ଭଞ୍ଜନଗର,୧୬।୯(ଡି.ଏନ.ଏ): ପଡ଼ୋଶୀ ଆନ୍ଧ୍ରପ୍ରଦେଶ ସମେତ ଅନ୍ୟ କେତେକ ରାଜ୍ୟରେ ବର୍ତ୍ତମାନ ଗୋରୁଙ୍କୁ ଚର୍ମ ରୋଗ ଲୁମ୍ପି ହେଉଛି । ଏଥିରେ ବହୁ ଗାଈ, ବାଛୁରୀ ମରିଯାଉଛନ୍ତି। ଆନ୍ଧ୍ରପ୍ରଦେଶରେ ଗୋରୁଙ୍କୁ ଏହି ରୋଗ ହେଉଥିବା ବେଳେ ପଡ଼ୋଶୀ ଗଞ୍ଜାମ ଜିଲାରେ ମଧ୍ୟ ଏହା ହେବା ଆଶଙ୍କା ରହିଛି ।
ଜଗନ୍ନାଥପ୍ରସାଦ ବ୍ଲକ ଦୁବରେ ରହୁଥିବା ରାଜ୍ୟର ଅଗ୍ରଣୀ ଚାଷୀ ସୁଶାନ୍ତ ପ୍ରଧାନଙ୍କ ଗତ ଦୁଇ ଦିନରେ ୨ଟି ଗାଈର ମୃତ୍ୟୁ ହୋଇଛି। ଗତ ଗୁରୁବାର ଏକ ଗାଈ ଅସୁସ୍ଥ ହେବାରୁ ସୁଶାନ୍ତ ବିଭାଗୀୟ ଅଧିକାରୀଙ୍କୁ ଜଣାଇଥିଲେ। ହେଲେ ଗାଈକୁ କେହି ଦେଖିବାକୁ ଆସି ନ ଥିଲେ। ଆବଶ୍ୟକ ଚିକିତ୍ସା ନ ମିଳିବାରୁ ଗାଈଟିର ମୃତ୍ୟୁ ଘଟିଥିଲା। ପରେ ଏକାଧିକ ଅଧିକାରୀ ଆସି ତଦନ୍ତ କରିଛନ୍ତି।
ଚାଷୀ ସୁଶାନ୍ତ କହିଛନ୍ତି, ଗାଈର କେଉଁ ରୋଗରେ ମୃତ୍ୟୁ ହେଲା ତାହା ଜଣାପଡ଼ିନାହିଁ । ବର୍ତ୍ତମାନ ଲୁମ୍ପି ଚାରିଆଡ଼େ ବ୍ୟାପୁଛି । ଅଞ୍ଚଳର ଆଉ କେତେକ ଗାଈ ଏହିଭଳି ହଠାତ୍ ଅସୁସ୍ଥ ହୋଇ ମରୁଛନ୍ତି । ଏନେଇ ଭଞ୍ଜନଗର ଏସ୍ଡିଭିଓ ପିକେ ନାୟକ କହିଛନ୍ତି, ଭଞ୍ଜନଗର ଉପଖଣ୍ଡରେ ଲୁମ୍ପି ରୋଗରେ କୌଣସି ଗାଈ ମରି ନାହାନ୍ତି। ଆନ୍ଧ୍ରପ୍ରଦେଶରୁ ଆମ ରାଜ୍ୟକୁ ବର୍ତ୍ତମାନ ଏହି ରୋଗ ଆସିବା ସମ୍ଭାବନା ରହିଛି । ତେଣୁ ପ୍ରଶାସନ ପକ୍ଷରୁ ରାଜ୍ୟ ସୀମାରେ ସମସ୍ତ ପଦକ୍ଷେପ ନିଆଯାଉଛି । କର୍ମଚାରୀ ଅଭାବ ଯୋଗୁ ଚିକିତ୍ସା ସେବା ଯୋଗାଇବାରେ ଅସୁବିଧା ହେଉଛି । ତଥାପି ଯଥାସମ୍ଭବ ସେବା ଯୋଗାଇବା ପାଇଁ ପଦକ୍ଷେପ ନିଆଯାଉଛି ।
