ମୁମ୍ବାଇ: ବଲିଉଡ୍ ଅଭିନେତା ସୁଶାନ୍ତ ସିଂହ ରାଜପୁତ ଆତ୍ମହତ୍ୟା ମାମଲାରେ ପ୍ରତିଦିନ ନୂଆ ନୂଆ ତଥ୍ୟ ସାମ୍ନାକୁ ଆସୁଛି। ଏହି ମାମଲାରେ ସମସ୍ତଙ୍କ ନଜର ଏବେ ସୁଶାନ୍ତ ଗର୍ଲଫ୍ରେଣ୍ଡ ତଥା ଅଭିନେତ୍ରୀ ରିୟା ଚକ୍ରବର୍ତ୍ତୀଙ୍କ ଉପରେ। ଗୁରୁବାର ରିୟାଙ୍କ କଲ୍ ଡିଟେଲସ୍ ସାମ୍ନାକୁ ଆସିଛି। ଯେଉଁଥିରେ ଜଣାପଡ଼ିଛି ଯେ, ୫ଦିନରେ ସୁଶାନ୍ତଙ୍କୁ ରିୟା ୨୫ ଥର କଲ୍ କରିଥିଲେ। ସୂଚନା ମୁତାବକ ଚଳିତ ବର୍ଷ ଜାନୁୟାରୀ ୨୦ରୁ ୨୪ ମଧ୍ୟରେ ଯେତେବେଳେ ସୁଶାନ୍ତ ନିଜ ଭଉଣୀ ରାଣୀଙ୍କୁ ଦେଖା କରିବାକୁ ଚଣ୍ଡିଗଡ଼ ଯାଇଥିଲେ, ସେତେବେଳେ ରିୟା ୫ ଦିନରେ ତାଙ୍କୁ ୨୫ଥର ଫୋନ କରିଥିଲେ। ଏହାସହ ତାଙ୍କୁ ମୁମ୍ବାଇକୁ ଫେରିଆସିବାକୁ ବାରମ୍ବାର କହିଥିଲେ। ମିଳିଥିବା ସୂଚନା ଅନୁସାରେ ଗତ ନଭେମ୍ବରରେ ସୁଶାନ୍ତ ନିଜ ଭଉଣୀଙ୍କୁ ସାହାଯ୍ୟ ମାଗିବାକୁ ଫୋନ କରିବା ସହ ଚଣ୍ଡିଗଡ଼ ଯିବାକୁ ନିଜ ୩ ଭଉଣୀଙ୍କ ସହ ଟିକେଟ ମଧ୍ୟ ବୁକ୍ କରିଥିଲେ। କିନ୍ତୁ ରିୟା ତାଙ୍କୁ ବ୍ଲାକମେଲ୍ କରି ସେଠାକୁ ନ ଯିବାକୁ କହିଥିଲେ। ଏହାପରେ ପୁଣି ଡିସେମ୍ବରରେ ସୁଶାନ୍ତ ନୂଆ ନମ୍ବରରୁ କଲ୍ କରି ଭଉଣୀକୁ କହିଥିଲେ ଯେ, ରିୟା ଓ ତାଙ୍କ ପରିବାର ତାଙ୍କୁ ମେଣ୍ଟାଲ ହସ୍ପିଟାଲ ପଠାଇବାକୁ ଉଦ୍ୟମ କରୁଛନ୍ତି। ମୋତେ ସାହାଯ୍ୟ କର, ମୁଁ ମେଣ୍ଟାଲ ହସ୍ପିଟାଲକୁ ଯିବାକୁ ଚାହୁଁନାହିଁ। ମୁମ୍ବାଇ ଛାଡ଼ି ହିମାଚଳର କୌଣସି ଏକ ସ୍ଥାନରେ ରହିବାକୁ ଚାହୁଁଛି ବୋଲି ଭଉଣୀଙ୍କୁ ସୁଶାନ୍ତ କହିଥିଲେ। ଏହାପରେ ନିଜେ ଡ୍ରାଇଭ୍ କରି ସୁଶାନ୍ତ ଚଣ୍ଡିଗଡ଼ରେ ଥିବା ଭଉଣୀ ଘରେ ପହଞ୍ଚିଥିଲେ। ସେଠାରେ ସେ କିଛି ଦିନ ରହିଥିବା ବେଳେ ଏହି ସମୟରେ ରିୟା ତାଙ୍କୁ ୫ଦିନରେ ୨୫ ଥର ଫୋନ କରି ମୁମ୍ବାଇ ଫେରିବାକୁ ବ୍ଲାକ୍ମେଲ କରିଥିଲେ ବୋଲି ଜଣାପଡ଼ିଛି।