ନାଉଗାଁ,୧୯।୬(ସ୍ବ.ପ୍ର.): ନାଉଗାଁ ବ୍ଲକରେ ପ୍ରତିବର୍ଷ ରାସ୍ତା ସଫେଇ ନାଁରେ ଲକ୍ଷାଧିକ ଖର୍ଚ୍ଚ ହେଉଛି। ମାତ୍ର ଏହି ସଫେଇ କାମ ନାମକୁ ମାତ୍ର ହୋଇଥିବା ନେଇ ସାଧାରଣରେ ଅଭିଯୋଗ ହୋଇଛି। ଏହାର ଉଦାହରଣ କୋକିଢିହ-ତେଲସରା ରାସ୍ତାରେ ଦେଖିବାକୁ ମିଳିଛି। ୧୨ କିଲୋମିଟର ଲମ୍ବ ଏହି ରାସ୍ତାଟି ପୂର୍ତ୍ତବିଭାଗ ଅଧୀନରେ ରହିଛି। ଏହି ରାସ୍ତା ସଫେଇ କରୁଥିବା ଠିକାଦାର ଠିକ୍ଭାବେ ରାସ୍ତା ସଫା ନ କରି ବିଲ କରିନେଇଛନ୍ତି। ସରକାରଙ୍କ ନିୟମାନୁସାରେ ରାସ୍ତା ସଫେଇ କରିବା ସମୟରେ ରାସ୍ତାର ଦୁଇ ପାର୍ଶ୍ୱ ସଫା କରିବା ସହ ରାସ୍ତା ଉପରକୁ ଓହଳି ଥିବା ଗଛର ଡାଳକୁ କଟାଯିବା କଥା। କିନ୍ତୁ ଠିକାଦାରମାନେ ନାମକୁ ମାତ୍ର ଦୁଇ ପାର୍ଶ୍ୱ ଘାସ ସଫା କରି ବିଲ କରିଦେଉଛନ୍ତି। ବିଭାଗ ଏଥିପ୍ରତି ଦୃଷ୍ଟି ଦେଉ ନାହିଁ। ଯାହା ଫଳରେ ଏହି ରାସ୍ତାର ଦୁଇ ପାର୍ଶ୍ୱରେ ଗଛ ଡାଳ ସବୁ ରାସ୍ତା ଉପରକୁ ଓହଳି ରହିଛି। ଏଥିଯୋଗୁ ବହୁ ସମୟରେ ଭାରିଯାନ ଯାତୟାତ ସମୟରେ ଗଛ ଡାଳ ଯୋଗୁ ଗାଡ଼ି ଚଲାଇବାରେ ବାଧକ ସୃଷ୍ଟି କରୁଛି। ରାସ୍ତା ଉପରକୁ ଓହଳିଥିବା ଗଛ ଡାଳକୁ ସଫା କରିବା ପାଇଁ ଦାବି ହେଉଛି। ଏ ସମ୍ପର୍କରେ ବିଭାଗୀୟ ଯନ୍ତ୍ରୀ ବଳରାମ ସ୍ବାଇଁ କହିଛନ୍ତି ଏହି କାମର ବିଲ୍ ହୋଇସାରିଛି। ତେବେ ରାସ୍ତା ଉପରକୁ ଓହଳିଥିବା ଗଛକୁ ସଫା କରିବା ପାଇଁ ଖୁବ୍ଶୀଘ୍ର ବ୍ୟବସ୍ଥା କରାଯିବ।
