ଭୁବନେଶ୍ୱର,୨୨।୫(ବ୍ୟୁରୋ): ଜାତୀୟ ସଡ଼କ ସୁରକ୍ଷା କ୍ଷୁଦ୍ର ଚଳଚ୍ଚିତ୍ର ମହୋତ୍ସବର ପୁରସ୍କାର ରାଶିକୁ ବୃଦ୍ଧି କରାଯାଇଛି। ଶ୍ରେଷ୍ଠ ଚଳଚ୍ଚିତ୍ର ପାଇଁ ପୁରସ୍କାର ରାଶି ୫୦ହଜାରରୁ ୧ଲକ୍ଷ ଟଙ୍କାକୁ ବୃଦ୍ଧି କରାଯାଇଥିବାବେଳେ ପ୍ରଥମ ରନର୍ସ ଅପ୍ ୪୦ ହଜାରରୁ ୮୦ ହଜାର ଓ ଦ୍ୱିତୀୟ ରନର୍ସ ଅପ୍ ପୁରସ୍କାର ରାଶି ୬୦ ହଜାରକୁ ବୃଦ୍ଧି ହୋଇଛି। ସେହିପରି ଶ୍ରେଷ୍ଠ ନିର୍ଦ୍ଦେଶକ, ଶ୍ରେଷ୍ଠ ସ୍କ୍ରିନ୍ ପ୍ଲେ, ଶ୍ରେଷ୍ଠ ଅଭିନେତା/ ଅଭିନେତ୍ରୀ ଓ ଶ୍ରେଷ୍ଠ ସିନେମାଟୋଗ୍ରାଫରଙ୍କୁ ପୁରସ୍କାର ରାଶି ବାବଦକୁ ୨୫ହଜାର ଟଙ୍କା ଲେଖାଏ ଦିଆଯିବ। ଶନିବାର ବାଣିଜ୍ୟ ଓ ପରିବହନ ବିଭାଗର ମୁଖ୍ୟ ସଚିବ ବିଷ୍ଣୁପଦ ସେଠୀ ଏହି ପୁରସ୍କାର ରାଶି ବୃଦ୍ଧି ସମ୍ପର୍କରେ ସୂଚନା ଦେଇ କହିଛନ୍ତି, ରାଜ୍ୟ ତଥା ଦେଶରେ ସଡ଼କ ଦୁର୍ଘଟଣା ଓ ଏଥିଜନିତ ମୃତ୍ୟୁ ହ୍ରାସ କରିବା ଜାତୀୟ ସଡ଼କ ସୁରକ୍ଷା କ୍ଷୁଦ୍ର ଚଳଚ୍ଚିତ୍ର ମହୋତ୍ସବର ମୁଖ୍ୟ ଉଦ୍ଦେଶ୍ୟ। ଚଳିତ ବର୍ଷ ଏହା ଜୁନ୍ ୧୮ ଓ ୧୯ରେ ରାଉରକେଲା ଓ ୨୪ ଓ ୨୫ରେ ପୁରୀଠାରେ ଅନୁଷ୍ଠିତ ହେବ। ତେବେ ଉତ୍ସାହ ଦେଖି, ଅଧିକ ଆବେଦନ ପାଇଁ ଉତ୍ସାହିତ କରିବାକୁ ଉଭୟ ଓଡ଼ିଆ ଏବଂ ଅଣ ଓଡ଼ିଆ ଭାଷା ବର୍ଗରେ ପୁରସ୍କାର ରାଶି ବୃଦ୍ଧି କରାଯାଇଛି। ଚଳଚ୍ଚିତ୍ର ଇଣ୍ଡଷ୍ଟ୍ରି ପ୍ରଫେଶନାଲ ଏବଂ ଅଣ ଇଣ୍ଡଷ୍ଟ୍ରି ପ୍ରଫେଶନାଲ ଭାବେ ଦୁଇ ଭାଗରେ ବିଜେତାଙ୍କୁ ଚୟନ କରାଯିବ। ଆବେଦନ କରିବାର ଶେଷ ତାରିଖ ଜୁନ୍ ୩ ରହିଛି। ଚଳଚ୍ଚିତ୍ର ନିର୍ମାତା ଓ ଛାତ୍ରୀଛାତ୍ର ଏହି ଆବେଦନ କରିପାରିବେ। ଚଳଚ୍ଚିତ୍ରଟି ଏକ ଡକ୍ୟୁମେଣ୍ଟାରୀ, ପରୀକ୍ଷାମୂଳକ, କାହାଣୀ, କଳ୍ପନା, ଅଣ କାଳ୍ପନିକ କିମ୍ବା ଆନିମେଶନ ହୋଇପାରେ। ମୂଳ ଚଳଚ୍ଚିତ୍ରଟି ଫୁଲ୍ ଏଚ୍ଡି ଫର୍ମାଟ୍ (୧୯୨୦x୧୦୮୦)ରେ କିମ୍ବା ତା’ଠାରୁ ଅଧିକ ହେବା ଉଚିତ। ସର୍ବାଧିକ ୨ ମିନିଟ୍ ଥିବା ଏହି ଚଳଚ୍ଚିତ୍ରରେ ଫ୍ରଣ୍ଟ୍ ଏବଂ ଶେଷ କ୍ରେଡିଟ୍ ଅନ୍ତର୍ଭୁକ୍ତ ରହିବ। ସମସ୍ତ ଏଣ୍ଟ୍ରି ପାଇଁ ଇଂଲିଶରେ ସବ୍ ଟାଇଟଲ୍ ଜରୁରୀ। ଅଂଶଗ୍ରହଣକାରୀମାନେ ଗୁଗଲ ଡ୍ରାଇଭ୍ କିମ୍ବା ସଡ଼କ ସୁରକ୍ଷା-roadsafetyod@gov.in ଏବଂ roadsafetyshortfilms@gmail.comରେ ଆବେଦନ କରିପାରିବେ। ତେବେ ଏ ସଂକ୍ରାନ୍ତ ସମସ୍ତ ବିବରଣୀ htt://odishatransport.gov.in/ରେ ଉପଲବ୍ଧ ହେବ ବୋଲି ସୂଚନା ଦିଆଯାଇଛି।