ରାଉରକେଲା ଅଫିସ,୧୩।୧୨: ନିଜର ହକ୍ ପାଇଁ ୩୨ ମୌଜା ବିସ୍ଥାପିତ ସଂଘ ଉଦିତନଗର ସ୍ଥିତ ରାଉରକେଲା ଅତିରିକ୍ତ ଜିଲାପାଳଙ୍କ କାର୍ଯ୍ୟାଳୟ ସମ୍ମୁଖରେ ଆଜିକୁ ୮ ଦିନ ଧରି ଧାରଣା ଦେବା ପରେ ସୋମବାର ସନ୍ଧ୍ୟାରେ ଆରଏମ୍ସି କାର୍ଯ୍ୟାଳୟକୁ ଘେରାଉ କରିଥିଲେ। ଆର୍ଏମ୍ସି କମିଶନର ତଥା ଏଡିଏମ୍ ଡ. ଶୁଭଙ୍କର ମହାପାତ୍ର ପ୍ରତିଶ୍ରୁତି ଦେବା ପରେ ସଂଘର କର୍ମକର୍ତ୍ତା ପୁନଃ ଧାରଣାସ୍ଥଳକୁ ଫେରିଥିଲେ। ଅନ୍ୟପଟେ ସ୍ଥାନୀୟ ପ୍ରଶାସନ ଯଦି ଆମର କୌଣସି କଥା ନ ଶୁଣନ୍ତି ତେବେ ରେ ଆସନ୍ତା ୧୪ ତାରିଖରେ ଆର୍ଏସ୍ପିର କଞ୍ଚାମାଲ୍ ଯାଉଥିବା ରାସ୍ତା ତଥା ଦେଓଗାଁ ସ୍ଥିତ ଆର୍ଏସ୍ପି ମୁଖ୍ୟ ଫାଟକ ସମ୍ମୁଖକୁ ଅବରୋଧ କରାଯିବ ବୋଲି ସଂଘ ପକ୍ଷରୁ ଏସ୍ପି ଓ ଆର୍ଏସ୍ପି ସିଇଓଙ୍କୁ ପତ୍ର ମାଧ୍ୟମରେ ଅବଗତ କରାଯାଇଥିବା ସାଧାରଣ ସମ୍ପାଦକ ମହେଶ୍ୱର ଟପ୍ପୋ ସୂଚନା ଦେଇଛନ୍ତି।
ସୂଚନା ଅନୁସାରେ, ରାଉରକେଲା ଇସ୍ପାତ କାରଖାନା (ଆର୍ଏସ୍ପି)ର ଆଧୁନିକୀକରଣ ସମୟରେ ୩୨ ମୌଜା ଅଧିବାସୀଙ୍କର ୧୯ ହଜାର ୭ଶହ ୫୨ ଏକର ଜମି ଯାଇଥବଲା। ସେହିପରି ୧୯୯୭ରେ ମନ୍ଦିରା ଡ୍ୟାମ୍ ନିର୍ମାଣ ସମୟରେ କାରଖାନା କର୍ତ୍ତୃପକ୍ଷ ୩୨ ମୌଜା ଅଞ୍ଚଳବାସୀଙ୍କର ୧୧ ହଜାର ଏକର ଜମି ନେଇଥିଲେ। ସେହି ସମୟରୁ ଉକ୍ତ ମୌଜାରେ ବସବାସ କରୁଥିବା କିଛି ବିସ୍ଥାପିତଙ୍କୁ ଆରଏସ୍ପିରେ ଚାକିରି ମିଳିଥିବାବେଳେ ଅନ୍ୟ କିଛି ବିସ୍ଥାପିତ ନିଯୁକ୍ତିରୁ ବଞ୍ଚତ୍ତ ହୋଇଥିଲେ। ଏହାକୁ ନେଇ ୩୨ ମୌଜା ମନ୍ଦିରା ଡ୍ୟାମ୍ ଅଞ୍ଚଳରେ ବାସ କରୁଥିବା ବିସ୍ଥାପିତମାନେ ହାଇକୋର୍ଟରେ ମାମଲା ଦାଏର କରିଥିଲେ। ହାଇକୋର୍ଟ ଏହି ମାମଲାର ଶୁଣାଣି କରି ଗତ ମାର୍ଚ୍ଚ ୨୩ ତାରିଖରେ ୧୧ଶହ ବିସ୍ଥାପିତ ଦକ୍ଷତାପୂର୍ଣ୍ଣ ବିଦ୍ୟାର୍ଥୀଙ୍କୁ ଆର୍ଏସ୍ପିରେ ନିଯୁକ୍ତି ପାଇଁ ସୁନ୍ଦରଗଡ ଜିଲାପାଳଙ୍କୁ ନୋଟିସ ଜାରି କରିଥିଲେ। ଏହି କ୍ରମରେ ୩୨ ମୌଜାର ୧୧ଶହ ପିଲାଙ୍କର ଚାକିରି ନିମନ୍ତେ କାଗଜପତ୍ର ଯାଞ୍ଚ କାମ ଗତ ଜୁଲାଇ ୭ ତାରିଖରେ ଶେଷ ହୋଇଥିଲା। ତେବେ ନିଯୁକ୍ତ ପାଇଁ ଆଜିଯାଏ ପ୍ରଶାସନ କୌଣସି ପଦକ୍ଷେପ ନେଇ ନ ଥିବାରୁ ସଂଘର କର୍ମକତ୍ତାମାନେ ଗତ ୫ରୁ ଧାରଣାରେ ବସିଛନ୍ତି। କାର୍ଯ୍ୟକ୍ରମରେ ସଂଘର ଉପସଭାପତି ସାଜନ ଅନସାରୀ, ସାଧାରଣ ସମ୍ପାଦକ ମହେଶ୍ୱର ଟପ୍ପୋ, ସମ୍ପାଦକ ଦିଲୀପ ସିଂ, ସହ ସମ୍ପାଦକ ବାବୁଲା ଷଣ୍ଢ, ବିଜୟ ବିସି, ମୁରଲିଧର ଦେହୁରୀଙ୍କ ସମେତ ବହୁ କର୍ମକର୍ତ୍ତା ଉପସ୍ଥିତ ଥିଲେ।