ପୁଣେ: ଚଳିତ ଇଣ୍ଡିଆନ ପ୍ରିମିୟର ଲିଗ୍ (ଆଇପିଏଲ୍)ର ଅନ୍ୟତମ ଚର୍ଚ୍ଚିତ ଖେଳାଳି ଚେନ୍ନାଇ ସୁପର କିଙ୍ଗ୍ସ (ସିଏସ୍କେ)ର ଋତୁରାଜ ଗାଏକ୍ୱାଡ୍ଙ୍କୁ ଜଣେ ଓପନିଂ ବ୍ୟାଟ୍ସମ୍ୟାନ କରାଇବାରେ ତାଙ୍କ କୋଚ୍ ସନ୍ଦୀପ ଚଭନଙ୍କର ବିଶେଷ ଭୂମିକା ରହିଛି। ସନ୍ଦୀପ କହିଛନ୍ତି, ୭ ବର୍ଷ ପୂର୍ବେ ଋତୁରାଜ ଯେତେବେଳେ ସ୍ବଳ୍ପ ବୟସ୍କ ଥିଲେ ତାଙ୍କୁ ଜଣେ ଓପନିଂ ବ୍ୟାଟ୍ସମ୍ୟାନ ହେବା ଲାଗି ପରାମର୍ଶ ଦେଇଥିଲେ। ମହାରାଷ୍ଟ୍ରର ଏହି ଲାଜକୁଳା ଖେଳାଳିଙ୍କୁ ସିଏସ୍କେ ଅଧିନାୟକ ମହେନ୍ଦ୍ର ସିଂ ଧୋନୀ ଉଚ୍ଚ ପ୍ରଶଂସା କରିବାକୁ ପଛାଇ ନାହାନ୍ତି। ଚଳିତ ଆଇପିଏଲ୍ର ଅନ୍ୟତମ ଶ୍ରେଷ୍ଠ ଖେଳାଳି ବୋଲି କହିଛନ୍ତି। ଋତୁରାଜ କ୍ରମାଗତ ତିନୋଟି ଅର୍ଦ୍ଧଶତକ ହାସଲ କରିଛନ୍ତି। ତା’ ହୋଇ ନ ଥିଲେ ଆଇପିଏଲ୍ରେ ଚେନ୍ନାଇ ସୁପର କିଙ୍ଗ୍ସର ଅଭିଯାନ ଆହୁରି ଶୋଚନୀୟ ହୋଇଥାନ୍ତା। ଚଭନ କହିଛନ୍ତି, ଋତୁରାଜ ଭେଙ୍ଗସରକାର କ୍ରିକେଟ ଏକାଡେମୀରେ ତାଙ୍କର ଟ୍ରେନି ଥିଲେ। ୧୬ବର୍ଷ ବୟସରେ ଜୁନିୟର ରାଜ୍ୟସ୍ତରରେ ସେ ମହାରାଷ୍ଟ୍ର ତରଫରୁ ଜଣେ ମିଡଲ ଅର୍ଡର ବ୍ୟାଟ୍ସମ୍ୟାନ ଭାବେ ଖେଳୁଥିଲେ। ଆଇପିଏଲ୍ ଭଳି ଟୁର୍ନାମେଣ୍ଟରେ କ୍ରମାଗତ ୩ ଥର ମ୍ୟାନ ଅଫ୍ ଦି ମ୍ୟାଚ ବିବେଚିତ ହେବା ପରେ ଋତୁରାଜଙ୍କ ଉପରେ କିଛି ନ କହି ରହିପାରି ନ ଥିଲେ ଚଭନ। ସେ କହିଛନ୍ତି ମହାରାଷ୍ଟ୍ରର ଏହି ବ୍ୟାଟ୍ସମ୍ୟାନଙ୍କୁ କ୍ଲବ ସ୍ତରରେ ଓପନିଂ କରିବା ଲାଗି ପରାମର୍ଶ ଦେଇଥିଲେ। ଭବିଷ୍ୟତରେ ଏହା ତାଙ୍କ ପାଇଁ କାର୍ଯ୍ୟରେ ଲାଗିବ ବୋଲି କହିଥିଲେ। ସ୍ଥାନୀୟ ଏକ ସିନିୟର ସ୍ତରର ଟୁର୍ନାମେଣ୍ଟ (ମଙ୍କଡେ ଟ୍ରଫି)ରେ ସେ ତାଙ୍କୁ ଓପନ କରିବା ଲାଗି କହିଥିଲେ। ଋତୁରାଜ ଉଭୟ ଇନିଂସରେ ଯଥାକ୍ରମେ ୧୦୦ ଓ ୯୦ ରନ ସ୍କୋର କରିଥିଲେ। ଚଭନ କହିଛନ୍ତି, ପ୍ରଥମାବସ୍ଥାରେ ରାଜ୍ୟ ମ୍ୟାଚ୍ଗୁଡ଼ିକରେ ଓପନିଂ କରୁଥିବା ବେଳେ କୌଣସି ସମସ୍ୟାରେ ପଡ଼ିଲେ ସେ ପରାମର୍ଶ ନେଉଥିଲେ। କ୍ରମେ ସେ ପାରଙ୍ଗମ ହୋଇଯାଇଥିଲେ। ବର୍ତ୍ତମାନ ସେ ଜଣେ ସ୍ପେଶାଲିଷ୍ଟ ଓପନର ହୋଇଯାଇଛନ୍ତି। ଋତୁରାଜ ୨୦୦୮-୦୯ରେ ଯେତେବେଳେ ଏକାଡେମୀରେ ଯୋଗଦାନ କରିଥିଲେ ସେତେବେଳେ ତାଙ୍କୁ ୧୨ ବର୍ଷ ହୋଇଥିଲା। ତାଙ୍କ ନିକଟରେ ଏକ ସ୍ବତନ୍ତ୍ର ପ୍ରତିଭା ରହିଥିବା ସେ ଜାଣିପାରିଥିଲେ ବୋଲି ଚଭନ କହିଛନ୍ତି।