ଯାଜପୁର,୨ା୯(ହର୍ଷବର୍ଦ୍ଧନ ବେହେରା): ଯାଜପୁର ଜିଲା ଜାରକା ଗ୍ରାମ୍ୟ ନିର୍ମାଣ ଡିଭିଜନ ଅନ୍ତର୍ଗତ ଧର୍ମଶାଳା, କୋରେଇ, ବଡ଼ଚଣା ଓ ରସୁଲପୁର ବ୍ଳକରେ ନିର୍ମିତ ରାସ୍ତାଗୁଡ଼ିକର ଅଗ୍ରାଧିକାର ଭିତ୍ତିରେ ମରାମତି କରାଯାଉଛି। ସେଥିମଧ୍ୟରୁ କେବଳ ପ୍ରଧାନମନ୍ତ୍ରୀ ଗ୍ରାମ ସଡ଼କ ଯୋଜନା(ପିଏମ୍ଜିଏସ୍ଓ୍ବାଇ)ରେ ୨୦୧୫-୧୬ରୁ ୨୦୨୩-୨୪ ମଧ୍ୟରେ ପ୍ରାୟ ୨୦୦ କି.ମି. ରାସ୍ତାର ମରାମତି ପାଇଁ ୨୨ କୋଟି ୩୬ ଲକ୍ଷ ୩୬ ହଜାର ଟଙ୍କା ଖର୍ଚ୍ଚ କରାଯାଇଛି। ହେଲେ ଠିକାଦାର ଓ ଯନ୍ତ୍ରୀଙ୍କ ମଧ୍ୟରେ ସଲାସୁତୁରା ଏବଂ ଅନୁଦାନର ସିଂହଭାଗ ଅର୍ଥକୁ ଭାଗବଣ୍ଟା ଯୋଗୁ ରାସ୍ତା ମରାମତି ଅତି ନିମ୍ନମାନର ହୋଇଥିବା ଅଭିଯୋଗ ହେଉଛି। କେତେକ ମରାମତି ରାସ୍ତାକୁ ଅବଲୋକନ କଲେ ସେଗୁଡିକର ଅବସ୍ଥା ଏତେ ଶୋଚନୀୟ ହୋଇପଡିଛି ଯେ, ସେଥିରେ ଚାଲି କି ଯିବା ବି କଷ୍ଟକର ବୋଲି ମତପ୍ରକାଶ ପାଇଛି।
ଜିଲାର ଜାରକା ଗ୍ରାମ୍ୟ ନିର୍ମାଣ ବିଭାଗ ଜରିଆରେ ଗତ ୯ ବର୍ଷ ମଧ୍ୟରେ ୧୦୫ଟି ପିଏମ୍ଜିଏସ୍ଓ୍ବାଇ ରାସ୍ତାର ମରାମତି ହୋଇଛି। ତେବେ ଏଥିରେ ବହୁ କୋଟି ଟଙ୍କା ହେରଫେର ହୋଇଥିବା ଅଭିଯୋଗ ହେଉଛି। ୨୦୧୫-୧୬ ବର୍ଷରେ ୩ଟି ରାସ୍ତାର ୧୫.୩୦୦ କି.ମି. ମରାମତି ପାଇଁ ୧୪୭.୧୨ଲକ୍ଷ ଟଙ୍କା ଖର୍ଚ୍ଚ ହୋଇଛି। ଏଥିରେ କଲାଣ୍ଡୋ-ବିଛାଖଣ୍ଡି, ଆର୍ଡି ରାସ୍ତାରୁ ସୁନ୍ଦୁରୀ ଓ ବନ୍ଦାଳୋ-ଏଣ୍ଡାରପଦା ରାସ୍ତା ରହିଛି। ସେହିପରି ୨୦୧୬-୧୭ ଆର୍ଥିକ ବର୍ଷରେ ୪ଟି ରାସ୍ତା କାର୍ଯ୍ୟର ୧୫.୨୦୦ କି.ମି. ମରାମତି ପାଇଁ ୧୫୮.୦୭ ଲକ୍ଷ ଟଙ୍କା ଖର୍ଚ୍ଚ ହୋଇଛି। ଏଥିରେ କ୍ଷେତ୍ରପାଳ-କଣ୍ଟାବଣିଆ, ଖଇରା ବ୍ରିଜ-ବଟୁ, ଆର୍ଡି ରାସ୍ତାରୁ କୁରିକଣା ଓ ପଞ୍ଚାୟତ ସମିତି ଅଫିସରୁ ଗୁଲଝରଣଗରପଟନା ରାସ୍ତା ରହିଛି। ୨୦୧୭-୧୮ ବର୍ଷରେ ନରସିଂହପୁର-ରସୁଣା, ଏନ୍ଏଚ୍-୨୦୦ରୁ ଗୋଡିପାଟିଆ ରାସ୍ତା, ତାଳଜଙ୍ଗ-ରାଈଛନ୍ଦା, ରଗଡିପଶି-ବରମୁଣ୍ଡୁଳି, ରାଉତରାପୁରା-କୁଣ୍ଡପାଟଣା, ଧର୍ମଶାଳା-ଭୁବନ, ବାଘୁଆ-ଚଉଷଠିପଡ଼ା, ରଘୁନାଥପୁର-ମଧୁସୂଦନପୁର, ଜନକ-ମୋହନପୁର, ଆରଡି ରାସ୍ତାରୁ ନୂଆହାଟ ରାସ୍ତା ପ୍ରଭୃତି ୨୨ଟି ରାସ୍ତାର ୫୨.