କେସିଙ୍ଗା,୨୫।୯(ତୁମେଶ୍ୱର ସାହୁ): କଳାହାଣ୍ଡି ଜିଲା କେସିଙ୍ଗା ଗ୍ରାମ୍ୟ ଉନ୍ନୟନ ବିଭାଗ ପକ୍ଷରୁ ଚାଲିଥିବା ଦୁଇଟି ରାସ୍ତା ନିର୍ମାଣ କାମକୁ ନେଇ ଜିଲାପାଳଙ୍କ ନିକଟରେ ଅଭିଯୋଗ ହୋଇଛି। କେସିଙ୍ଗା ବ୍ଳକର ଜୋଲକୋ-ଟୁଟିଙ୍ଗପଦର ରାସ୍ତା ଏବଂ ଗାଈଦୋରୋ-ଦେଓଗାଁ ରାସ୍ତା ନିର୍ମାଣ କାମ ଚାଲିଛି। ହେଲେ ରାସ୍ତାରେ ମେଟାଲ ଓ କ୍ରଶର ଗୁଣ୍ଡ ବିଛାଇ ଠିକାଦାର ଚୁପ୍ ହୋଇପଡ଼ିଥିବା ବାଲସି, ମଶାଣିବନ୍ଦ, କାଣ୍ଡେଲ, ରୁପ୍ରା, ରେଙ୍ଗାଲି ଆଦି ଗ୍ରାମବାସୀ ଅଭିଯୋଗ କରିଛନ୍ତି। ଫଳରେ ଉକ୍ତ ରାସ୍ତା ଦେଇ ଯାତାୟାତ କରୁଥିବା ଜନସାଧାରଣ ବହୁ ସମସ୍ୟାର ସମ୍ମୁଖୀନ ହେଉଥିବାରୁ ଗ୍ରାମବାସୀ ଜିଲାପାଳଙ୍କୁ ଜଣାଇଛନ୍ତି।
ଅଭିଯୋଗ ମୁତାବକ, କେସିଙ୍ଗା ବ୍ଲକ ଜୋଲକୋଠାରୁ ଭାୟା କାଣ୍ଡେଲ, ମଶାଣିବନ୍ଧ ଓ ରେଙ୍ଗାଲି ଗ୍ରାମ ଦେଇ ନର୍ଲା ବ୍ଲକ ଟୁଟିଙ୍ଗପଦର ଗ୍ରାମ ପର୍ଯ୍ୟନ୍ତ ରାସ୍ତା କାମ ନିର୍ମାଣ ପାଇଁ ଅଟକଳ ମୂଲ୍ୟ ୯୪୪.୩୮ ଲକ୍ଷ ଟଙ୍କା ରହିଛି। ଏପରିକି ୫ ବର୍ଷ ମଧ୍ୟରେ ମରାମତି ପାଇଁ ୭୩ ଲକ୍ଷ ଟଙ୍କା ରଖାଯାଇଛି। ଏହି କାମକୁ ସ୍ବତନ୍ତ୍ର ଶ୍ରେଣୀ ଠିକାଦାର ସୁଧୀର ପଣ୍ଡା କରୁଥିବା ବେଳେ ତାଙ୍କୁ ନଭେମ୍ବର ୨୦୨୨ରେ କାର୍ଯ୍ୟାଦେଶ ଦିଆଯାଇଥିଲା। କାମ ଆରମ୍ଭ ୭।୯।୨୦୨୨ରେ ହୋଇଥିବା ବେଳେ କାମ ଶେଷ ତାରିଖ ୬।୯।୨୦୨୩ ରହିଛି। କିନ୍ତୁ କାମ ସମ୍ପୂର୍ଣ୍ଣ ହେବାର ଶେଷ ତାରିଖ ସମାପ୍ତି ହୋଇଥିଲେ ସୁଦ୍ଧା ଏହି ରାସ୍ତା କାମ ଅର୍ଦ୍ଧ ନିର୍ମିତ ଅବସ୍ଥାରେ ପଡ଼ିରହିଛି। ସେହିପରି ଗାଈଦୋରୋଠାରୁ ଦେଓଗାଁ ପର୍ଯ୍ୟନ୍ତ ରାସ୍ତା ନିର୍ମାଣ ପାଇଁ ଅଟକଳ ମୂଲ୍ୟ ୫୨୨.୫୬ ଲକ୍ଷ ଟଙ୍କା ରହିଛି। ଏହି କାମ ଠିକାଦାର ସୁରେଶ ଅଗ୍ରୱାଲ କରୁଥିବା ବେଳେ କାମ ଆରମ୍ଭ ୧୫।୩।୨୦୨୩ ଏବଂ କାମ ଶେଷ ତାରିଖ ୧୫।୪।୨୦୨୪ ରହିଛି। ଏହି କାମ ମଧ୍ୟ ଅଧାପନ୍ତରିଆ ଭାବେ ପଡ଼ିରହିଥିବା ବେଳେ ଗାର୍ଡୱାଲ କାମ ଅତି ନିମ୍ନମାନର ହୋଇଥିବା ସ୍ଥାନୀୟ ଲୋକେ ଅଭିଯୋଗ କରିଛନ୍ତି।
ଏହି ଦୁଇଟି କାମରେ କିଛି ସ୍ଥାନରେ ପିଚୁ ପକାଇ ଠିକାଦାର ଚୁପ୍ ବସି ରାସ୍ତା ଉପରେ ମେଟାଲ ଓ କ୍ରଶର ଗୁଣ୍ଡ ବିଛାଇ ଛାଡ଼ି ଦେଇଛନ୍ତି। ଫଳରେ ରାସ୍ତା ଉପରେ ନିର୍ଭର
କରୁଥିବା ଜନସାଧାରଣ ଧୂଳିରେ ନାହିଁ ନ ଥିବା ଅସୁବିଧାର ସମ୍ମୁଖୀନ ହେଉଛନ୍ତି। ଏନେଇ ବାରମ୍ବାର କେସିଙ୍ଗା ଗ୍ରାମ୍ୟ ଉନ୍ନୟନ ବିଭାଗ କନିଷ୍ଠ ଯନ୍ତ୍ରୀ ସୁଖୀଶ୍ୟାମ ନାଏକଙ୍କୁ ପଚାରିବାରୁ ଠିକାଦାରଙ୍କ ନାମରେ ଦୁଇ ଥର ସମନ ଜାରି କରାଯାଇଛି। ପୂର୍ବରୁ ୧୨ଫୁଟ ଓସାରିଆ ପିଚୁ ରାସ୍ତା କାମ କରିବା ପାଇଁ ଆଦେଶ ଥିଲା। ବର୍ତ୍ତମାନ ଏହା ୧୮ଫୁଟ ଓସାରରେ ପିଚୁ କାମ ହେବ। ଏନେଇ କେତେକ ଜମିରେ ଗଛ କାଟିବା ଆବଶ୍ୟକ ପଡୁଛି। ସମସ୍ତ କାମ ଶେଷ ହୋଇଛି। ଲଘୁଚାପଜନିତ ବର୍ଷା ଲାଗି ରହୁଛି। ବର୍ଷା ଛାଡ଼ିଲେ ପିଚୁ କାମ ହେବ ବୋଲି ସେ ପ୍ରକାଶ କରିଛନ୍ତି।