ଲଣ୍ଡନ,୨୫ ।୧୦: ଋଷି ସୁନକ ବ୍ରିଟେନର ପ୍ରଥମ ଭାରତୀୟ ବଂଶୋଦ୍ଭବ ପ୍ରଧାନମନ୍ତ୍ରୀ ନିର୍ବାଚିତ ହୋଇଛନ୍ତି । ୪୨ ବର୍ଷୀୟ ଋଷି ସୁନକ କ୍ରିକେଟ ଖେଳିବାକୁ ଓ ମନ୍ଦିର ଯିବାକୁ ପସନ୍ଦ କରନ୍ତି । ଭାରତୀୟ ମୂଳ ବାସିନ୍ଦା ଋଷି ସୁନକ ବ୍ରିଟେନର ନୂଆ ପ୍ରଧାନମନ୍ତ୍ରୀ ହେବାକୁ ଯାଉଛନ୍ତି । ବ୍ରିଟେନ ଇତିହାସରେ ଏହା ପ୍ରଥମଥର ହେବାକୁ ଯାଉଛି କି କେହି ଭାରତୀୟ ପ୍ରଧାନମନ୍ତ୍ରୀ ହେବାକୁ ଯାଉଛନ୍ତି । ସୁନକଙ୍କୁ ସବୁଠାରୁ ଅଧିକ ସାଂସଦଙ୍କ ସମର୍ଥନ ମିଳିଛି ଆଉ ଏହାସହ ସେ ନୂଆ ଇତିହାସ ରଚିଛନ୍ତି ।
ଋଷି ସୁନକ ୟାର୍କଶାୟରର ସାଂସଦ ହୋଇଛନ୍ତି ସତ ହେଲେ ତାଙ୍କ ହୃଦୟରେ ଭାରତ ରହିଛି । ସୁନକ ବ୍ରିଟେନ ସଂସଦରେ ଭଗବତଗୀତା ନେଇ ଶପଥ ନେଇଥିଲେ । ଏମିତି କରିବାରେ ବ୍ରିଟେନର ପ୍ରଥମ ସାଂସଦ ଥିଲେ ସୁନକ ।
ସୁନକ ମନ୍ଦିର ଯିବାକୁ ପସନ୍ଦ କରନ୍ତି । ସେ ଏକ ସାକ୍ଷାତକାରରେ କହିଥିଲେ ଭଗବତ ଗୀତା ତାଙ୍କୁ ଚାପମୁକ୍ତ କରିବାରେ ସାହାଯ୍ୟ କରିଥାଏ । ଋଷି ତାଙ୍କ ପତ୍ନୀ ଓ ଦୁଇ ପିଲାଙ୍କ ସହ ଅଧିକାଂଶ ସମୟରେ ଶ୍ୱଶୁର ଘର ବେଙ୍ଗାଲୁରୁ ଯାଇଥାଆନ୍ତି ।
ଋଷି ସୁନକ ବ୍ରିଟେନର ଧନୀ ବ୍ୟକ୍ତିମାନଙ୍କ ମଧ୍ୟରୁ ଜଣେ । ତାଙ୍କ ନିକଟରେ ମୋଟ ୭୦୦ ମିଲିୟନ ପାଉଣ୍ଡରୁ ଅଧିକ ସମ୍ପତ୍ତି ରହିଛି । ୟାର୍କଶାୟରରେ ଏକ ବଡ ବଙ୍ଗଳା ସହିତ ଋଷି ଓ ତାଙ୍କ ପତ୍ନୀ ଅକ୍ଷରାଙ୍କ ନିକଟରେ ମଧ୍ୟ ଲଣ୍ଡନର କୈଂସିଙ୍ଗଟନରେ ଏକ ସମ୍ପତ୍ତି ରହିଛି ।
ସୁନକଙ୍କର ଦୁଇ ଝିଅ ରହିଛନ୍ତି କୃଷ୍ଣା ଓ ଅନୁଷ୍କା । ସୁନକ ଏମାନଙ୍କୁ ବହୁତ ଭଲ ପାଆନ୍ତି । ସେ କୁହନ୍ତି ପିଲାମାନେ ମୋତେ ସବୁବେଳେ ବ୍ୟସ୍ତ ରଖିଥାଆନ୍ତି । ସେମାନେ ଆମପାଇଁ ବରଦାନଠାରୁ କମ୍ ନୁହନ୍ତି । ସୁନକ ପ୍ରଥମେ ୨୦୧୫ରେ ରିଚମଣ୍ଡ(ୟାର୍କ) ନିର୍ବାଚନ ମଣ୍ଡଳୀରୁ ସାଂସଦ ନିର୍ବାଚିତ ହୋଇଥିଲେ ଓ ୨୦୧୭ ଏବଂ ୨୦୧୯ରେ ପୁଣିଥରେ ସାଂସଦ ନିର୍ବାଚିତ ହୋଇଥିଲେ । ଫିଟ୍ ରହିବାକୁ ସୁନକ ବେଶ ପସନ୍ଦ କରନ୍ତି । ସେଥିପାଇଁ ଅବସର ସମୟରେ ସେ କ୍ରିକେଟ, ଫୁଟବଲ ଖେଳିବା ସହ ଫିଲ୍ମ ଦେଖିବାକୁ ପସନ୍ଦ କରନ୍ତି ।
୧୨ ମେ ୧୯୮୦ରେ ଋଷି ସୁନକଙ୍କ ଜନ୍ମ ସାଉଥୈମପ୍ଟନ ଜେନରାଲ ହସ୍ପିଟାଲରେ ହୋଇଥିଲେ । ପିତା ୟଶବୀର ଓ ମା ଉଷା ସୁନକଙ୍କର ସେ ପ୍ରଥମ ସନ୍ତାନ । ଋଷିଙ୍କ ଜନ୍ମ ହିନ୍ଦୁ ପରିବାରରେ ହୋଇଥିବାରୁ ସେ ପିଲାଦିନୁ ମନ୍ଦିର ଯିବାକୁ ପସନ୍ଦ କରନ୍ତି । ସାଉଥୈମପ୍ଟନର ହିନ୍ଦୁ ବୈଦିକ ସୋସାଇଟି ମନ୍ଦିରର ସେ ଖୁବ୍ ଜଡିତ । କାରଣ ତାଙ୍କ ଦାଦା ରାମ ଦାସ ସୁନକ ଏହି ମନ୍ଦିରର ଫାଉଣ୍ଡିଂ ମେମ୍ବର ଥିଲେ ।