ଦାରିଙ୍ଗବାଡ଼ି,୬ା୧(ଅରୁଣ ସାହୁ): କନ୍ଧମାଳ ଜିଲା ଦାରିଙ୍ଗବାଡ଼ି ପଞ୍ଚାୟତ ସମିତି ସଭାଗୃହଠାରେ ସଡ଼କ ସୁରକ୍ଷା ସପ୍ତାହ ସଚେତନ କାର୍ଯ୍ୟକ୍ରମ ଅନୁଷ୍ଠିତ ହୋଇଯାଇଛି। ଏଥିରେ ଜାଗୃତି ସମ୍ପାଦକ କୈଳାସ ଚନ୍ଦ୍ର ଦଣ୍ଡପାଟଙ୍କ ଅଧ୍ୟକ୍ଷତାରେ ଅତିରିକ୍ତ ତହସିଲଦାର ନମିତା ପ୍ରଧାନ, ଏମ୍ଭିଆଇ ପ୍ରଶାନ୍ତ କୁମାର ଦାସଙ୍କ ସମେତ ପଞ୍ଚାୟତ ଉନ୍ନୟନ ଅଧିକାରୀ ସୁରେଶ ପଣ୍ଡା, ସରକାରୀ ଆଇଟିଆଇର ଶିକ୍ଷୟିତ୍ରୀ ସରୋଜିନୀ ଦାସ, ଡ. ଭୀମରାଓ ଆମ୍ବେଦକର ଉଚ୍ଚ ମାଧ୍ୟମିକ ବିଦ୍ୟାଳୟର ଅଧ୍ୟକ୍ଷ ଡଃ ପ୍ରତାପ ବେହେରା, ବାଲିଗୁଡ଼ା କଲେଜର ଅଧ୍ୟାପକ ଡଃ ବିଭୂତି ଭୂଷଣ ଆଚାର୍ଯ୍ୟ, ଏପିଓ କେଦାର ଚନ୍ଦ୍ର ପଣ୍ଡା ପ୍ରମୁଖ ମଞ୍ଚାସୀନ ରହି ଉପସ୍ଥିତ କଲେଜ ଛାତ୍ରୀଛାତ୍ରଙ୍କୁ ସଡ଼କ ସୁରକ୍ଷା ପ୍ରତି ସଚେତନ କରିଥିଲେ। ଦ୍ରୁତଗତିରେ ଗାଡ଼ି ନ ଚଳାଇବା, ଗାଡ଼ି ଚଳାଇବା ବେଳେ ମୋବାଇଲ ବ୍ୟବହାର ନ କରିବା, ହେଲମେଟ୍ ବ୍ୟବହାର କରିବା, ଡ୍ରାଇଭିଂ ଲାଇସେନ୍ସ କରିବା, ନାବାଳିକା ଓ ନାବାଳକ ଗାଡ଼ି ନ ଚଳାଇବା ଆଦି ଛାତ୍ରୀଛାତ୍ରଙ୍କୁ ପରାମର୍ଶ ଦିଆଯାଇଥିଲା। ଏବେ ଅନେକ ବୟସର ବାଇକ୍ ଚାଳକ ଦ୍ରୁତଗତିରେ ଚଳାଇବା, ଷ୍ଟଣ୍ଟ୍ ଦେଖାଇବା ଆଦି ବିଭିନ୍ନ କାରଣରୁ ଦୁର୍ଘଟଣା ଘଟୁଥିବା କୁହାଯାଇଥିଲା।
ଏକ ରିପୋର୍ଟରୁ ଜଣାଯାଇଛି ଯେ, ଗତ ଶେଷ ୨୮ଟି ଦୁର୍ଘଟଣା ମଧ୍ୟରୁ ୨୭ ଅନୁସୂଚିତ ଜନଜାତି ଓ ଜାତି ସମ୍ପ୍ରଦାୟର ଯୁବ ଗୋଷ୍ଠୀ ରହିଛନ୍ତି। ସେମାନଙ୍କ ମଧ୍ୟରୁ ୧୮ଟି ଗାଡ଼ି ଅନ୍ୟ ମଲିକଙ୍କଠାରୁ ମାଗିନେଇଛନ୍ତି, ମାତ୍ର ୪ ଜଣଙ୍କ ବ୍ୟକ୍ତିଗତ ବୀମା ରହିଥିବା ବେଳେ ଅନ୍ୟମାନଙ୍କ ବୀମା ନ ଥିବା ଜଣାପଡ଼ିଛି। ସେହିପରି ଏହି ୨୮ଟି ମୋଟର ସାଇକେଲ ଦୁର୍ଘଟଣାରୁ ଅଧିକାଂଶ ମଦ୍ୟପାନ କରି ଗାଡ଼ି ଚଳାଇଛନ୍ତି।
