ସିଡ୍ନୀ,୭।୧- ସ୍ଥାନୀୟ ସିଡ୍ନୀ ଗ୍ରାଉଣ୍ଡରେ ଚାଲିଥିବା ଭାରତ ବିପକ୍ଷ ତୃତୀୟ ଟେଷ୍ଟର ପ୍ରଥମ ଦିନରେ ଋଷଭ ପନ୍ତଙ୍କ ଉଇକେଟକିପିଂ ଭାରତୀୟ ଦଳର ଚିନ୍ତାର କାରଣ ପାଲଟିଛି। ଅଷ୍ଟ୍ରେଲିଆ ଦଳ ପାଇଁ ପଦାର୍ପଣକାରୀ ଓପନର ଓ୍ବିଲ ପୁକୋଭସ୍କିଙ୍କ ଦୁଇଟି କ୍ୟାଚ୍ ହାତ ଛାଡ଼ କରିଛନ୍ତି ଦକ୍ଷ ଉଇକେଟକିପର ରିଦ୍ଧିମାନ ଶାହାଙ୍କ ସ୍ଥାନରେ ଯାଗା ପାଇଥିବା ପନ୍ତ।
ପ୍ରଥମଟି ପୁକୋଭସ୍କି ୨୬ ରନ୍ କରିଥିବାବେଳେ ରବିଚନ୍ଦ୍ରନ ଅଶ୍ୱିନଙ୍କ ବଲରେ କ୍ୟାଚ୍ ଧରିବାରେ ପନ୍ତ ବିଫଳ ହୋଇଥିଲେ। ଅଷ୍ଟ୍ରେଲିଆନ ଓପନର ଆଉ ୬ ରନ୍ ଯୋଡ଼ିବା ପରେ ପନ୍ତଙ୍କ ଯୋଗୁ ମହମ୍ମଦ ସିରାଜଙ୍କ ବଲରେ ପୁଣି ଥରେ ପାଇଥିଲେ ଜୀବନ ଦାନ।
ଉଲ୍ଲେଖଥାଉ କି, ଶାହା ପ୍ରଥମ ଟେଷ୍ଟ ଖେଳିବା ପରେ ପନ୍ତଙ୍କୁ ଦଳରେ ସାମିଲ କରାଯାଇଥିଲା। ୨୦୧୮ରେ ଟେଷ୍ଟ ପଦାର୍ପଣ କରିଥିବା ପନ୍ତ ହାରାହାରି ୦.୮୬ କ୍ୟାଚ୍ ହାତଛଡ଼ା କରୁଛନ୍ତି। ୧୦ ଟେଷ୍ଟ ମ୍ୟାଚ୍ ଖେଳିଥିବା ଉଇକେଟକିପରଙ୍କ ମଧ୍ୟରେ ଏହା ସବୁଠୁ ଖରାପ ରେକର୍ଡ, ଯାହାକି କ୍ରିକେଟ ଡାଟା ଆନାଲିସିସ କରୁଥିବା କ୍ରିକଭିଜ୍ ପକ୍ଷରୁ କୁହାଯାଇଛି। ଏହା ଅନୁଯାୟୀ, ପେସରଙ୍କ ବଲରେ ୯୩ ପ୍ରତିଶତ କ୍ୟାଚ୍ ଧରୁଥିବା ପନ୍ତ ସ୍ପିନରଙ୍କ ବିପକ୍ଷରେ ୫୬ ପ୍ରତିଶତ କ୍ୟାଚ୍ ଧରୁଛନ୍ତି।