ରାଜନଗର, ୧୯ା୧୧(ଡି.ଏନ.ଏ.): ରାଜନଗର ବ୍ଲକ ଏକ ନଦୀ ଘେରା ଅଞ୍ଚଳ। ଅଞ୍ଚଳବାସୀଙ୍କର ଏକମାତ୍ର ଖରିଫ ଧାନ ଫସଲ ଆଶା ଓ ଭରସା ହୋଇଥିଲା। ହେଲେ କ୍ଷେତରେ ପାଣି ନ ଥିବାରୁ ଏହା ଉଜୁଡିବ ଆଶଙ୍କା ପ୍ରକାଶ ପଶଛି। ୨ ବର୍ଷ ହେଲା କ୍ରମାଗତ ବାତ୍ୟା ଯୋଗୁ ସମ୍ପୂର୍ଣ୍ଣ ପାଚିଲା ଧାନ ଫସଲ ବିଲରେ ନଷ୍ଟ ହୋଇଯାଇଥିଲା। ବାତ୍ୟା ପ୍ରଭାବରେ ଯେତେବେଳେ ଧାନ ଅମଳ କରି ଖଳାକୁ ଆଣିବା କଥା, ଠିକ୍ ସେହି ସମୟରେ ବର୍ଷା ପାଣି ଚାଷ ଜମିକୁ ବୁଡାଇ ରଖିଲା। ଚଳିତବର୍ଷ ନିଜର ଆର୍ଥତ୍କ ମେରୁଦଣ୍ଡକୁ ସଳଖ କରିବାକୁ ଚାଷୀ ଖରିଫ ଚାଷ କାର୍ଯ୍ୟ ଆରମ୍ଭ କରିଥିଲେ। ତଳି ପକାଇବାଠାରୁ ରୁଆ ବେଉଷଣ ପର୍ଯ୍ୟନ୍ତ ଅଦିନିଆ ବର୍ଷା ଚାଷ କାର୍ଯ୍ୟକୁ ବିଳମ୍ବିତ କରିଥିଲା। ଶେଷରେ ଚାଷୀ ରୁଆ ବେଉଷଣ କରିଥିଲେ। ଧାନ ଗର୍ଭ ହେବା ପରଠାରୁ ବର୍ଷା ଆଉ ହୋଇ ନହିଁ। ସେବେଠୁଁ ଆଜି ଯାଏଁ ବର୍ଷା ନ ହେବାରୁ ଜମି ଫାଟି ଆଁ କଲାଣି। ଫଳରେ ଥୋଡ ଧାନଗୁଡିକ ପାଚିବା ସମ୍ଭବ ହୋଇପାରୁନାହିଁ। ତେଣୁ ଚାଷୀମାନେ ଦଣ୍ଡା, ପୋଖରୀରୁ ପାଣି ବୁହାଇବାରେ ଲାଗି ପଡିଛନ୍ତି। ଯେହେତୁ ଏ ଅଞ୍ଚଳ ଅଣଜଳସେଚିତ ତେଣୁ କେନାଲର ସୁବିଧା ନାହିଁ। ଚାଷୀମାନେ ବର୍ଷା ଉପରେ ହିଁ ନିର୍ଭର କରିଥାନ୍ତି। ବର୍ଷା ନ ହେବାରୁ ବର୍ଷକର ଭାତ ହାଣ୍ଡି ଉଜୁଡି ଯିବାକୁ ବସିଲାଣି। ଏହି ଚିନ୍ତାରେ ଚାଷୀ ପଡିଛନ୍ତି। ଚାଷୀ ଋଣ କରି ଧାନ ରୁଆ ବେଉଷଣ ସମୟରେ ଚଢା ଦରରେ ବିହନ କିଣିବା ସହ ମଜୁରୀ ଦେଇ ରୋଇବା, ହଳ ଲଙ୍ଗଳରେ ଚାଷ କରିବାରେ ବହୁ ଖର୍ଚ୍ଚାନ୍ତ ହୋଇଥିଲେ। ଏବେ ଜମିରେ ପାଣି ନ ଥିବାରୁ ଚାଷୀମାନେ ମୁଣ୍ଡରେ ହାତ ଦେଇ ବସିଛନ୍ତି। ରାଜନଗର ବ୍ଲକ ଅଧୀନ ୨୯ଟି ପଞ୍ଚାୟତରେ ପ୍ରାୟ ୧୨ହଜାର ହେକ୍ଟରରୁ ଊର୍ଦ୍ଧ୍ୱ ଜମିରେ ଖରିଫ ଧାନ ଚାଷ କରାଯାଇଥିଲା। ଚଳିତବର୍ଷ ଥୋଡ ବାହାରକ ୁଓ ମାଟିଆଗୁଣ୍ଡିଠାରୁ ଆରମ୍ଭ କରି ବିଭିନ୍ନ ପୋକ ଧାନ ଫସଲକୁ ନଷ୍ଟ କରିଛନ୍ତି। ପ୍ରତିକୂଳ ପରିସ୍ଥିତିକୁ ସାମ୍ନା କରି ଚାଷୀ ବର୍ଷା ଅସରାଏକୁ ଅପେକ୍ଷା କରିଥିଲେ। ବର୍ଷା ଅଭାବରୁ ଏ ବର୍ଷ ଚାଷୀ ଆଶାନୁରୂୂପକ ଫସଲ ପାଇବା ଏକ ପ୍ରକାର ସ୍ବପ୍ନ ପାଲଟିବ ବୋଲି ଚାଷୀ ରବୀନ୍ଦ୍ର ନାଏକ, ଅକ୍ଷୟ ନାୟକ, ଧ୍ରୁବ ଚରଣ ସ୍ବାଇଁ, ମହେଶ୍ୱର ପ୍ରଧାନ, କ୍ଷୀରୋଦ କୁମାର ରାଉତ, ମହେଶ୍ୱର ବିଶ୍ୱାଳ ପ୍ରମୁଖ କହିଛନ୍ତି।
