ନୂଆଦିଲ୍ଲୀ,୭।୩: ସାରା ବିଶ୍ୱରେ ଅଶୋଧିତ ତୈଳ ମୂଲ୍ୟ ଶନିବାର ରେକର୍ଡ ସ୍ତରରେ ପହଞ୍ଚିଛି। ଫଳରେ ଅନ୍ତର୍ଜାତୀୟ ବଜାରରେ ତୈଳ ବ୍ୟାରେଲ ପିଛା ଦର ୧.୪୫% ବୃଦ୍ଧି ପାଇ ୬୭.୭୧ (ନ୍ୟୁୟର୍କ) ଡଲାରରେ ପହଞ୍ଚିଛି। ଏହି ଦର ବୃଦ୍ଧି ଫଳରେ ଭାରତ ବଜାରରେ ଅଶୋଧିତ ତୈଳ ଦର ୨୮ ଟଙ୍କା ବଢ଼ି ବ୍ୟାରେଲ ପିଛା ୬୦୭୫ ଟଙ୍କା ଛୁଇଁଥିବା ଜଣାପଡ଼ିଛି। ଏଇ ନିକଟରେ ଆନ୍ତର୍ଜାତୀୟ ବଜାରରେ ତୈଳ ବ୍ୟାରେଲ ପିଛା ଦର ୧୦ ଡଲାର ବୃଦ୍ଧି ନେଇ ଗୋଲ୍ଡମ୍ୟାନ୍ ସ୍ୟାଚ୍ ପକ୍ଷରୁ କରାଯାଇଥିବା ପୂର୍ବାନୁମାନ ସତ୍ୟ ପ୍ରମାଣିତ ହେବାକୁ ଯାଉଛି । ପ୍ରାୟ ୨ ବର୍ଷ ପରେ ବ୍ୟାରେଲ ପିଛା ଦର ଉଚ୍ଚତମ ସ୍ତରରେ ପହଞ୍ଚିଥିବା ବେଳେ ପେଟ୍ରୋଲ ଓ ଡିଜେଲ ମୂଲ୍ୟ ମଧ୍ୟ ସେହି ଅନୁପାତରେ ବୃଦ୍ଧି ପାଇବା ନେଇ ଆଶଙ୍କା ସୃଷ୍ଟି ହୋଇଛି। କରୋନା ମହାମାରୀ ସମୟରେ ସାରା ବିଶ୍ୱରେ ଅନେକ ଦେଶରେ ଲକ୍ଡାଉନ୍ ଓ ଶଟ୍ଡାଉନ ଭଳି ପରିସ୍ଥିତି ଜାରି ହୋଇଥିଲା। ଫଳରେ ଏହି ସଂକ୍ରମଣ ବ୍ୟାପିବା ଯୋଗୁ ଉତ୍ପାଦନରେ ହ୍ରାସ ପାଇବା ସହ ଦର ମଧ୍ୟ ହ୍ରାସ ହୋଇଥିଲା ବର୍ତ୍ତମାନ ସମୟରେ ଅଚାନକ ଅଶୋଧିତ ତୈଳ ଦର ବଢିବା ସହ ଏହାର ଚାହିଦା ମଧ୍ୟ ବଢ଼ିଯାଇଛି। ଗୋଟିଏ ପଟେ ଚାହିଦା ବୃଦ୍ଧି ହୋଇଥିବା ବେଳେ ଅନ୍ୟପଟେ ତୈଳ ଉତ୍ପାଦନକାରୀ ଦେଶ ମଧ୍ୟରେ ବିବାଦ ଲାଗି ରହିଥିବା କାରଣରୁ ଉତ୍ପାଦନ ହ୍ରାସ ପାଉଛି। ଫଳରେ ଏହିସବୁ ଦେଶ ଉପରେ ନିର୍ଭର କରୁଥିବା ରାଷ୍ଟ୍ରଗୁଡିକରେ ତୈଳ ଉତ୍କଟ ହେବାକୁ ଯାଉଛି। ଆମେରିକା ବ୍ରେଣ୍ଟ କ୍ରୁଡ୍ ବ୍ୟାରେଲ ପିଛା ଦର ଶନିବାର ୬୭.୪୪ ଡଲାର ଉପରେ ରହିଥିବା ବେଳେ ଆମେରିକା ବଜାରରେ ତୈଳ ଦର ୫.୬% ବୃଦ୍ଧି ହୋଇଛି। ସାଉଦି ଆରବର ଉତ୍ପାଦନ ହ୍ରାସ ଆଗାମୀ ଏପ୍ରିଲ ଶେଷ ପର୍ଯ୍ୟନ୍ତ ଜାରି ରହିପାରେ ବୋଲି ଜାତୀୟ ଗଣମାଧ୍ୟମରେ ଚର୍ଚ୍ଚା ଜୋର ହେଉଛି। ବିଭିନ୍ନ ରାଷ୍ଟ୍ରର ଭିନ୍ନ ଭିନ୍ନ ନିଷ୍ପତ୍ତି ଯୋଗୁ ଦୈନିକ ୧୦ ଲକ୍ଷ ବ୍ୟାରେଲ ଉତ୍ପାଦନ ହ୍ରାସ ପାଉଛି। ଫଳରେ ଏହାର ପ୍ରଭାବ ସିଧା ବଜାର ଓ ଖାଉଟିଙ୍କ ଉପରେ ପଡୁଛି ବୋଲି ବିଶେଷଜ୍ଞମାନେ ମତବ୍ୟକ୍ତ କରିଛନ୍ତି।