ଦିଗପହଣ୍ଡି,୧୭।୨(ଡି.ଏନ.ଏ.) ଦିଗପହଣ୍ଡି ବ୍ଲକ ଚଷା ନିମଖଣ୍ଡି ପଞ୍ଚାୟତ ତାଳପଡ଼ା ଗାଁରେ ବୁଥ ଦଖଲ ପାଇଁ ଉଦ୍ୟମରୁ ୨ ଗୋଷ୍ଠୀ ମଧ୍ୟରେ ମୁହାମୁହିଁ ପରିସ୍ଥିତି ସୃଷ୍ଟି ହୋଇଥିଲା। ବୁଧବାର ଗାଁ ପ୍ରାଥମିକ ବିଦ୍ୟାଳୟ ପରିସରରେ ଥିବା ୫ ନଂ ବୁଥକୁ ଦଖଲ କରି ରିଗିଂ ପାଇଁ ସ୍ଥାନୀୟ ଜଣେ ପ୍ରଭାବଶାଳୀ ଶିକ୍ଷକଙ୍କ ନେତୃତ୍ୱରେ ଏକ ନିର୍ଦ୍ଦିଷ୍ଟ ରାଜନୈତିକ ଦଳର କର୍ମୀମାନେ ଉଦ୍ୟମ କରିଥିଲେ। ଏହାକୁ କେନ୍ଦ୍ରକରି ୨ ଗୋଷ୍ଠୀ ମଧ୍ୟରେ ମୁହାମୁହିଁ ପରିସ୍ଥିତି ସୃଷ୍ଟି ହୋଇଥିଲା। ନିର୍ଦ୍ଧିଷ୍ଟ ଦଳର ସମର୍ଥକମାନେ ହାତରେ ବିଭିନ୍ନ ମାରଣାସ୍ତ୍ର ଧରି ବୁଥ ମଧ୍ୟରେ ଜବରଦସ୍ତ ଧସେଇ ପଶିଥିଲେ। ପରେ ସେମାନେ ବିପକ୍ଷ ଦଳର ପ୍ରାର୍ଥୀମାନଙ୍କ ଏଜେଣ୍ଟ ଦେବେନ୍ଦ୍ର ନାୟକ, ସନ୍ତୋଷ ପାଇକ, ବୁଲା ଦଳାଇ ଏବଂ ବନମାଳୀ ଦଳାଇଙ୍କ ସମେତ ବହୁ ସଂଖ୍ୟକ ଭୋଟରଙ୍କୁ ଧମକ ଦେବା ସହ ଧକ୍କା ମାରି ସେଠାରୁ ତଡ଼ି ଦେବା ସହ ବୁଥ ଥିବା ଶ୍ରେଣୀ ଗୃହରେ ତାଲା ପକାଇ ଦେଇଥିଲେ। ଫଳରେ ଅନେକ ଭୋଟର ସେମାନଙ୍କ ମତଦାନରୁ ବଞ୍ଚିତ ହୋଇଥିବା ଅଭିଯୋଗ ହୋଇଛି। ଖବର ପାଇ ଗାଁର ୩ ମହିଳା ସ୍ବୟଂ ସହାୟିକା ଗୋଷ୍ଠୀର ବହୁ ସଂଖ୍ୟକ ମହିଳା ଠେଙ୍ଗା, ବାଡି ଧରି ବୁଥକୁ ଘେରି ଯାଇଥିଲେ। ଦିଗପହଣ୍ଡି ଆଇଆଇସି ବସନ୍ତ କୁମାର ସେଠୀ ଏବଂ ବ୍ରହ୍ମପୁର ଟାଉନ୍ ଥାନା ଆଇଆଇସି ପୋଲିସ ମୋବାଇଲ ଟିମ୍ର କୁଇକ୍ ଆକ୍ସନ ଫୋର୍ସ ସହ ପହଞ୍ଚିବା ପୂର୍ବରୁ ବୁଥ ଦଖଲ କରି ରେଗିଂ ପାଇଁ ପ୍ରସ୍ତୁତ ଥିବା ନିର୍ଦ୍ଦିିଷ୍ଟ ରାଜନୈତିକ ଦଳର ସମର୍ଥକ ମାନେ ସେଠାରୁ ଛତ୍ରଭଙ୍ଗ ଦେଇଥିଲେ। ପରେ ପୋଲିସ ଉଭୟ ଗୋଷ୍ଠୀର ସମର୍ଥକମାନଙ୍କୁ ଘଉଡାଇବା ପାଇଁ ଲାଠି ମାଡ ପାଇଁ ପ୍ରସ୍ତୁତ ହେବାରୁ ମହିଳା ଗୋଷ୍ଠୀ ଉତ୍ତେଜିତ ହୋଇ ପୋଲିସ ଅଧିକାରୀ ମାନଙ୍କ ସହ ଯୁକ୍ତିତର୍କ କରିଥିଲେ। ପୋଲିସ ବୁଝାଶୁଝା କରିବା ପରେ ପରିସ୍ଥିତି ନିୟନ୍ତ୍ରଣ ହୋଇଥିଲେ ମଧ୍ୟ ସମ୍ପୃକ୍ତ ଗାଁରେ ଚାପା ଉତ୍ତେଜନା ଲାଗିରହିଛି। ପୋଲିଂ ପାର୍ଟିର କର୍ମଚାରୀମାନେ ପୋଲିସ କର୍ଡନରେ ଫେରିଥିବା ଜଣାପଡିଛି।
