ଓ୍ବାଶିଂଟନ୍,୧।୭: ଜଳବାୟୁ ପରିବର୍ତ୍ତନ ଦ୍ୱାରା କେବଳ ପ୍ରାକୃତିକ ସମ୍ପଦ ନଷ୍ଟ ହେଉଛି ତା’ ନୁହେଁ, ଏହାର ପ୍ରଭାବ ଏବେ ଦାମ୍ପତ୍ୟ ଜୀବନ ଉପରେ ପଡ଼ିବା ଆରମ୍ଭ କଲାଣି। ବୈଶ୍ୱିକ ତାପମାତ୍ରା ବର୍ଷକୁ ହାରାହାରି ୧ ଡିଗ୍ରୀ ସେଲସିୟସ୍ ବୃଦ୍ଧି ପାଇବା ଦ୍ୱାରା ୪.୫% ଇଣ୍ଟିମେଟ୍ ପର୍ଟନର ଭାଓଲେନ୍ସ (ଆଇପିଭି) ବୃଦ୍ଧି ପାଉଥିବା ଆମେରିକୀୟ ଜେଏଏମ୍ଏ ସାଇକାଟ୍ରି ଜର୍ନାଲରେ ପ୍ରକାଶିତ ଅଧ୍ୟୟନ ରିପୋର୍ଟରେ ଉଲ୍ଲେଖ କରାଯାଇଛି। ଏକବିଂଶ ଶତାବ୍ଦୀ ଶେଷ ସୁଦ୍ଧା ଦକ୍ଷିଣ ଏସୀୟ ଦେଶ ଭାରତ, ପାକିସ୍ତାନ ଓ ନେପାଳରେ ପାରିବାରିକ ହିଂସା ୨୧% ବୃଦ୍ଧି ପାଇବ ବୋଲି ବିଶେଷଜ୍ଞମାନେ ଆକଳନ କରିଛନ୍ତି। ନେପାଳ, ପାକିସ୍ତାନ ତୁଳନାରେ ଭାରତରେ ସର୍ବାଧିକ ୨୩.୫% ଆଇପିଭି ଘଟିବ ବୋଲି ଅଧ୍ୟୟନ ରିପୋର୍ଟରେ ଦର୍ଶାଯାଇଛି। ବିଶ୍ୱ ତୁଳନାରେ ଦକ୍ଷିଣ ଏସୀୟ ଦେଶରେ ସବୁଠାରୁ ଅଧିକ ଘରୋଇ ହିଂସା ଘଟିବାର ମୁଖ୍ୟ କାରଣ ଗ୍ରୀଷ୍ମ ପ୍ରବାହ। ୨୦୧୦ରୁ ୨୦୧୮ ମଧ୍ୟରେ ମହିଳାଙ୍କ ଉପରେ ହୋଇଥିବା ଶାରୀରିକ ଏବଂ ଯୌନ ହିଂସାର ତଥ୍ୟକୁ ଆଧାର କରି ଉକ୍ତ ରିପୋର୍ଟ ପ୍ରସ୍ତୁତ କରାଯାଇଛି। ୧୫ରୁ ୪୯ ବୟସ ବର୍ଗର ମୋଟ ୧୯୪,୮୭୧ ଜଣ ଯୁବତୀ ଓ ମହିଳାଙ୍କୁ ଏଥିରେ ସାମିଲ କରାଯାଇଥିଲା। ବୈଶ୍ୱିକ ତାପମାତ୍ରା ବର୍ଷକୁ ହାରାହାରି ୧ ଡିଗ୍ରୀ ସେଲ୍ସିୟସ୍ ବୃଦ୍ଧି ଘଟିବା ଦ୍ୱାରା ଦକ୍ଷିଣ ଏସୀୟ ଦେଶରେ ୬.୩% ରୁ ଅଧିକ ଶାରୀରିକ ଓ ଯୌନ ହିଂସା ଘଟୁଥିବା ଆକଳନ କରାଯାଇଛି।
ଅନ୍ୟପକ୍ଷେ ତାପମାତ୍ରା ବୃଦ୍ଧି ଯୋଗୁ ଫସଲ ନଷ୍ଟ ହୁଏ, ଯେଉଁଥିଲାଗି କୃଷକର ଆୟ କମିଯାଏ। ଫଳରେ ସେମାନଙ୍କୁ ଘରେ ବସି ରହିବାକୁ ପଡ଼େ। ଅର୍ଥାଭାବ ଯୋଗୁ ଘର ଚଳାଇବା ଚିନ୍ତା ମାଡ଼ିବସେ, ଯେଉଁ କାରଣରୁ ଘରୋଇ ହିଂସା ଘଟୁଥିବା ୟାଲେ ୟୁନିଭର୍ସିଟିର ଏନ୍ଭାଇରନମେଣ୍ଟାଲ ହେଲ୍ଥ ପ୍ରଫେଶର ମାଇକେଲ ବେଲ୍ କହିଛନ୍ତି। ଖାଲି ଘରୋଇ ହିଂସା ନୁହେଁ ବରଂ ତାପମାତ୍ରା ବୃଦ୍ଧି ଲୋକଙ୍କ ମାନସିକ ଚିନ୍ତା ମଧ୍ୟ ବଢ଼ାଇ ଦେଇଛି।