ନୂଆଦିଲ୍ଲୀ,୨୯।୮: ଚଳିତ ଇଂଲଣ୍ଡ ବିପକ୍ଷ ଟେଷ୍ଟ ସିରିଜ୍ରେ ଭାରତୀୟ ଦଳର ଯୁବ ଉଇକେଟକିପର ବ୍ୟାଟ୍ସମ୍ୟାନ ରିଷଭ ପନ୍ତ ବ୍ୟାଟିଂରେ ସମ୍ପୂର୍ଣ୍ଣ ବିଫଳ ହୋଇଛନ୍ତି। ହେଡିଂଲେ ଟେଷ୍ଟର ଉଭୟ ଇନିଂସରେ ୨୩ ବର୍ଷୀୟ ପନ୍ତ ମାତ୍ର ୩ ରନ୍ କରିବାକୁ ସକ୍ଷମ ହୋଇଥିଲେ। ଏପର୍ଯ୍ୟନ୍ତ ଇଂଲଣ୍ଡ ବିପକ୍ଷ ସିରିଜ୍ରେ ୫ ଥର ବ୍ୟାଟିଂ ସୁଯୋଗ ପାଇଥିବା ବାମହାତୀ ବିସ୍ଫୋରକ ବ୍ୟାଟ୍ସମ୍ୟାନ ୧୭.୪ ହାରରେ ୮୭ ରନ୍ କରିଛନ୍ତି। ଚଳିତ ସିରିଜ୍ରେ ଏଭଳି ପ୍ରଦର୍ଶନ କାରଣରୁ ତାଙ୍କ ବ୍ୟାଟିଂ ଟେକ୍ନିକ ଉପରେ ପ୍ରଶ୍ନ ଉଠାଇଛନ୍ତି ପାକିସ୍ତାନର ପୂର୍ବତନ ଅଧିନାୟକ ସଲମାନ ଭଟ।
ହେଡିଂଲେରେ ଶନିବାର ଟିମ୍ ଇଣ୍ଡିଆ ଇନିଂସ ପରାଜୟ ବରଣ କରିବା ପରେ ଭଟ ନିଜ ୟୁଟ୍ୟୁବ ଚ୍ୟାନେଲରେ କହିଛନ୍ତି, ପେସରଙ୍କୁ ସୁହାଉଥିବା ପିଚ୍ରେ ବ୍ୟାଟିଂ କରିବା ଲାଗି ପନ୍ତଙ୍କ ନିକଟରେ ଭଲ ଟେକନିକ୍ ନାହିଁ। ସେ ପ୍ରତ୍ୟେକ ବଲରେ ଷ୍ଟେପ୍ ଆଉଟ୍ କରୁଛନ୍ତି। ଏଭଳି ଟେକନିକ୍ ତାଙ୍କୁ ଗୋଟିଏ କିମ୍ବା ଦୁଇଟି ଭଲ ଇନିଂସ ଖେଳିବାରେ ସହାୟତା କରିପାରେ। କିନ୍ତୁ ଏଭଳି ଖେଳି ସେ କଦାପି ସଫଳ ଟେଷ୍ଟ ବ୍ୟାଟ୍ସମ୍ୟାନ ହୋଇପାରିବେ ନାହିଁ।
ତାଙ୍କୁ ଭଲ ଡିଫେନ୍ସିଭ ଟେକ୍ନିକ ସହ ଧୈର୍ଯ୍ୟ ଶିଖିବାକୁ ପଡ଼ିବ। ସେ ଅନ୍ୟ ବ୍ୟାଟ୍ସମ୍ୟାନଙ୍କ ଠାରୁ ଭିନ୍ନ ଶୈଳୀରେ ଖେଳନ୍ତି। ମାତ୍ର ଇଂଲଣ୍ଡର ପରିବେଶରେ ଟେଷ୍ଟ କ୍ରିକେଟ ଖେଳିବା ପାଇଁ ଦୃଢ଼ ଡିଫେନ୍ସ ଦରକାର। ସେ ଭାରତ ଓ ଅଷ୍ଟ୍ରେଲିଆରେ ସଫଳତା ପାଇପାରନ୍ତି। କାରଣ ସେଠାରେ ବଲ ଏତେ ସୁଇଙ୍ଗ କରେ ନାହିଁ। କିନ୍ତୁ ଖୁବ୍ ସୁଇଙ୍ଗ କରୁଥିବା ପିଚ୍ କିମ୍ବା ଇଂଲଣ୍ଡ ଭଳି ସିମିଂ କଣ୍ଡିଶନରେ ପନ୍ତଙ୍କୁ ଅସୁବିଧା ହେବ ବୋଲି ଭଟ କହିଛନ୍ତି।