୪୬୧ କି.ମି. ପାଇଁ ୫୪୭.୧୨ ଲକ୍ଷ ଟଙ୍କା ମରାମତି ନାମରେ ଖର୍ଚ୍ଚ ହୋଇଛି। ସେହିପରି ୨୦୧୮-୧୯ ବର୍ଷରେ ହରିଦାସପୁରରୁ ଭାତୁଡ଼ିପଶି, ଏନ୍ଏଚ୍-୫ରୁ ସୁନ୍ଦୁରିଆ ହିଲ୍ଟପ୍ ରାସ୍ତା, ଆର୍ଡି ରାସ୍ତାରୁ କୁରିକୁଣା, ବଡ଼ଘୁମୁରୀ-ପାଇକରାପୁର, ପିଡବ୍ଲ୍ୟୁଡି ରାସ୍ତାରୁ ସୁନାବାଲିକୁଦା ଓ ପିଡବ୍ଲ୍ୟୁଡି ରାସ୍ତାରୁ ମଟକାପୁର ରାସ୍ତାରେ ମୋଟ ୧୧.୭୧୯ କି.ମି. ପାଇଁ ୧୫୧.୭୭ ଲକ୍ଷ ଟଙ୍କା ଖର୍ଚ୍ଚ ହୋଇଛି। ୨୦୧୯-୨୦ ବର୍ଷରେ ୧୭.୮୫୯ କି.ମି. ରାସ୍ତା ମରାମତିରେ ୧୦୫.୯୯ ଲକ୍ଷ, ୨୦୨୦-୨୧ରେ ୨୨.୫୫୯ କି.ମି. ରାସ୍ତା ମରାମତିରେ ୨୩୬.୨୪ ଲକ୍ଷ, ୨୦୨୧-୨୨ରେ ୫୭.୫୦୨ କି.ମି. ରାସ୍ତା ପାଇଁ ୬୨୧.୦୨ ଲକ୍ଷ, ୨୦୨୨-୨୩ରେ ୫.୧୦୫ କି.ମି. ରାସ୍ତା ନିମନ୍ତ ୫୭.୨୨ ଲକ୍ଷ ଏବଂ ୨୦୨୩-୨୪ରେ ୨୧.୪୫୧ କି.ମି. ରାସ୍ତା ମରାମତିରେ ୨୧୧.୮୧ ଲକ୍ଷ ଟଙ୍କା ଖର୍ଚ୍ଚ କରାଯାଇଛି। ଚଳିତ ବର୍ଷ ମଧ୍ୟ ସାମୟିକ ଭାବେ ୩ଟି ରାସ୍ତାର ମରାମତି ପାଇଁ ଟେଣ୍ଡର ପ୍ରକ୍ରିୟା ଚାଲୁ ରହିଛି ବୋଲି ନିର୍ବାହୀ ଯନ୍ତ୍ରୀ ସୂଚନା ଦେଇଛନ୍ତି। ରାସ୍ତା ଅବସ୍ଥାକୁ ଦେଖିଲେ କାଁ ଭାଁ ମରାମତି କରାଯାଇ ଆବଣ୍ଟିତ ଅର୍ଥରୁ ସିଂହଭାଗ ମିଥ୍ୟା ବିଲ୍ କରି ହଡ଼ପ ହୋଇଥିବା ଅଭିଯୋଗ ହେଉଛି। ଏହିସବୁ ରାସ୍ତାରେ ଏବେ ବି ବିଭିନ୍ନ ସ୍ଥାନରେ ଖାଲଖମା ଦେଖିବାକୁ ମିଳିଛି। ରଘୁନାଥପୁରଠାରୁ ମଧୁସୂଦନପୁର ରାସ୍ତା ମରାମତି କାର୍ଯ୍ୟକୁ ଦେଖିଲେ ଏହା ଜଳଜଳ ହୋଇ ଦିଶୁଛି। ଏନେଇ ଭାରପ୍ରାପ୍ତ ନିର୍ବାହୀ ଯନ୍ତ୍ରୀ ବିପିନ ତରାଇ କହିଛନ୍ତି, ଖରାପ ରାସ୍ତାଗୁଡ଼ିକ ନଜରକୁ ଆସିନାହିଁ। ପରବର୍ତ୍ତୀ ସମୟରେ ନଜରକୁ ଆସିଲେ ବିହିତ ପଦକ୍ଷେପ ନିଆଯିବ। ଆବଶ୍ୟକସ୍ଥଳେ ନୂତନ ରାସ୍ତାର ନିର୍ମାଣ ନିମନ୍ତେ ପ୍ରସ୍ତାବ ଦିଆଯିବ।