ଯୋଡ଼ା,୭ା୨(ଡି.ଏନ.ଏ): କେନ୍ଦୁଝର ଜିଲା ଯୋଡ଼ା ସହର ଦେଇ ଯାଇଥିବା ମୁଖ୍ୟ ରାସ୍ତାର ଧରଣୀଧର ଛକରେ ଚାଲିଥିବା ଫ୍ଳାଏ ଓଭର କାର୍ଯ୍ୟ ଯୋଗୁ ଲୋକେ ଧୂଳି ଧୂଆଁରେ ଅତିଷ୍ଠ ହେଉଛନ୍ତି। ଏହାର ପ୍ରତିକାର ପାଇଁ ସ୍ଥାନୀୟ ଲୋକେ ପୂର୍ବରୁ ପ୍ରତିବାଦ କରିଥିବା ବେଳେ କୌଣସି ସୁଫଳ ମିଳି ନାହିଁ। ଏନେଇ ସୋମବାର ସ୍ଥାନୀୟ ଭୂୟାଁ ବସ୍ତିର ଶତାଧିକ ମହିଳା ପୁରୁଷ ରାସ୍ତା ଅବରୋଧ କରିଥିଲେ। ଫଳରେ ଟ୍ରାଫିକ ସମସ୍ୟା ସୃଷ୍ଟି ହୋଇଥିଲା। ଉଭୟ ପାର୍ଶ୍ୱରେ ଶତାଧିକ ଗାଡ଼ି ଅଟକି ରହିଥିଲା।
ଅନୁଯାୟୀ, ପ୍ଲାଏ ଓଭର ତଳେ ନିର୍ମାଣ ହୋଇଥିବା ଅସ୍ଥାୟୀ ମାଟି ରାସ୍ତାରେ ଖଣିଜ ବୋଝେଇ ଭାରିଯାନ ଚଳାଚଳ କରୁଥିବାରୁ ଧୂଳିକଣା ପ୍ରବଳ ମାତ୍ରାରେ ଉଡୁଛି। ଧୂଳି ଧୂଆଁରେ ଘର ଦ୍ୱାର ଭର୍ତ୍ତି ହୋଇଯାଉଛି। ଏପରିକି ରାସ୍ତା କଡ଼ରେ ରହୁଥିବା ଲୋକେ ନିଃଶ୍ୱାସ ନେବାରେ ମଧ୍ୟ କଷ୍ଟ ଅନୁଭବ କରୁଥିବା ଓ୍ବାର୍ଡବାସୀ ଅଭିଯୋଗ କରିଛନ୍ତି। ରୋଷେଇ ଘରେ ଭାତ ହାଣ୍ଡି ଉପରେ ଧୂଳିର ନାଲି ଆସ୍ତରଣ ପଡ଼ିଯାଉଛି। ପାନୀୟ ଜଳରେ ମଧ୍ୟ ଧୂଳି ଓ ତେଲ ଅଂଶ ଭାସୁଛି। ବହୁବାର ଏ ନେଇ ଅଞ୍ଚଳବାସୀ ପୌର ପାଳିକା, ଠିକା ସଂସ୍ଥାର ଦୃଷ୍ଟି ଆକର୍ଷଣ କରିଥିଲେ ହେଁ ଏହାର କୌଣସି ପ୍ରତିକାର କରାଯାଉ ନାହିଁ। ପୂର୍ବରୁ ଅଞ୍ଚଳବାସୀ ୩ ଥର ରାସ୍ତାରେ ଜଳ ସିଞ୍ଚନ ଦାବିରେ ରାସ୍ତା ଅବରୋଧ କରିଛନ୍ତି। କିଛି ଦିନ ଜଳ ସିଞ୍ଚନ କରି ପୁଣି ବନ୍ଦ ହୋଇଯାଏ। ନିୟମିତ ପାଣି ସିଞ୍ଚନ ଦାବି କରି ପୁନର୍ବାର ବସ୍ତି ବାସିନ୍ଦା ରାସ୍ତା ଅବରୋଧ କରିଥିଲେ। ଫଳରେ ଦିନ ୨ଟାରୁ ୪ ଟା ପର୍ଯ୍ୟନ୍ତ ରାସ୍ତାରେ ଗାଡ଼ି ଚଳାଚଳ ଠକ୍ ହୋଇଯାଇଥିଲା। ରାସ୍ତା ଅବରୋଧ ସମ୍ପର୍କରେ ଜାଣିବା ପରେ ଠିକା ସଂସ୍ଥାର ମାନବ ସମ୍ବଳ ଅଧିକାରୀ ଭାଗିରଥି ପଣ୍ଡା ଓ ଯୋଡ଼ା ପୋଲିସ ପହଞ୍ଚତ୍ ଲୋକଙ୍କୁ ବୁଝାସୁଝା କରିଥିଲେ। ଦିନକୁ ୩ ଥର ୱାଟର ଟ୍ୟାଙ୍କର ଯୋଗେ ଜଳ ସିଞ୍ଚନର ପ୍ରତିଶ୍ରୁତି ପରେ ରାସ୍ତା ଅବରୋଧରୁ ଲୋକେ ନିବୃତ ହୋଇଥିଲେ।
ଅନ୍ୟପକ୍ଷେ, ଧୂଳି ଧୂଆଁ ପାଇଁ ପୌର ପାଳିକାର ୨, ୩, ୪, ୫, ୭, ୮, ୯, ୧୦, ୧୧, ୧୨ ଓ ୧୩ ନଂ. ୱାର୍ଡବାସୀ ପ୍ରଭାବିତ ହେଉଛନ୍ତି। ଏ ନେଇ ପୌରପାଳିକା ପକ୍ଷରୁ କୌଣସି ପଦକ୍ଷେପ ନିଆଯାଉ ନ ଥିବାରୁ ଅଞ୍ଚଳରେ ଜନଅସନ୍ତୋଷ ଦେଖା ଯାଉଛି।
