ରାଜକୋଟ,୧୪।୧୨: ଚଳିତ ବିଜୟ ହଜାରେ ଟ୍ରଫିରେ ମହାରାଷ୍ଟ୍ର ଅଧିନାୟକ ତଥା ଓପନର ଋତୁରାଜ ଗାଏକ୍ୱାଡ ତାଙ୍କର ଦମ୍ଦାର ଫର୍ମ ଜାରି ରଖିଛନ୍ତି। ସେ ଏପର୍ଯ୍ୟନ୍ତ ୫ଟି ମ୍ୟାଚ୍ ଖେଳି ୪ଟି ଶତକ ଅର୍ଜନ କରିଛନ୍ତି। ମଙ୍ଗଳବାର ଅନୁଷ୍ଠିତ ଛତିଶଗଡ଼ ବିପକ୍ଷ ବିଜୟ ହଜାରେ ଟ୍ରଫି ମ୍ୟାଚ୍ରେ ସେ ୧୬୮ ରନ (୧୩୨ ବଲ, ୧୨ ଚୌକା, ୬ ଛକା)ର ଶତକୀୟ ଇନିଂସ ଖେଳି ମହାରାଷ୍ଟ୍ରକୁ ଜିତାଇଛନ୍ତି। ଟସ୍ ହାରି ଛତିଶଗଡ଼ ଓପନର ତଥା ଅଧିନାୟକ ମନନ ଭୋରଙ୍କ ୧୪୧ ରନର ଶତକୀୟ ପାଳି ବଳରେ ୫୦ ଓଭରରେ ୭ ଉଇକେଟ ହରାଇ ୩୦୯ ରନ ସଂଗ୍ରହ କରିଥିଲା। ଜବାବରେ ମହାରାଷ୍ଟ୍ର ୪୮.୫ ଓଭରରେ ୫ ଉଇକେଟ ହରାଇ ୩୧୩ ରନ କରି ବିଜୟୀ ହୋଇଥିଲା। ଏହି ବିଜୟ ସତ୍ତ୍ୱେ ମହାରାଷ୍ଟ୍ର ନେଟ୍ ରନ୍ ରେଟ୍ରେ ପଛରେ ପଡି ତୃତୀୟ ସ୍ଥାନରେ ରହି ନକ୍ଆଉଟ ପର୍ଯ୍ୟାୟରୁ ବାଦ୍ ପଡ଼ିଛି।
ଋଜୁରାଜ ଇଣ୍ଡିଆନ ପ୍ରିମିୟର ଲିଗ୍ (ଆଇପିଏଲ୍)ରେ ଚେନ୍ନାଇ ସୁପର କିଙ୍ଗ୍ସ ତରଫରୁ ପ୍ରତିନିଧିତ୍ୱ କରି ସର୍ବାଧିକ ୬୩୫ ରନ୍ କରି ଅରେଞ୍ଜ କ୍ୟାପ୍ ହାସଲ କରିଥିଲେ। ୨୪ ବର୍ଷୀୟ ଋତୁରାଜ ୯୫ ବଲରୁ ଶତକ ପୂରଣ କରିଥିଲେ। ଏହାପରେ ସେ ପରବର୍ତ୍ତୀ ୨୬ ବଲରୁ ସେ ୫୦ ରନ କରିଥିଲେ। ଏହାପୂର୍ବରୁ ସେ ଟୁର୍ନାମେଣ୍ଟରେ ୧୩୬, ଅପରାଜିତ ୧୫୪ ଓ ୧୨୪ ରନ ସଂଗ୍ରହ କରି ହ୍ୟାଟ୍ରିକ ଶତକ ଅର୍ଜନ କରିଥିଲେ। ୧୫୦.୭୫ ରନ ହାରରେ ସେ ୬୦୩ ରନ ସଂଗ୍ରହ କରିଛନ୍ତି। ପ୍ରଥମ ବ୍ୟାଟ୍ସମ୍ୟାନ ଭାବେ ସେ ଚଳିତ ଟୁର୍ନାମେଣ୍ଟରେ ୫୦୦ରୁ ଊର୍ଦ୍ଧ୍ୱ ରନ ସଂଗ୍ରହ କରିଛନ୍ତି। ପୂର୍ବରୁ ବିରାଟ କୋହଲି, ପୃଥ୍ବୀ ଶ, ଦେବଦତ୍ତ ପଡିକାଲ ମଧ୍ୟ ବିଜୟ ହଜାରେ ଟ୍ରଫିର ଗୋଟିଏ ସେସନରେ ୪ଟି ଶତକ ହାସଲ କରିଥିଲେ।