ କେନିଆର ଜୀବାଶ୍ମ ବିଜ୍ଞାନୀ ତଥା ସଂରକ୍ଷଣବାଦୀ ରିଚାର୍ଡ ଲିକିଙ୍କର ପରଲୋକ ହୋଇଛି। ତାଙ୍କୁ ୭୭ ବର୍ଷ ବୟସ ହୋଇଥିଲା। ଏ ନେଇ କେନିଆ ରାଷ୍ଟ୍ରପତି ଉହୁରୁ କେନ୍ୟାଟ୍ଟା ରବିବାର ସୂଚନା ଦେଇଛନ୍ତି। ସେ ଚର୍ମ କ୍ୟାନ୍ସର, କିଡ୍ନୀ ଏବଂ ଯକୃତ ଜନିତ ରୋଗରେ ପୀଡ଼ିତ ଥିଲେ। ଓ୍ବାଇଲ୍ଡ ଲାଇଫ୍ ଡିରେକ୍ଟ ସଂରକ୍ଷଣ ଗ୍ରୁପ୍ର ପ୍ରତିଷ୍ଠାତା ରିଚାର୍ଡଙ୍କ ମୃତ୍ୟୁରେ ଉକ୍ତ ଗ୍ରୁପ୍ର ସିଇଓ ଶୋକ ବ୍ୟକ୍ତ କରିଛନ୍ତି। ରିଚାର୍ଡ ଜୀବାଶ୍ମ ବିଜ୍ଞାନୀ ଲୁଇସ୍ ଏବଂ ମ୍ୟାରୀ ଲିକିଙ୍କ ପୁଅ। ଦୀର୍ଘ ବର୍ଷ ଧରି ସେ କେନିଆ ଜାତୀୟ ସଂଗ୍ରହାଳୟର ନିର୍ଦ୍ଦେଶକ ରହିବା ସହ ୨ ଥର କେନିଆ ଓ୍ବାଇଲ୍ଡ ଲାଇଫ୍ ସର୍ଭିସ୍ ବୋର୍ଡର ଅଧ୍ୟକ୍ଷ ରହିଥିଲେ। ଆଫ୍ରିକୀୟ ହାତୀ ସଂଖ୍ୟା ହ୍ରାସକୁ ରୋକିବା ପାଇଁ ସେ ବେଆଇନ ଭାବେ ହେଉଥିବା ହାତୀ ଦାନ୍ତ କାରବାର ବିରୋଧୀ ଅଭିଯାନର ନେତୃତ୍ୱ ନେଇ ଚର୍ଚ୍ଚାକୁ ଆସିଥିଲେ। ୧୯୮୯ରେ ସେ ୧୨ ଟନ୍ ହାତୀ ଦାନ୍ତକୁ ଜାଳି ରାତାରାତି ବିପୁଳ ପରିଚିତି ହାସଲ କରିଥିଲେ। ଥରେ ହାତୀଠାରୁ ଦାନ୍ତ ଅଲଗା ହେବା ପରେ ଏହା ମୂଲ୍ୟହୀନ ହୋଇଥାଏ ବୋଲି ସେ ବାର୍ତ୍ତା ଦେଇଥିଲେ। ମୃତ୍ୟୁବେଳକୁ ସେ ଆମେରିକାର ଷ୍ଟୋନି ବ୍ରୁକ୍ ୟୁନିଭର୍ସିଟିରେ ତୁର୍କାନା ବେସିନ୍ ଇନଷ୍ଟିଚ୍ୟୁଟ୍ର ଚେୟାରମ୍ୟାନ ଥିଲେ।