ଉଦଳା,୧୮।୮(ସନ୍ତୋଷ କୁମାର ବାଚ୍ଛିନୀ): ମୟୂରଭଞ୍ଜ ଜିଲା ଉଦଳା ବ୍ଲକ ଶ୍ରୀଦାମଚନ୍ଦ୍ରପୁର ଡାକ୍ତରଖାନାଠାରୁ ବାଲିଛତ୍ରାକୁ ସଂଯୋଗ ହୋଇଥିବା ମୁଖ୍ୟରାସ୍ତା ଅବସ୍ଥା ଶୋଚନୀୟ ହୋଇପଡ଼ିଛି। ଏନେଇ ଶ୍ରୀଦାମଚନ୍ଦ୍ରପୁର ପଞ୍ଚାୟତର ଲୋକେ ସରପଞ୍ଚଙ୍କଠାରୁ ଆରମ୍ଭ କରି ବ୍ଲକ ଅଧିକାରୀ ଓ ଜିଲାପାଳଙ୍କ ପର୍ଯ୍ୟନ୍ତ ଲିଖିତ ଅଭିଯୋଗ କରିଥିଲେ ସୁଦ୍ଧା ରାସ୍ତା ମରାମତି କରାଯାଇପାରି ନାହିଁ। ଲଗାଣ ବର୍ଷା ଯୋଗୁ ଏହି ରାସ୍ତା ଅବସ୍ଥା ଅତ୍ୟନ୍ତ ଶୋଚନୀୟ ହୋଇପଡ଼ିଛି। ଦୈନନ୍ଦିନ ଉଦଳାଠାରୁ ଶ୍ରୀଦାମଚନ୍ଦ୍ରପୁର ମେଡିକାଲକୁ ଯାଉଥିବା ଆମ୍ବୁଲାନ୍ସ ଏବଂ ବାଲିଛତ୍ରା, ସୋନପୋଖରୀ ଆଦି ଗ୍ରାମରୁ ଶ୍ରୀଦାମଚନ୍ଦ୍ରପୁର ହାଇସ୍କୁଲକୁ ଯାଉଥିବା ଛାତ୍ରୀଛାତ୍ରଙ୍କ ପାଇଁ ଏହି ରାସ୍ତା ମରଣଯନ୍ତା ପାଲଟିଛି। ବିଶେଷକରି ଗ୍ରାମବାସୀମାନେ ରାଶନ ଆଣିବା ପାଇଁ ପଞ୍ଚାୟତ କାର୍ଯ୍ୟାଳୟକୁ ଯାଉଥିବା ବେଳେ ଅସୁବିଧାର ସମ୍ମୁଖୀନ ହେଉଥିବା ଅଭିଯୋଗ ହୋଇଛି। ଏହାକୁ ନେଇ ତାତିଛନ୍ତି ଲୋକେ। ଗୁରୁବାର ଗ୍ରାମବାସୀ ମିଳିତ ହୋଇ ଉକ୍ତ ରାସ୍ତା ଉପରେ ଧାନ ତଳି ରୋଇଛନ୍ତି। ସମ୍ପୂର୍ଣ୍ଣ ରାସ୍ତା ନୂତନ ଭାବେ କରା ନ ଗଲେ ପଞ୍ଚାୟତବାସୀ ପର୍ଯ୍ୟଟନସ୍ଥଳୀ ଦେବକୁଣ୍ଡ-ଉଦଳା ରାସ୍ତାକୁ ଅବରୋଧ କରିବେ ବୋଲି ଚେତାବନୀ ଦେଇଛନ୍ତି। ଉକ୍ତ ରାସ୍ତା ତୁରନ୍ତ ମରାମତି ପାଇଁ ଗ୍ରାମବାସୀ ହରିଶ ଚନ୍ଦ୍ର ମହାନ୍ତ, ସୁବାସ ଚନ୍ଦ୍ର ମହାନ୍ତ, ସୁମନ୍ତ ମହାନ୍ତ, ଗୁରୁପ୍ରସାଦ ମହାନ୍ତ ପ୍ରମୁଖ ଦାବି କରିଛନ୍ତି।
