ବ୍ରହ୍ମଗିରି,୨୭ା୯(ଡି.ଏନ୍.ଏ.): ପୁରୀ ଜିଲା କୃଷ୍ଣପ୍ରସାଦ ବ୍ଲକ ଅଧୀନ ଅରଖକୁଦା ଓ ଗୋପୀନାଥପୁର ପଞ୍ଚାୟତର ଅନେକ ଗାଁ ଚିଲିକା ଉପକୂଳରେ ରହିଛି। ବନ୍ୟା, ବାତ୍ୟା, ଲଗାଣ ବର୍ଷା ହେଲେ ପ୍ରାୟ ସମୟ ଏହି ଗାଁରେ ଚିଲିକାର ଜୁଆର ପାଣି ପଶିଥାଏ। ତେଣୁ ଏହାକୁ ଦୃଷ୍ଟିରେ ରଖି ରାଜ୍ୟ ସରକାର ଜଳସମ୍ପଦ ବିଭାଗ ପକ୍ଷରୁ ରିଙ୍ଗ ବନ୍ଧ ବା ସୁରକ୍ଷା ପ୍ରାଚୀର ନିର୍ମାଣ ପାଇଁ ଯୋଜନା କରିଥିଲେ। ହେଲେ ଏପର୍ଯ୍ୟନ୍ତ କାର୍ଯ୍ୟ ସରି ନ ଥିବାବେଳେ ନେଇଥିବା ଠିକା ସଂସ୍ଥା କେବଳ ଗାର୍ଡ ଓ୍ବାଲ କାମ କରି ରହିଯାଇଛି। ଏହା ଯୋଗୁ କେତେକ ସ୍ଥାନରେ ଗାର୍ଡଓ୍ବାଲ ଡେଇଁ ମଧ୍ୟ ଗ୍ରାମ ମଧ୍ୟକୁ ପାଣି ପଶୁଥିବାରୁ ଲୋକେ ଭୟଭୀତ ହୋଇରହିଛନ୍ତି। ଏହି ୨ ପଞ୍ଚାୟତର ଅରଖକୁଦା, ଜେନାପୁର, ସାନପାଟଣା, ଗବକୁଣ୍ଡ, ମିର୍ଜାପୁର ଭଳି ଅନେକ ମତ୍ସ୍ୟଜୀବୀ ଗାଁ ଚିଲିକା କୂଳରେ ରହିଥିବାରୁ ଉକ୍ତ ଗାଁ ପ୍ରତି ଚିଲିକା ଓ ସମୁଦ୍ରର ସୁଉଚ୍ଚ ଜୁଆର ସଦାସର୍ବଦା ବିପଦ ସାଜୁଛି। ଏ ନେଇ ବାରମ୍ବାର ଅଭିଯୋଗ ହେଉଥିଲେ ମଧ୍ୟ ଏଥିପ୍ରତି ବିଭାଗୀୟ ଅଧିକାରୀମାନେ ଦୃଷ୍ଟି ଦେଉନାହାନ୍ତି ବୋଲି ଅରଖକୁଦା ପଞ୍ଚାୟତର ପୂର୍ବତନ ସରପଞ୍ଚ ବଳଭଦ୍ର ନାୟକ ଅଭିଯୋଗ କରିଛନ୍ତି। ଏ ସମ୍ପର୍କରେ ଜଳ ସମ୍ପଦ ବିଭାଗର କନିଷ୍ଠ ଯନ୍ତ୍ରୀ ସୁଶାନ୍ତ ଦୋରା କୁହନ୍ତି ସମ୍ପୃକ୍ତ ଠିକା ସଂସ୍ଥାକୁ ପୂଜା ଛୁଟି ପରେ କାର୍ଯ୍ୟ କରିବା ପାଇଁ ନୋଟିସ୍ ଦିଆଯାଇଛି। ଯଦି ଏହି କାର୍ଯ୍ୟ କରା ନ ଯାଏ ତେବେ ସାନି ଟେଣ୍ଡର କରାଯିବ ବୋଲି ସେ କହିଛନ୍ତି।
