ଗୁଣପୁର,୨୫।୯(ପ୍ରଦୀପ କୁମାର ପାଢ଼ୀ):ରାୟଗଡା ଜିଲା ଗୁଣପୁର ବ୍ଲକ୍ ପୁଟାସିଂ ଅଞ୍ଚଳରେ ବସବାସ କରୁଥିବା ଆଦିମ ଜନଜାତି ଲାଞ୍ଜିଆ ସୌରାଙ୍କ ଇଡିତାଲ ଚିତ୍ରକଳା ଜିଆଇ ଟ୍ୟାଗ୍ ପାଇଁ ମନୋନୀତ ହୋଇଥିବାରୁ କଳାର ଗ୍ରାମ ରିଞ୍ଜିତାଲ ଉତ୍ସବମୁଖର ହୋଇଉଠିଛି। ବିଘ୍ନନାଶ, ଗୃହଶାନ୍ତି ପାଇଁ ଲାଞ୍ଜିଆ ସୌରାମାନେ କାନ୍ଥରେ ବିଭିନ୍ନ ଦେବଦେବୀଙ୍କ ଚିତ୍ର ଆଙ୍କିବା ସହ ପୂର୍ବପୁରୁଷଙ୍କୁ ପୂଜା କରୁଥିବା ଚିତ୍ର ପରମ୍ପରାକୁ ଇଡିତାଲ ନାମରେ ନାମିତ ଏହି ଚିତ୍ରକଳା ଆଜି ସର୍ବବିଦିତ ହୋଇପାରିଛି। ରାଜ୍ୟ ସରକାରଙ୍କ ଓଡ଼ିଆ ଭାଷା, ସାହିତ୍ୟ ଓ ସଂସ୍କୃତି ବିଭାଗ ତରଫରୁ ଓଡ଼ିଶା ଲଳିତକଳା ଏକାଡେମୀର ସଚିବ ପଞ୍ଚାନନ ସାମଲ ଶନିବାର ଗୁଣପୁର ବ୍ଲକ ପୁଟାସିଂ ପଞ୍ଚାୟତର ରିଞ୍ଜିତାଲ ଓ ଆଖପାଖ ଅଞ୍ଚଳ ଗସ୍ତ କରି ବିଭିନ୍ନ ଆନୁଷଙ୍ଗିକ ବ୍ୟବସ୍ଥା ଉପରେ ତର୍ଜମା କରିଥିଲେ । ସାମଲଙ୍କ ଗସ୍ତ ସମୟରେ ଜିଲା ସଂସ୍କୃତି ଅଧିକାରୀ ସୁଶ୍ରୀ ସୁସ୍ମିତା ବାଉରୀ, ସୂଚନା ଓ ଲୋକ ସମ୍ପର୍କ ବିଭାଗର ଅନନ୍ତ ପାତ୍ର, ଇଡ଼ିତାଲ ଚିତ୍ରଶିଳ୍ପୀ ବୀର କିଶୋର ପ୍ରମୁଖ ଉପସ୍ଥିତ ରହି ଗ୍ରାମର ପ୍ରତ୍ୟେକ ଘରର ମୁଖ୍ୟଦ୍ୱାରରେ ଚିତ୍ର ଆଙ୍କିବା ଓ ପ୍ରଦର୍ଶନୀ ଆୟୋଜନ କରିବା ନିମନ୍ତେ ଆଲୋଚନା କରିଥିଲେ। ଆସନ୍ତା ଅକ୍ଟୋବର ପ୍ରଥମ ସପ୍ତାହରେ ରାଜ୍ୟ ସରକାରଙ୍କ ଓଡ଼ିଆ ଭାଷା, ସାହିତ୍ୟ ଓ ସଂସ୍କୃତି ବିଭାଗ ମନ୍ତ୍ରୀ ଅଶ୍ବିନୀ ପାତ୍ର, ଲଳିତ କଳା ଏକାଡେମୀ ସଭାପତି ପଦ୍ମଶ୍ରୀ ସୁଦର୍ଶନ ପଟ୍ଟନାୟକ, ଅତିରିକ୍ତ ମୁଖ୍ୟ ଶାସନ ସଚିବ ତଥା ଓଡ଼ିଆ ଭାଷା, ସାହିତ୍ୟ ଓ ସଂସ୍କୃତି ବିଭାଗ ସଚିବ ସତ୍ୟବ୍ରତ ସାହୁ, ନିର୍ଦ୍ଦେଶକ ଦିଲ୍ଲୀପ ରାଉତରାୟ ପ୍ରମୁଖ ରିଞ୍ଜିତାଲ ଅଞ୍ଚଳ ଗସ୍ତ କରି ପ୍ରଦର୍ଶନୀ ଉଦ୍ଘାଟନ କରିବା ନେଇ ସଚିବ ସୂଚନା ଦେଇଥିଲେ। ଗ୍ରାମର ପ୍ରବେଶ ପଥରେ ଇଡିତାଲ କୁଟୀର ନିର୍ମାଣ, ଚିତ୍ରକଳାକୁ ଆହୁରି ଉନ୍ନତ ଧରଣର କରି ରାଜ୍ୟ ତଥା ଦେଶ ଓ ଦେଶ ବାହାରେ ଏହାର ଆଦୃତ କରିବା ପାଇଁ ସରକାର ଆବଶ୍ୟକ ପଦକ୍ଷେପ ଗ୍ରହଣ କରୁଥିବା ସଚିବ ସୂଚନା ଦେଇଥିଲେ । ରିଞ୍ଜିତାଲ ଓ ଏହାର ଆଖପାଖ ଅଞ୍ଚଳର ୫୦ରୁ ୬୦ ଜଣ କଳାକାର ଏହି କାର୍ଯ୍ୟରେ ନିୟୋଜିତ ହେବେ । ସେମାନଙ୍କ ତାଲିକା ଶୀଘ୍ର ପ୍ରସ୍ତୁତ କରି ବିଭାଗକୁ ପଠାଇବା ନିମନ୍ତେ ସଚିବ ଜିଲା ସଂସ୍କୃତି ଅଧିକାରୀଙ୍କୁ ନିର୍ଦ୍ଦେଶ ଦେଇଥିଲେ ।