ଢେଙ୍କାନାଳ ଅଫିସ, ୨୨।୧୦: ଜିଲାପାଳ ସରୋଜ କୁମାର ସେଠୀ, ଏସ୍ପି ଲୋଗାନୟାଗୀ ଦିବ୍ୟା ଭି. ଶୁକ୍ରବାର ଅପରାହ୍ନରେ ଅଚାନକ ଜିଲା ଚିକିତ୍ସାଳୟରେ ଚଢ଼ାଉ କରିଛନ୍ତି। ବିଭିନ୍ନ ରୋଗ ପରୀକ୍ଷା ପାଇଁ ଉଦ୍ଦିଷ୍ଟ ଅଟୋ ଆନାଲାଇଜ ଦୀର୍ଘଦିନ ହେଲା ଅଚଳ ହୋଇପଡ଼ିଥିବା ବେଳେ ଏହାକୁ ୧୫ଦିନ ମଧ୍ୟରେ କାର୍ଯ୍ୟକ୍ଷମ କରିବାକୁ ଜିଲାପାଳ ନିର୍ଦ୍ଦେଶ ଦେଇଛନ୍ତି।
ଅଟୋ ଆନାଲାଇଜର କାମ କରୁ ନ ଥିବାରୁ ରୋଗୀମାନେ ଘରୋଇ ପାଥୋଲାବ ଏବଂ ଆବଶ୍ୟକସ୍ଥଳେ କଟକ ଯାଇ ଖର୍ଚ୍ଚାନ୍ତ ହେଉଛନ୍ତି। ଅଟୋ ଆନାଲାଇଜର ପ୍ରକୋଷ୍ଠ ବୁଲି ଦେଖିବା ବେଳେ ଏହାକୁ ନେଇ ଜିଲାପାଳ ଅସନ୍ତୋଷ ବ୍ୟକ୍ତ କରିଥିଲେ। ଉଭୟ ଅଧିକାରୀ ସ୍ତ୍ରୀ ଓ ପ୍ରସୂତି ବିଭାଗ, ମହିଳା ଓ ପୁରୁଷ ମେଡିସିନ ୱାର୍ଡ, ଆଉଟ୍ଡୋର, ରଞ୍ଜନରଶ୍ମି ବିଭାଗ ଲାବୋରେଟୋରି ପ୍ରକୋଷ୍ଠ ପରିଦର୍ଶନ କରିବା ସହ ମିଳୁଥିବା ଚିକିତ୍ସା ସୁବିଧା, କର୍ମଚାରୀଙ୍କ ବ୍ୟବହାର ସମ୍ପର୍କରେ ରୋଗୀ ଓ ସେମାନଙ୍କ ସମ୍ପର୍କୀୟଙ୍କ ସହିତ ଆଲୋଚନା କରିଥିଲେ। ଡାକ୍ତର, ନର୍ସ ଏବଂ କର୍ମଚାରୀ ନିୟମିତ ଆସୁଛନ୍ତି କି ନାହିଁ, ତାହା ଯାଞ୍ଚ କରିଥିଲେ। ସୁରକ୍ଷା ବ୍ୟବସ୍ଥା କଡ଼ାକଡ଼ି କରିବାକୁ ପରାମର୍ଶ ଦେଇଥିଲେ। ଚିକିତ୍ସାଳୟ ସମ୍ମୁଖରେ ବେଆଇନ ପାର୍କିଂକୁ ନିୟନ୍ତ୍ରଣ କରିବା, ସ୍ବାସ୍ଥ୍ୟକେନ୍ଦ୍ରକୁ ଦଲାଲମୁକ୍ତ କରିବା ପାଇଁ ଜିଲାପାଳ ନିର୍ଦ୍ଦେଶ ଦେଇଛନ୍ତି। ଅତିରିକ୍ତ ଜିଲାପାଳ (ରାଜସ୍ବ) ଉଦୟ କୁମାର ମହାପାତ୍ର, ସିଡିଏମ୍ଓ ଡା. ଅଶୋକ କୁମାର ଦାଶ ପ୍ରମୁଖ ଉପସ୍ଥିତ ଥିଲେ।
ଏ ସଂକ୍ରାନ୍ତରେ ଜିଲାପାଳ କୁହନ୍ତି, ସରକାରୀ ନିର୍ଦ୍ଦେଶ ଅନୁଯାୟୀ ଜିଲା ଚିକିତ୍ସାଳୟ ପରିଦର୍ଶନ କରିଥିଲୁ। ଦୈନିକ ଜିଲା ଚିକିତ୍ସାଳୟ ବୁଲି ଦେଖିବା ପାଇଁ ସିଡିଏମ୍ଓଙ୍କୁ କୁହାଯାଇଛି।