ନୂଆଦିଲ୍ଲୀ,୧୩।୯: ଦେଶରେ କରୋନା ମହାମାରୀର ତୃତୀୟ ଲହର ଆସିବା ଆଶଙ୍କା କମ୍ ରହିଛି। ତେବେ ସ୍କୁଲ ଖୋଲିବା ନେଇ ସରକାର ବୁଝି ବିଚାରି ନିଷ୍ପତ୍ତି ଗ୍ରହଣ କରିବା ଆବଶ୍ୟକ ବୋଲି ଆଇସିଏମ୍ଆର୍ର ପୂର୍ବତନ ବୈଜ୍ଞାନିକ ଡ. ରମନ ଗଙ୍ଗାଖେଡ଼କର କହିଛନ୍ତି। କରୋନା ମହାମାରୀର ତୃତୀୟ ଲହର ଆସିଲେ ବି ଏହା ଦୁର୍ବଳ ରହିବ।
କିନ୍ତୁ କେତେକ ଗବେଷଣା ଅନୁସାରେ ଛୋଟ ପିଲାଙ୍କ ଉପରେ ତୃତୀୟ ଲହରର ପ୍ରଭାବ ଦୀର୍ଘ ସମୟ ପର୍ଯ୍ୟନ୍ତ ରହିବାର ଆଶଙ୍କା ଥିବାରୁ ସ୍କୁଲ ଖୋଲିବା ପୂର୍ବରୁ ସରକାର ଚିନ୍ତା କରିବା ଅପରିହାର୍ଯ୍ୟ ହୋଇ ପଡ଼ିଛି ବୋଲି ସେ କହିଛନ୍ତି। ତରବରିଆ ଭାବେ ସ୍କୁଲ ଖୋଲିବା ଉଚିତ ନୁହେଁ ବୋଲି ସେ କହିଛନ୍ତି।
ସମ୍ପ୍ରତି ଦେଶର କେତେକ ଅଞ୍ଚଳରେ କରୋନା ସଂକ୍ରମଣ ବୃଦ୍ଧି ପାଉଛି। ଭାକ୍ସିନ୍ ନେବା ପରେ ଶରୀରରେ ଉପଯୁକ୍ତ ରୋଗ ପ୍ରତିରୋଧକ ଶକ୍ତି ସୃଷ୍ଟି କରିବାକୁ ସକ୍ଷମ ହୋଇ ପାରୁ ନାହିଁ। ଦେଶରେ ଦିଆଯାଉଥିବା ଭାକ୍ସିନ୍ ଡୋଜ୍ କରୋନାରେ ହେଉଥିବା ମୃତ୍ୟୁ ସଂଖ୍ୟାକୁ ହ୍ରାସ କରିବାକୁ ସକ୍ଷମ ହେଉଛି। ମାତ୍ର ସଂକ୍ରମଣରୁ ସୁରକ୍ଷା ଦେବାରେ ସମ୍ପୂର୍ଣ୍ଣ ସକ୍ଷମ ହୋଇ ପାରୁ ନାହିଁ ବୋଲି ସେ କହିଛନ୍ତି।
ଯେ ପର୍ଯ୍ୟନ୍ତ କୌଣସି ନୂଆ ଭାରିଆଣ୍ଟ ଚିହ୍ନଟ ନ ହୋଇଛି ଅବା ଭାକ୍ସିନ୍ କାମ କରିବା ବନ୍ଦ ନ କରିଛି ସେ ପର୍ଯ୍ୟନ୍ତ ଦୈନିକ ସଂକ୍ରମଣର ବଢୁଥିବା ଗ୍ରାଫ୍ ନେଇ ଚିନ୍ତା କରିବାର ଆବଶ୍ୟକତା ନାହିଁ। ତେଣୁ ଭୟ ନ କରି କରୋନା ମାର୍ଗଦର୍ଶିକା ପାଳନ କରିବା ଉଚିତ ବୋଲି ସେ କହିଛନ୍ତି। ଯେଉଁମାନେ ଭାକ୍ସିନ୍ ନେଇ ନାହାନ୍ତି ସେମାନଙ୍କ ଉପରେ ବିପଦ ରହିଥିବା ସେ କହିଛନ୍ତି।