ପାରଳାଖେମୁଣ୍ଡି,୧୦ା୪(ଡି.ଏନ୍.ଏ.): ଗଜପତି ଜିଲା ସଦର ମହକୁମା ପାରଳାଖେମୁଣ୍ଡି ସହରର ରାସ୍ତାଘାଟ ଅବସ୍ଥା କଦର୍ଯ୍ୟ ହୋଇପଡିଥିବା ବେଳେ ଖାଲଖମା ସୃଷ୍ଟି ହେଉଛି। ହେଲେ ପ୍ରଶାସନ ତଥା ବିଭାଗୀୟ କର୍ତ୍ତୃପକ୍ଷ ନିଘୋଡ ନିଦ୍ରାରେ ରହିଥିବାରୁ ଲୋକେ ଏହି ଖାଲଖମା ଗୁଡିକରେ ନିଜସ୍ବ ଉଦ୍ଦ୍ୟମରେ ମାଟି, ଇଟା, ସିମେଣ୍ଟ ପ୍ଲେଟ ଖଣ୍ଡ ଆଦି ପକାଇ ଭର୍ତ୍ତି କରୁଥିବାର ଦେଖିବାକୁ ମିଳୁଛି। ସହରର ସଙ୍କୁରୀ ପୋଖରୀ ତଥା ଏସାର ପେଟ୍ରୋଲ ପମ୍ପ ନିକଟରେ ଏକ ଗର୍ତ୍ତ ଗତ ପ୍ରାୟ ୩ବର୍ଷ ହେଲା ସୃଷ୍ଟି ହୋଇଥିଲା। ଏହା କାଳ କ୍ରମେ ସୁଡୁଙ୍ଗ ଆକାରର ଧାରଣ କରି ମାଟି ଧସି ମୁଖ୍ୟରାସ୍ତାକୁ ଧସେଇ ଆସୁଥିଲା। ଫଳରେ ବିଭିନ୍ନ ସମୟରେ ଏହି ଗର୍ତ୍ତରେ ପଡି ଲୋକେ ଆହତ ହେଉଥିଲେ। ସନ୍ଧ୍ୟା ସମୟରେ ରାସ୍ତାକଡ ଗର୍ତ୍ତରେ ପଡିଯାଉଥିଲେ। ଏପରିକି କିଛି ଛାତ୍ରଛାତ୍ରୀ ସନ୍ଧ୍ୟାରେ ଟ୍ୟୁସନ ଗଲାବେଳେ ସାଇକେଲ ସଙ୍ଗେ ଉକ୍ତ ଗର୍ତ୍ତରେ ଗଳିପଡି ଖଣ୍ଡିଆଖାବରା ହେଉଥିବାର ବହୁ ନଜିର ରହିଛି। ଏହି ରାସ୍ତା ଦେଇ ଜିଲା ମୁଖିଆଙ୍କଠାରୁ ଆରମ୍ଭ କରି ସମସ୍ତ ପ୍ରଶାସନିକ ଅଧିକାରୀ, ପୋଲିସ ମୁଖିଆ, ବିଭାଗୀୟ କର୍ତ୍ତୃପକ୍ଷ, ପୌରପରିଷଦ ମୁଖିଆଙ୍କ ସମେତ ସ୍ଥାନୀୟ ଜନପ୍ରତିନିଧି ସଭିଏ ଏହି ମୁଖ୍ୟରାସ୍ତା ଦେଇ ଯାତାୟାତ କରିଥାନ୍ତି। ହେଲେ କାହାରି ଦୃଷ୍ଟି ନିକ୍ଷେପ ନାହିଁ। ପୁରୁଣା ଫଟୋଟିଏ ଦେଖିଲେ ଏହି ଗର୍ତ୍ତଟି ଆଗକୁ ବହୁ ବିପଦକୁ ନିମନ୍ତ୍ରଣ କରିଥାନ୍ତା । ହେଲେ ସ୍ଥାନୀୟ ଅଞ୍ଚଳରେ ଥିବା ଶ୍ରୀକ୍ରିଷ୍ଣା ଟକିଜର ମାଲିକ ଉକ୍ତଗର୍ତ୍ତରେ ଦୁର୍ଘଟଣା ଘଟୁଥିବାର ଜାଣି ମାଟି ମୋରମ ପକାଇଥିବାର ଦେଖିବାକୁ ମିଳିଛି। ଏପରି ପଦକ୍ଷେପକୁ ବିଭିନ୍ନ ମହଲରେ ସ୍ବାଗତ କରାଯାଉଥିଲେ ମଧ୍ୟ ପ୍ରଶାସନ ତଥା ବିଭାଗୀୟ କର୍ତ୍ତୃପକ୍ଷଙ୍କ ଉଦାସୀନତାକୁ କଡ଼ା ସମାଲୋଚନା କରାଯାଉଛି। ସେହିପରି ପୁରୁଣା କୋର୍ଟ ଛକଠାରେ ଥିବା ଖାଲଖମାରେ ସ୍ଥାନୀୟ ଲୋକେ ଇଟା, ସିମେଣ୍ଟ ପ୍ଲେଟ ଖଣ୍ଡ ବା ଗୁଣ୍ଡ ପକାଇ ରାସ୍ତା ସମତୁଳ କରିଥିବାର ମଧ୍ୟ ଜଣାପଡିଛି । ପ୍ରକାଶ ଯେ, ପାରଳା ପୌରପରିଷଦ ଏହି ମୁଖ୍ୟ ରାସ୍ତାକୁ ପୂର୍ତ୍ତବିଭାଗକୁ ହସ୍ତାନ୍ତର କରିସାରିଛି । ଗୋଟିଏ ପଟେ ପୂର୍ତ୍ତବିଭାଗ ସହରର ସମସ୍ତ ମୁଖ୍ୟରାସ୍ତା ନିଜ ଅଧିନରେ ରଖି ଚୁପ ବସିଛି।