ଖୋର୍ଦ୍ଧା ଅଫିସ/ବାଲୁଗାଁ/ଟାଙ୍ଗୀ,୬ା୧୨ (ଡି.ଏନ.ଏ.): ‘ଜଓ୍ବାଦ’ ପ୍ରଭାବରେ ଲଗାଣ ବର୍ଷା ଯୋଗୁ ପାଚିଲା ଧାନ ବିଲରେ ମିଶିଯାଇଛି। ଫଳରେ ବର୍ଷକର ଦାନାପାଣି ଉଜୁଡ଼ିବା ଆଶଙ୍କାରେ ଚାଷୀମାନେ ଚିନ୍ତାରେ ପଡ଼ିଛନ୍ତି। ଖୋର୍ଦ୍ଧା ଜିଲା ଅନ୍ତର୍ଗତ ବେଗୁନିଆ, ବୋଲଗଡ଼, ଖୋର୍ଦ୍ଧା, ଟାଙ୍ଗୀ, ଚିଲିକା, ବାଣପୁର, ଜଟଣୀ, ଭୁବନେଶ୍ୱର ଓ ତଳି ଅଞ୍ଚଳର ଚାଷଜମିରେ ପାଣି ଜମି ଫସଲ ନଷ୍ଟ ହୋଇଛି। ସହରତଳି ଅଞ୍ଚଳ ଗଡ଼ଖୋର୍ଦ୍ଧା, ସାମନ୍ତରାପୁର, କେରଙ୍ଗ, ଗଡ଼ହଳଦିଆ, ନୂଆଗାଁ, ଉଇଲିକିଶନ ନଗର, କୁମ୍ଭିଲୋ, ପତନିବର, ଟାଙ୍ଗିଆପଡା, ବାଜପୁର, ଦଲେଇପୁଟ, ଦେଉଳଟାଙ୍ଗି, ଜରିପୁଟି, ଶରଧାପୁର, ତରତୁଆ, ନାଲିପଡ଼ା, ଅର୍ଜୁନପୁର, ପୁବୁସାହି, ବରସାହି, ଜୟମଙ୍ଗଳ, ପାନବରଜ, ବାଘମାରୀ, ସାରୁଅ, ଅଟ୍ରି ପ୍ରଭୃତି ଅଞ୍ଚଳରେ ପାଚିଲା ଧାନ କ୍ଷେତରେ ପାଣି ଜମିରହି ମାଟିରେ ମିଶିଯାଇଛି। ରବିବାର ବର୍ଷାରେ ଭିଜି ଅନେକ ଚାଷୀ ବିଲରୁ ଓଦା ଧାନକୁ ବୋହି ନେଉଥିବା ଦେଖିବାକୁ ମିଳିଛି। ଶରଧାପୁରର ଚାଷୀ ଜିତେନ୍ଦ୍ର ବେହେରା, ବୁଦ୍ଧିଆ ବେହେରା, ଶଙ୍କର୍ଷଣ ବେହେରା, ନରେନ୍ଦ୍ର ବେହେରା, ଏମ୍. ଡି. ହାଜିରୁଦ୍ଦିନ ରେହମାନ, ମହମ୍ମଦ ହାସନ ପ୍ରମୁଖ କହିଛନ୍ତି, ଆମ ବିଲରେ ପାଣି ଜମି ରହିଛି। ବହୁ କଷ୍ଟରେ ଧାରକରଜ ଓ ସମିତିରୁ ଋଣ ଆଣି ଫସଲ କରିଥିଲୁ। ଏବେ ବର୍ଷା ସବୁ ଉଜାଡ଼ିଦେଲା। ଆମ ଅଞ୍ଚଳର ପ୍ରାୟ ୫୦ ଏକର ଜମିରେ ପାଚିଲା ଧାନ ପାଣିରେ ବୁଡ଼ିରହିଛି। ତୁରନ୍ତ ସରକାରୀ ସହାୟତା ନ ମିଳିଲେ, ଚାଷୀ ଦୁର୍ଦ୍ଦିନକୁ ସାମ୍ନା କରିବେ ବୋଲି ଜିତେନ୍ଦ୍ର କହିଛନ୍ତି। ସେହିପରି ଜରିପୁଟ ଅଞ୍ଚଳର ଚାଷୀ ମନୋରଞ୍ଜନ ସାମନ୍ତରାୟ, ଶିବଶଙ୍କର ଦୈତାରୀ ସେନାପତି, କାଶୀନାଥ ଜଗଦ୍ଦେବ, ଶିବଶଙ୍କର ଦାସ ଏବଂ ନଳିନୀକାନ୍ତ ଛୋଟରାୟ ପ୍ରମୁଖ କହିଛନ୍ତି, ବିଲରେ ପାଣି ଜମି ରହିଛି। ଏହି ଅଞ୍ଚଳର ପ୍ରାୟ ୫୦ ଏକର ଚାଷଜମିରେ ପାଚିଲା ଧାନବିଲରେ ଲେଉଟିଛି। ୪୦ ପ୍ରତିଶତ ପାଚିଲା ଧାନ କଟାଯାଇଥିବାବେଳେ ୪୦ ପ୍ରତିଶତ କଟାଯାଇନାହିିଁ। ଅଦିନିଆ ବର୍ଷାରେ ଧାନ ଗଜା ହୋଇଗଲା। ଏବେ ବାତ୍ୟା ପ୍ରଭାବରେ ଅଧିକାଂଶ ଜମିରେ ପାଣି ଜମି ଏହା ନଷ୍ଟ ହୋଇଗଲା। ଚଳିତବର୍ଷ ଅକ୍ଟୋବର ଶେଷ ଓ ନଭେମ୍ବର ମାସରେ ଅଦିନିଆ ବର୍ଷା ଯୋଗୁ ବିଲରେ ପାଣି ଜମି ଧାନ ଗଜା ହୋଇଗଲା। ଏବେ ପୁଣି ବର୍ଷା ସବୁ ଉଜାଡ଼ିିଦେଲା ବୋଲି ନବନିର୍ମାଣ କୃଷକ ସଙ୍ଗଠନର ଶୈଳେଶ ବଳିଆରସିଂ କହିଛନ୍ତି। ସରକାର ତୁରନ୍ତ ଚାଷୀଙ୍କ କ୍ଷୟକ୍ଷତି ଆକଳନ କରି କ୍ଷତିପୂରଣ ଦେବାକୁ ସେ ଦାବି କରିଛନ୍ତି। ପ୍ରକାଶ ଯେ, ଗତବର୍ଷ ଅଦିନିଆ ବର୍ଷାରେ ୭୬୦୦ ହେକ୍ଟର ଚାଷଜମି ପ୍ରଭାବିତ ହୋଇଥିବା ବେଳେ ଚଳିତବର୍ଷ ପ୍ରାୟ ୧୦ହଜାର ହେକ୍ଟର ଜମିର ଫସଲ ନଷ୍ଟ ହୋଇଥିବା ଚାଷୀ ସଙ୍ଗଠନଗୁଡ଼ିିକ କହିଛନ୍ତି। ସରକାର ଏଥିପ୍ରତି ଦୃଷ୍ଟି ଦେବାକୁ ଭାଜପା କୃଷକ ନେତା ଶ୍ରୀରଞ୍ଜନ ମଙ୍ଗରାଜ ଦାବି କରିଛନ୍ତି। କ୍ଷୟକ୍ଷତି ଅନୁଧ୍ୟାନ କରାଯାଇ କ୍ଷତିପୂରଣ ପ୍ରଦାନ ଲାଗି ପଦକ୍ଷେପ ନିଆଯିବ ବୋଲି ଜିଲା କୃଷି ଅଧିକାରୀ ପ୍ରଫୁଲ୍ଲ ମହାରଣା କହିଛନ୍ତି।