ନୂଆଦିଲ୍ଲୀ,୨।୩ (ପି.ଟି.): ଚଳିତ ଟେଷ୍ଟ ସିରିଜରେ ଇଂଲଣ୍ଡ କ୍ରମାଗତ ଦୁଇଟି ଟେଷ୍ଟରେ ପରାସ୍ତ ହେବା ପରେ ଭାରତୀୟ ପିଚ୍କୁ ନେଇ ଚର୍ଚ୍ଚା ଚାଲିଛି। ଇଂଲଣ୍ଡର କେତେକ ପୂର୍ବତନ ଓ ଏବେକାର କ୍ରିକେଟ ଏ ନେଇ ବିଳାପ କରୁଛନ୍ତି। ତେବେ ଏହାକୁ ଓ୍ବେଷ୍ଟଇଣ୍ଡିଜ୍ କ୍ରିକେଟ ଲିଜେଣ୍ଡ ଭିଭିଆନ ରିଚାଡର୍ସ ନାପସନ୍ଦ କରିବା ସହ କଡ଼ା ସମାଲୋଚନା କରିଛନ୍ତି। ପିଚ୍କୁ ନେଇ ଚାଲିଥିବା ବିଳାପ ତାଙ୍କୁ ଦ୍ୱନ୍ଦ୍ୱରେ ପକାଇଛି ବୋଲି ସେ କହିଛନ୍ତି।
ଇଂଲଣ୍ଡର ପୂର୍ବତନ କ୍ରିକେଟର ମାଇକେଲ ଭନ ଓ ବ୍ରିଟେନର ଗଣମାଧ୍ୟମଗୁଡ଼ିକ ମୋଟେରାର ଟର୍ନିଂ ଟ୍ରାକ୍କୁ ନେଇ କଡ଼ା ସମାଲୋଚନା କରିଛନ୍ତି। ଏକଦା ଇଂଲଣ୍ଡରେ ସିମିଂ ଟ୍ରାକ ବନା ଯାଉଥିଲା ଓ ଗୁଡ୍ ଲେନ୍ଥ ସ୍ପଟ୍ ହିଁ ବଲ୍ ଜମ୍ପ କରୁଥିଲା। ସେତେବେଳେ ବ୍ୟାଟ୍ସମ୍ୟାନମାନେ ଏହି ଟ୍ରାକରେ ସମସ୍ୟାର ସମ୍ମୁଖୀନ ହେଉଥିଲେ। ଏ ନେଇ କେବେ ବି କୌଣସି ଦଳ ଅଭିଯୋଗ କରି ନ ଥିଲେ। ଭାରତରେ ଖେଳିବାକୁ ହେଲେ ସ୍ପିନ୍କୁ ଭଲଭାବେ ସାମ୍ନା କରିବାରୁ କଳା ଶିକ୍ଷା କରିବାକୁ ହୋଇଥାଏ। କିନ୍ତୁ ଇଂଲଣ୍ଡ ଏହି ଗସ୍ତରେ ସ୍ପିନ୍କୁ ଖେଳିବା ନେଇ ହୋମ୍ଓ୍ବାର୍କ କରିନାହିଁ ବୋଲି ରିଚାଡର୍ସ କହିଛନ୍ତି।
ଟେଷ୍ଟ ଫର୍ମାଟ୍ରେ ଜଣେ ଖେଳାଳି କଡ଼ା ପରୀକ୍ଷାର ସମ୍ମୁଖୀନ ହୋଇଥାଏ। ତେଣୁ ସ୍ପିନ୍କୁ ଖେଳିବା ମଧ୍ୟ ଏକ ବଡ଼ ପରୀକ୍ଷା। ଭାରତ ଗସ୍ତରେ ଗଲେ ସ୍ପିନ୍ ଖେଳିବାକୁ ହୋଇଥାଏ। ତେଣୁ ଏଥିପାଇଁ ପ୍ରସ୍ତୁତିର ଆବଶ୍ୟକତା ରହିଥାଏ। ଇଂଲଣ୍ଡ ପ୍ରଥମ ଟେଷ୍ଟରେ ବିଜୟୀ ହୋଇଥିଲା। ତେବେ ଏହାପରେ ଇଂଲଣ୍ଡକୁ ନିୟନ୍ତ୍ରଣକୁ ଆଣିବାର ସଫଳ ହୋଇଥିଲା। ସ୍ପିନ୍ ମଧ୍ୟ କ୍ରିକେଟର ଏକ ଅଂଶ ବୋଲି ସେ କହିଛନ୍ତି। ଭାରତୀୟ ଦ୍ରୁତ ବୋଲରମାନେ ମଧ୍ୟ ଗତ କେତେବର୍ଷ ହେବ ପ୍ରଭାବୀ ପ୍ରଦର୍ଶନ କରିଛନ୍ତି। ତେଣୁ ଇଂଲଣ୍ଡ ଦଳକୁ ଆହୁରି ଭଲ ଭାବେ ପ୍ରସ୍ତୁତି କରିବାର ଆବଶ୍ୟକତା ରହିଛି ବୋଲି ରିଚାଡର୍ସ କହିଛନ୍ତି।