ଖୋର୍ଦ୍ଧା ଅଫିସ,୨।୮: ପୁରୀ ଶ୍ରୀମନ୍ଦିରରେ ମହାପ୍ରଭୁଙ୍କ ତୁଳସୀକୁ ନେଇ ପ୍ରାଚୀନ କାଳରୁ ବିଶେଷ ମହତ୍ତ୍ୱ ରହି ଆସିଛି। ମହାପ୍ରଭୁଙ୍କ ମଇଲମ ନୀତି, ଭୋଗ ନୀତି, ଶ୍ରୀଅଙ୍ଗ ଭଳି ପ୍ରତିଟି କାର୍ଯ୍ୟରେ ତୁଳସୀ ବ୍ୟବହାର ହୋଇଥାଏ। ଏଥିଲାଗି ଶ୍ରୀମନ୍ଦିର ପ୍ରଶାସନ ପକ୍ଷରୁ ତୁଳସୀ ଉପବନ ରହିଛି। ଏହା ସହ ଶ୍ରୀକ୍ଷେତ୍ରର ବିଭିନ୍ନ ମଠ ଏବଂ ବିଭିନ୍ନ ସ୍ଥାନରୁ ମହାପ୍ରଭୁଙ୍କ ଲାଗି ତୁଳସୀ ଶ୍ରୀମନ୍ଦିରକୁ ଆସିଥାଏ। ଗଡ଼ଖୋର୍ଦ୍ଧାରେ ରହୁଥିବା ପ୍ରଫୁଲ୍ଲ ସାହୁ ଓ ତାଙ୍କ ସ୍ତ୍ରୀ ସୌଦାମିନୀ ଗତ ୧୪ବର୍ଷ ଧରି ମହାପ୍ରଭୁଙ୍କ ଏକାଦଶୀ ଲାଗି ତୁଳସୀ ଯୋଗାଇ ଆସୁଛନ୍ତି। ନିଷ୍ଠା ଏବଂ ରୀତିନୀତିରେ ବିଭିନ୍ନ ସ୍ଥାନରୁ ତୁଳସୀ ସଂଗ୍ରହ କରି ଶ୍ରୀମନ୍ଦିରକୁ ପଠାଇଥାନ୍ତି।
ପ୍ରଫୁଲ୍ଲଙ୍କ କହିବାନୁଯାୟୀ, ପ୍ରତ୍ୟେକ ମାସରେ ଆମେ ସ୍ବାମୀ ସ୍ତ୍ରୀ ମହାପ୍ରଭୁଙ୍କ ଏକାଦଶୀ ଦର୍ଶନ ଲାଗି ପୁରୀ ଯାଇଥାଉ। ୨୦୦୬ ମସିହାରେ ଦିନେ କୋଇଲି ବୈକୁଣ୍ଠରେ କେତେଜଣ ଫୁଲ ଗୁନ୍ଥାଳି ମହାପ୍ରଭୁଙ୍କ ଲାଗି ଫୁଲ ଗୁନ୍ଥୁଥିବା ଦେଖି ଆମେ ମଧ୍ୟ ଫୁଲ ଗୁନ୍ଥିବାକୁ ଆଗ୍ରହ ପ୍ରକାଶ କରିଥିଲୁ। ହେଲେ ସେମାନେ ଏଥିଲାଗି ମନା କରିଥିଲେ। ମହାପ୍ରଭୁଙ୍କ ଦୈନିକ ରୀତିନୀତି ଲାଗି ଫୁଲ ତୁଳସୀର ଅଭାବ ରହୁଛି। ଆପଣ ଚାହିଁଲେ ମହାପ୍ରଭୁଙ୍କ ଲାଗି ଫୁଲ ତୁଳସୀ ଆଣି ଦେଇପାରିବେ ବୋଲି ସେମାନେ କହିଥିଲେ। ଏହା ପରେ ମହାପ୍ରଭୁଙ୍କୁ ଗୁହାରି ଜଣାଇ ଫେରିଥିଲୁ। ସେହିଦିନ ରାତିରେ ମହାପ୍ରଭୁଙ୍କ ସାନିଧ୍ୟ ଲାଭ କରିଥିଲି।
ତା’ପର ଦିନ ସକାଳେ ବିଭିନ୍ନ ସ୍ଥାନରୁ ତୁଳସୀ ସଂଗ୍ରହ କରି ଏକ ବ୍ୟାଗରେ ଶ୍ରୀକ୍ଷେତ୍ର ତୁଳସୀ ନାମରେ ବସରେ ପୁରୀ ପଠାଇଥିଲି। ପରେ ଗଡ଼ଖୋର୍ଦ୍ଧା ମଠ ପରିସରରେ ଏକ ତୁଳସୀ ଉପବନ ଆରମ୍ଭ କରି ଦୈନିକ ତୁଳସୀ ପଠାଇଲୁ। ଏହି ସେବାରେ ବନ୍ଧୁ ଶିଶିର ପରିଡା, ବିନାୟକ ଦଳସିଙ୍ଗରାୟଙ୍କ ସମେତ ବହୁ ପରିବାରର ମହିଳା ଯୋଡି ହେଲେ। ଏକାଦଶୀ ଦିନ ସକାଳୁ ମହିଳାମାନେ ବିଭିନ୍ନ ସ୍ଥାନରୁ ନିଷ୍ଠା ପୂର୍ବକ ତୁଳସୀ ସଂଗ୍ରହ କରି ଆଣିବା ପରେ ତାହାକୁ ଏକାଠି କରାଯାଇଥାଏ। ଏହି ସମୟରେ ମହାପ୍ରଭୁଙ୍କ ଜଣାଣ, ବିଷ୍ଣୁ ସହସ୍ରନାମ, ନାମ ସଂକୀର୍ତ୍ତନ ଭାଗବାତ ପାଠ କରାଯାଏ। ଏହାପରେ ଶ୍ରୀମନ୍ଦିରକୁ ନେଇ ଯାଇଥାଉ। ମହାପ୍ରଭୁଙ୍କ ଆଶୀର୍ବାଦରୁ କରୋନା ମହାମାରୀ ସମୟରେ ସମସ୍ୟା ସୃଷ୍ଟି ହୋଇନାହିଁ ବୋଲି ସେ କହିଛନ୍ତି।