ସିଡନୀ,୩।୧: ସିଡନୀ ଟେଷ୍ଟର ପ୍ରଥମ ଇନିଂସରେ ୧୮୫ ରନରେ ଟିମ ଇଣ୍ଡିଆ ଅଲଆଉଟ ହୋଇଥିଲା। ରିଷଭ ପନ୍ତ ୪୦ ରନର ଏକ ଗୁରୁତ୍ୱପୂର୍ଣ୍ଣ ଇନିଂସ ଖେଳିଥିଲେ। ଏହି ଇନିଂସରେ ପନ୍ତ ଗୁରୁତର ଆହତ ହୋଇଥିଲେ। କିନ୍ତୁ ସେ ହାର ମାନି ନ ଥିଲେ। ଏହି ମ୍ୟାଚ ସମୟରେ ରିଷଭ ପନ୍ତ ତାଙ୍କ ନାମରେ ଛକାର ବଡ଼ ରେକର୍ଡ କରିଥିଲେ। ସେ ସଚିନ ତେନ୍ଦୁଲକରଙ୍କ ସମେତ ଅନେକ କିମ୍ବଦନ୍ତୀ ଖେଳାଳିଙ୍କୁ ପଛରେ ପକାଇଛନ୍ତି।
ଭାରତର ପ୍ରଥମ ଇନିଂସ ସମୟରେ ରିଷଭ ପନ୍ତ ପାଞ୍ଚ ନମ୍ବରରେ ବ୍ୟାଟିଂ କରିବାକୁ ଆସିଥିଲେ। ସେ ୯୮ ବଲର ସମ୍ମୁଖୀନ ହୋଇ ୪୦ ରନ ସ୍କୋର କରିଥିଲେ। ପନ୍ତଙ୍କ ଇନିଂସରେ ୩ ଚୌକା ଓ ଗୋଟିଏ ଛକା ସାମିଲ ଥିଲା। ତାଙ୍କୁ ସ୍କଟ ବୋଲାଣ୍ଡ ଆଉଟ୍ କରିଥିଲେ। ଏହି ଇନିଂସରେ ପନ୍ତ ଆହତ ହୋଇଥିଲେ। ବଲଟି ତାଙ୍କ ହାତକୁ ଧକ୍କା ଦେଇଥିଲା। ଏହାଦ୍ୱାରା ରକ୍ତ ଜମାଟ ବାନ୍ଧିଥିଲା। କିନ୍ତୁ ପନ୍ତ ଏକ ଉପଯୁକ୍ତ ଉତ୍ତର ଦେଇଥିଲେ। ସେ ଭାରତ ପାଇଁ ଗୁରୁତ୍ୱପୂର୍ଣ୍ଣ ଇନିଂସ ଖେଳିବା ପରେ ଆଉଟ ହୋଇଥିଲେ।
ଅଷ୍ଟ୍ରେଲିଆରେ ସର୍ବାଧିକ ଟେଷ୍ଟ ଛକା ମାରିବା ମାମଲାରେ ପନ୍ତ ରୋହିତ ଶର୍ମାଙ୍କୁ ପଛରେ ପକାଇ ଦେଇଛନ୍ତି। ପନ୍ତ ମୋଟ ୧୧ ଛକା ମାରିଛନ୍ତି। ରୋହିତ ୧୦ଟି ଛକା ମାରିଛନ୍ତି। ଏହି ପ୍ରସଙ୍ଗରେ ନୀତୀଶ କୁମାର ରେଡ୍ଡୀ ତୃତୀୟ ସ୍ଥାନରେ ଅଛନ୍ତି। ସେ ୮ଟି ଛକା ମାରିଛନ୍ତି। ବୀରେନ୍ଦ୍ର ସେହ୍ବାଗ ମଧ୍ୟ ୮ଟି ଛକା ମାରିଛନ୍ତି। ସଚିନ ୭ଟି ଛକା ମାରିଛନ୍ତି।
