ବାଙ୍ଗିରିପୋଷି,୩୦ା୬(ଡି.ଏନ୍.ଏ.): ପଶ୍ଚିମବଙ୍ଗର ମୁର୍ଶୀଦାବାଦ ଅଞ୍ଚଳରୁ ମୟୂରଭଞ୍ଜ ଜିଲା ବାଙ୍ଗିରିପୋଷି ବ୍ଲକ ଅଞ୍ଚଳକୁ ଲୁଚାଛପାରେ ଆସି ମିସ୍ତ୍ରୀ କାମ କରୁଥିବା ଲୋକଙ୍କ ପାଇଁ କରୋନା ସଂକ୍ରମଣ ବଢ଼ିବା ଆଶଙ୍କା ସୃଷ୍ଟି ହୋଇଛି। ଏଥିରେ ରୋକ୍ ଲଗାଇବା ପାଇଁ ପ୍ରଶାସନ ତତ୍ପର ହୋଇଛି। ସୋମବାର ବାଙ୍ଗିରିପୋଷି ବ୍ଲକ ଅଧ୍ୟକ୍ଷ ସୁବୋଧ ମାର୍ଣ୍ଡୀଙ୍କ ଅଧ୍ୟକ୍ଷତାରେ ବ୍ଲକ ସଭା ଗୃହରେ ଏକ ବୈଠକ ଅନୁଷ୍ଠିତ ହୋଇ ରାଜ୍ୟ ବାହାରୁ ଆସୁଥିବା ଲୋକଙ୍କ ଉପରେ ନଜର ରଖିବା ପାଇଁ ଏକ ଓ୍ବାଚ୍ କମିଟି ଗଠନ କରାଯାଇଛି। କମିଟିରେ ସ୍ଥାନୀୟ ୱାର୍ଡ ସଭ୍ୟ ଅଧ୍ୟକ୍ଷ ଭାବେ କାର୍ଯ୍ୟ କରିବା ସହ ଆଶା, ଅଙ୍ଗନଓ୍ବାଡି ଓ ସ୍ବାସ୍ଥ୍ୟ କର୍ମୀଙ୍କୁ ସାମିଲ କରାଯାଇଛି ା ଏହି କମିଟି ବାହାର ରାଜ୍ୟର ଲୋକଙ୍କ ଗତିବିଧିକୁ ଲକ୍ଷ୍ୟ କରି ସ୍ଥାନୀୟ ସରପଞ୍ଚଙ୍କୁ ଅବଗତ କରାଇବା ପରେ ସରପଞ୍ଚ ବ୍ଲକରେ ଜଣାଇବେ ବୋଲି ବୈଠକରେ ନିଷ୍ପତ୍ତି ହୋଇଥିଲା। ବୈଠକରେ ତହସିଲଦାର ଅଭିମନ୍ୟୁ ପଣ୍ଡା, ଥାନା ଅଧିକାରୀ ଦୟାନିଧି ଦାସ, ଏବିଡିଓ ରୂପେଶ ନାଏକ, ବ୍ଲକ ସହକାରୀ ଯନ୍ତ୍ରୀ ଯୋଗେଶ୍ୱର ବେହେରା, ପୂର୍ବତନ ବ୍ଲକ ଅଧ୍ୟକ୍ଷ ତଥା ଦିଘି ସମିତି ସଭ୍ୟ ରାମଚନ୍ଦ୍ର ମୁର୍ମୁ, ବିଶ୍ୱଜିତ ଶର୍ମାଙ୍କ ସମେତ ୧୯ଟି ପଞ୍ଚାୟତର ସରପଞ୍ଚ ଓ ସ୍ବାସ୍ଥ୍ୟ ବିଭାଗର କର୍ମଚାରୀମାନେ ଉପସ୍ଥିତ ଥିଲେ।
ଉଲ୍ଲେଖଯୋଗ୍ୟ ଯେ, ଓଡ଼ିଶାରେ ରହି କାର୍ଯ୍ୟ କରୁଥିବା ଅନ୍ୟ ରାଜ୍ୟର ଶ୍ରମିକ ତଥା ମିସ୍ତ୍ରୀମାନଙ୍କୁ ସେମାନଙ୍କ ଘରକୁ ପଠାଇ ଦିଆଯାଇଛି। ତେବେ ରାଜ୍ୟର କୋଣ ଅଣୁକୋଣରେ କରୋନା ଆକ୍ରାନ୍ତଙ୍କ ସଂଖ୍ୟା ବଢି ଚାଲିଥିବା ବେଳେ ପ୍ରଥମ ଲକଡାଉନ ସମୟରେ ଘରକୁ ପଳାଇଥିବା ପଶ୍ଚିମବଙ୍ଗ ରାଜ୍ୟର ମୁର୍ଶୀଦାବାଦ ଅଞ୍ଚଳର ମିସ୍ତ୍ରୀମାନେ ଲୁଚି ଲୁଚି ଫେରିବାକୁ ଲାଗିଛନ୍ତି। ମହାମାରୀ ସମୟରେ ସତର୍କ ରହିବା ବଦଳରେ କେତେକ ଲୋକ ସେମାନଙ୍କୁ ଡାକି ଆଣି ନିଜ କାମ କରାଉଛନ୍ତି। ଫଳରେ ସଂକ୍ରମଣ ବଢ଼ିବା ଆଶଙ୍କାରେ ଅଞ୍ଚଳବାସୀ ଭୟଭୀତ ହୋଇ ପଡ଼ିଛନ୍ତି। ଯଦି କେହି ବାହାର ରାଜ୍ୟରୁ ଆସୁଥିବା ଲୋକଙ୍କୁ ଲୁଚାଇବାକୁ ଚେଷ୍ଟା କରିନ୍ତି ତେବେ ସେମାନଙ୍କ ବିରୋଧରେ ଥାନାରେ ମାମଲା ରୁଜୁ ହେବ ବୋଲି ଥାନା ଅଧିକାରୀ ଦାସ ପ୍ରକାଶ କରିଛନ୍ତି।