ଲଣ୍ଡନ,୨୨।୧୦: ବ୍ରିଟେନରେ ବର୍ତ୍ତମାନ ରାଜନୈତିକ ଅସ୍ଥିରତା ଦେଖାଦେଇଥିବା ବେଳେ ପୁଣିଥରେ ପ୍ରଧାନମନ୍ତ୍ରୀ ପଦ ପାଇଁ ନିର୍ବାଚନ ଅନୁଷ୍ଠିତ ହେବ। ଲିଜ୍ ଟ୍ରସଙ୍କ ଇସ୍ତଫା ପରେ ଏହାର ସିଧାସଳଖ ଲାଭ ଭାରତୀୟ ବଂଶୋଦ୍ଭବ ରୁଷି ସୁନକଙ୍କୁ ମିଳିବ ବୋଲି ଚର୍ଚ୍ଚା ହେଉଛି। ବର୍ତ୍ତମାନ ଏହି ଦୌଡ଼ରେ ସେ ଆଗରେ ଅଛନ୍ତି। ତାଙ୍କ ବ୍ୟତୀତ ବୋରିସ ଜନ୍ସନ୍ ଏବଂ ବରିଷ୍ଠ କ୍ୟାବିନେଟ ସଦସ୍ୟ ପେନ୍ନି ମୋର୍ଡଣ୍ଟ ମଧ୍ୟ ଏହି ରେସ୍ରେ ଅଛନ୍ତି। କିନ୍ତୁ ସବୁଠାରୁ ବଡ କଥା ହେଉଛି ନାମାଙ୍କନ ପ୍ରକ୍ରିୟା ଦୌଡ଼ରେ ସୁନକ ବାଜି ମାରିନେଇଛନ୍ତି। କାରଣ ତାଙ୍କୁ ନାମାଙ୍କନ ପାଇଁ ଆବଶ୍ୟକ ୧୦୦ କଞ୍ଜରଭେଟିଭ୍ ନେତାଙ୍କ ସମର୍ଥନ ମିଳିସାରିଛି। ନାମାଙ୍କନ ପାଇଁ ଅକ୍ଟୋବର ୨୪ ହେଉଛି ଶେଷ ଦିନ। ଲିଜ୍ଙ୍କ ଇସ୍ତଫା ପରେ ଶାସକ କଞ୍ଜରଭେଟିଭ୍ ପାର୍ଟିକୁ ଏକ ସପ୍ତାହ ମଧ୍ୟରେ ବ୍ରିଟେନର ନୂତନ ପ୍ରଧାନମନ୍ତ୍ରୀଙ୍କୁ ଶପଥ ଗ୍ରହଣ କରାଇବାକୁ ପଡିବ। ସୂଚନାଯୋଗ୍ୟ, ଗୁରୁବାର ଲିଜ୍ ଟ୍ରସ ୪୫ଦିନ ପରେ ପ୍ରଧାନମନ୍ତ୍ରୀ ପଦରୁ ଇସ୍ତଫା ଦେଇଥିଲେ। ଏଭଳି ପରିସ୍ଥିତିରେ ପୁଣି ଥରେ ଏଠାରେ ରାଜନୈତିକ ସଙ୍କଟ ଦେଖାଦେଇଛି। ଦେଶବାସୀ ପୁଣିଥରେ ନିଜର ପ୍ରଧାନମନ୍ତ୍ରୀ ଚୟନ କରିବେ। ଲିଜ୍ଙ୍କ ଇସ୍ତଫା ପରେ ବ୍ରିଟେନର ପରବର୍ତ୍ତୀ ପ୍ରଧାନମନ୍ତ୍ରୀ କିଏ ହେବେ ସେନେଇ ଚର୍ଚ୍ଚା ଜୋର ଧରିଛି।
