ନୂଆଦିଲ୍ଲୀ,୨୪।୪: ରିଲାଏନ୍ସ ଇଣ୍ଡଷ୍ଟ୍ରିଜ୍ ଲିମିଟେଡ୍ (ଆର୍ଆଇଏଲ୍) ପକ୍ଷରୁ ଫ୍ୟୁଚର ଗ୍ରୁପ୍ ସହ ନିଜର ୨୪,୭୧୩ କୋଟି ଟଙ୍କାର କାରବାରକୁ ବାତିଲ କରି ଦିଆଯାଇଛି। ଏହି କାରବାରକୁ ଋଣଦାତାଙ୍କ ବୈଠକରେ ମଞ୍ଜୁରୀ ମିଳି ନ ଥିବାରୁ ଏହାକୁ ଆଉ ଆଗକୁ ବଢ଼ାଯିବନାହିଁ ବୋଲି ଆର୍ଆଇଏଲ୍ ପକ୍ଷରୁ ଶନିବାର କୁହାଯାଇଛି। ରିଲାଏନ୍ସ ଇଣ୍ଡଷ୍ଟ୍ରିଜ୍ ପକ୍ଷରୁ ଶେୟାର ବଜାରକୁ ଦିଆଯାଇଥିବା ସୂଚନାରେ କୁହାଯାଇଛି ଯେ, ଫ୍ୟୁଚର ରିଟେଲ୍ ଲିମିଟେଡ୍ (ଏଫ୍ଆର୍ଏଲ୍) ଏବଂ ଫ୍ୟୁଚର ଗ୍ରୁପ୍ର କମ୍ପାନୀଗୁଡିକ ସହିତ କାରବାରର ମଞ୍ଜୁରୀ ପାଇଁ ହୋଇଥିବା ବୈଠକରେ ଶେୟାରଧାରକ ଏବଂ ଅସୁରକ୍ଷିତ ଋଣଦାତାମାନେ ସପକ୍ଷରେ ବହୁମତ ଦେଇଥିଲେ। ତେବେ ସୁରକ୍ଷିତ ଋଣଦାତାମାନେ ଏହି ପ୍ରସ୍ତାବକୁ ଅଗ୍ରାହ୍ୟ କରିଦେଇଛନ୍ତି। ଏଭଳି ପରିସ୍ଥିତିରେ ଯୋଜନା କାର୍ଯ୍ୟକାରୀ କରାଯାଇ ହେବନାହିଁ ବୋଲି ରିଲାଏନ୍ସ ଇଣ୍ଡଷ୍ଟ୍ରି ନିଜ ବୟାନରେ କହିଛି।
ଫ୍ୟୁଚର ଗ୍ରୁପ୍ ପକ୍ଷରୁ ଅଗଷ୍ଟ ୨୦୨୦ରେ ରିଲାଏନ୍ସ ଇଣ୍ଡଷ୍ଟ୍ରିଜ୍ର କମ୍ପାନୀ ରିଲାଏନ୍ସ ରିଟେଲ୍ ଭେଞ୍ଚର୍ସ ଲିମିଟେଡ୍ (ଆର୍ଆର୍ଭିଏଲ୍) ସହ ୨୪,୭୧୩ କୋଟି ଟଙ୍କାର ମିଶ୍ରଣ ଚୁକ୍ତି ଘୋଷଣା ହୋଇଥିଲା। ଏହି ଚୁକ୍ତି ଅନୁସାରେ ରିଟେଲ୍, ହୋଲ୍ସେଲ୍, ଲଜିଷ୍ଟିକ୍ ଏବଂ ଓ୍ବେର୍ହାଉସ୍ ସେଗ୍ମେଣ୍ଟରେ ସକ୍ରିୟ ଥିବା ଫ୍ୟୁଚର ଗ୍ରୁପ୍ର ୧୯ଟି କମ୍ପାନୀର ୯୪୭ଟି ଷ୍ଟୋରକୁ ରିଲାଏନ୍ସ ରିଟେଲ ଅଧିଗ୍ରହଣ କରିବା ଯୋଜନା ରହିଥିଲା। ଏହି ମିଶ୍ରଣ ଚୁକ୍ତି ଘୋଷଣା ପରେ ଅଗ୍ରଣୀ ଇ-କମର୍ସ କମ୍ପାନୀ ଆମାଜନ୍ ପକ୍ଷରୁ ଏହାର ବିରୋଧ କରାଯାଇଥିଲା। ଏହି ଚୁକ୍ତି ଆମାଜନ ସହିତ ଫ୍ୟୁଚର ଗ୍ରୁପ୍ର ନିବେଶ ବୁଝାମଣାକୁ ଉଲ୍ଲଂଘନ କରୁଥିବା କମ୍ପାନୀ ପକ୍ଷରୁ କୁହାଯାଇଛି।
ଏହି ବିବାଦ ମଧ୍ୟରେ ଶେୟାରଧାରକ ଏବଂ ଋଣଦାତାମାନଙ୍କର ମଞ୍ଜୁରୀ ପାଇଁ ଫ୍ୟୁଚର ଗ୍ରୁପ୍ର ସମ୍ବନ୍ଧିତ କମ୍ପାନୀଗୁଡ଼ିକ ଗତ ୭ଦିନ ମଧ୍ୟରେ ଅଲଗା ଅଲଗା ବୈଠକ ଡକାଇଥିଲେ। ଶେୟାରଧାରକ ଏବଂ ଅସୁରକ୍ଷିତ ଋଣଦାତାମାନେ ଚୁକ୍ତି ସପକ୍ଷରେ ଥିଲେ ମଧ୍ୟ ସୁରକ୍ଷିତ ଋଣଦାତାମାନେ ଏହି ପ୍ରସ୍ତାବକୁ ଅଗ୍ରାହ୍ୟ କରି ଦେଇଥିବା ଫ୍ୟୁଚର ଗ୍ରୁପ୍ ପକ୍ଷରୁ ଶୁକ୍ରବାର ସୂଚନା ଦିଆଯାଇଥିଲା। ଏହି ପରିପେକ୍ଷୀରେ ଆର୍ଆଇଏଲ୍ ପକ୍ଷରୁ ଚୁକ୍ତି ରଦ୍ଦ କରିଦିଆଯାଇଛି।