ବେଙ୍ଗାଲୁରୁ,୨୫।୪ : କେନ୍ଦ୍ର ସ୍ବରାଷ୍ଟ୍ରମନ୍ତ୍ରୀ ଅମିତ ଶାହା ମଙ୍ଗଳବାର କର୍ନାଟକର ବାଗଲକୋଟରେ ଏକ ସାଧାରଣ ସଭାରେ ଯୋଗ ଦେଇଛନ୍ତି। ଏହି ସମୟରେ ସେ କଂଗ୍ରେସକୁ କଡ଼ା ସମାଲୋଚନା କରିଛନ୍ତି। ସେ କହିଛନ୍ତି, ଭାଜପା ଛାଡ଼ି କଂଗ୍ରେସରେ ଯୋଗ ଦେଇଥିବା ନେତାଙ୍କ ଆଧାରରେ କଂଗ୍ରେସ ନିର୍ବାଚନରେ ପ୍ରତିଦ୍ୱନ୍ଦ୍ୱିତା କରୁଛି। ସମ୍ପ୍ରତି କଂଗ୍ରେସରେ ଦେବାଳିଆ ସ୍ଥିତି ସୃଷ୍ଟି ହୋଇଛି। ଦଳରେ କେହି ଆଗଧାଡ଼ିର ପ୍ରଭାବଶାଳୀ ନେତା ନାହାନ୍ତି। ତେଣୁ କଂଗ୍ରେସ ଭାଜପା ଛାନିଥିବା ନେତାଙ୍କ ଉପରେ ଭରସା କରୁଛି।
ରାଜ୍ୟରେ ଧର୍ମ ଆଧାରରେ ଚାରି ପ୍ରତିଶତ ସଂରକ୍ଷଣ ମୁସଲମାନଙ୍କ ପାଇଁ ରହିଛି। ଭୋଟ ବ୍ୟାଙ୍କର ଲୋଭରେ ନ ପଡ଼ି ଭାଜପା ସରକାର ଏହି ମୁସଲିମ ସଂରକ୍ଷଣକୁ ରଦ୍ଦ କରିଦେଇଛନ୍ତି। ଆମେ ବିଶ୍ୱାସ କରୁ ଯେ ଧର୍ମ ଆଧାରରେ କୌଣସି ସଂରକ୍ଷଣ ରହିବା ଉଚିତ ନୁହେଁ। ମୁସଲମାନ ସଂରକ୍ଷଣ ସମାପ୍ତ କରିବା ପରେ, ଆମେ ଏସସି, ଏସଟି, ଭୋକଲିଙ୍ଗା ଏବଂ ଲିଙ୍ଗାୟତଙ୍କ ପାଇଁ ସଂରକ୍ଷଣ ବୃଦ୍ଧି କରିବାକୁ କାର୍ଯ୍ୟ କରିଛୁ।
ପ୍ରଧାନମନ୍ତ୍ରୀ ନରେନ୍ଦ୍ର ମୋଦି ନଅ ବର୍ଷ ଧରି କେନ୍ଦ୍ରରୁ କର୍ନାଟକକୁ ବହୁ ଟଙ୍କା ଏବଂ ଯୋଜନା ପଠାଇବା କାର୍ଯ୍ୟ କରିଛନ୍ତି। ଯଦି କଂଗ୍ରେସ କ୍ଷମତାକୁ ଆସେ, ତେବେ ରାଜ୍ୟରେ ଦୁର୍ନୀତି, ତୁଷ୍ଟିକରଣ ଏବଂ ପାରିବାରବାଦ ବଢ଼ିବ। ଏଥିସହିତ ସମଗ୍ର କର୍ନାଟକରେ ଦଙ୍ଗା ହେବାର ସମ୍ଭାବନା ରହିଛି।
ଏହି ନିର୍ବାଚନର ଉଦ୍ଦେଶ୍ୟ ହେଉଛି କର୍ନାଟକକୁ ସମ୍ପୂର୍ଣ୍ଣ ବିକଶିତ ରାଜ୍ୟ କରିବା। ଏହି ନିର୍ବାଚନ ମାଧ୍ୟମରେ ରାଜ୍ୟରେ ରାଜନୈତିକ ସ୍ଥିରତା ଆଣିବାରେ ଭାଜପା ସହାୟତା କରିବ।
କଂଗ୍ରେସ ଏକ ଓଲଟା ଗିୟର ପାର୍ଟି । ଗୋଟିଏ ପଟେ ଭାଜପାର ଡବଲ ଇଞ୍ଜିନ ସରକାର ଏବଂ ଅନ୍ୟ ପଟେ ଓଲଟା ଗିୟର ଦଳ ଅଛି। ଯଦି କଂଗ୍ରେସ ସରକାର ଗଠନ ହୁଏ, ତେବେ କର୍ନାଟକର ବିକାଶ ଓଲଟା ଗିୟରରେ ହେବ। ତେଣୁ ଏଥି ପ୍ରତି ସଚେତନ ରହିବା ଜରୁରୀ ବୋଲି ସେ କହିଛନ୍ତି।